Jurnalist oğurlanmış uşağın xilas edilməsinin əsasında detektiv yazıb

Bakılı jurnalist Ramella İbrahimxəlilova ilk kitabını – “Sona çatanda”nı nəşr etdirib. Kitab  həqiqi hadisələr, bir uşağı banditlərin əsirliyindən azad etmiş azərbaycanlı polislərin çətin əməliyyatları əsasında yazılmış dedektiv oçerkdir. Cinayətkarlar Sumqayıtda qaçırılmış oğlan uşağını Xasavyurtda bir meşənin kənarında çeçen İbrahimin evində saxlayıblar.

Əhvalat Azərbaycan üçün çətin dönəmdə, Qarabağ müharibəsindən sonra Qarabağ, Ermənistan  və   Çeçenistandan qaçqınların çox olduğu vaxtda baş verir.  Kitab 2002-ci ildə Bakının Yasamal rayonunda çeçen döyüşçü İbrahim əl-Qurinin qətli ilə başa çatır.

Ramella 1998-ci ildən müxtəlif saytlarda, qəzetlərdə, informasiya agentliyində, “Zerkalo” qəzetində (sonra “Exo”) çalışıb. Yazıçılığa gəlişini təbii hesab edir,   ona xeyr-dua verən və kitabın üzərində işləməyi məsləhət edən “Zerkalo” qəzetinin baş redaktoru, sonra “Exo”nun rəhbəri, mərhum Rauf Talışinski (2-18-ci il mayın 8-də vəfat edib) olub.

“O bilirdi ki, cinayət xronikası şöbəsində işlədiyim üçün maraqlı süjetlərim var. O zaman mən kitab yazmağa hazır deyildim, heç öz kitabım barədə düşünmürdüm. Sadəcə, yazmağa başladım.   Cinayətlərin araşdırılmasını təsvir edərkən işdən zövq alıram. Bunların üstünün açılması üçün dərin bilik lazımdır. Sadə, məişət cinayətləri o qədər də maraqlı deyil. Bəlkə də mən kriminalist olmalıydım. Jurnalistika bataqlıqdır, çıxa bilmirsən. Ancaq peşman deyiləm, çünki  bu peşədə çoxlu yaxşı dostlar tapmışam”, - R.İbrahimxəlilova Turan-a bildirib.

“Exo” qəzeti bağlananda Ramellanın redaksiyada istifadə etdiyi kompüterdəki çoxillik arxiv itib. Dərc olunmuş məqəlalər əsasında qeydləri bərpa etmək lazım gəlib. Çünki kitabda toplanmış hadisələr Azərbaycan və Rusiya mətbuatlarında hissə-hissə dərc edilmişdi.  Hadisələrin iştirakçıları ilə görüşdüm, cinayət- axtarış şöbəsinin əməliyyatçıları ilə məsləhətləşdim.   İnternetdə məsləhətləri, yazıçılar üçün metodik tövsiyələri dinlədim. 

Kitabda 1997-ci ildə Sumqayıtda çeçenlər tərəfindən qaçırılmış oğlanın əhvalatından bəhs edilir.   Əsas qəhrəman əməliyyatçı Məhəmməd Məmmədovdur. Onu MaqoyMoskovski çağırırdılar.  Moskva cinayət-axtarış şöbəsində işləyib.

Ramella Məhəmmədlə ilk görüşdən 18 il sonra qarşılaşıb.  O zaman Məhəmməd ilk dəfə ona öz əhvalatını danışmışdı. Polis onun haqqında kitab yazılmasına görə heyrətlənib.

Məhəmməd Ramella ilə görüşə Goranboy rayonundan gəlib və kitabın təqdimatında iştirak edib.

Ramella daxildən araşdırmanın mürəkkəb proses olduğunu göstərmək istəyib. Təhqiqatın əvvəli və sonu hamıya məlumdur – cinayət və həbs. Ancaq az adam bilir ki, əməliyyatçılar hansı çətinliklər və həyatı bahasına cinayətləri axtarıb tapır və zərərsizləşdirir.

“Süjet fikirləşmək niyə lazımdır, əgər hər şey həyatda baş verirsə? Skeptiklər deyiblər ki, süjetin gerçək olduğuna inanmırlar, ancaq indiki gənclik   “Azərbaycanda çətin doxsanlar” dövrünün kriminal anlamda nə dərəcədə ağır olduğunu təsəvvür etmir”, - R.İbrahimxəlilova gülür.

Kitabın başlığı özü-özündən yaranıb. Dəyişmək istəyiblər, ancaq “Sona çatanda” sözləri yenidən qayıdıb.   

Bəlkə də müəllif real hadisəyə bədii çalar verib. Detektiv oçerk alınıb.  

“Əsas vəzifəm hadisəni əhatə edən intriqaları da saxlamaq idi ki, oxucunu itirməyim. Tənqidçilərin mənə münasibəti yaxşı oldu, yalnız bir nəfər irad bildirdi ki, bununla da razıyam və növbəti kitabın üzərində işləyərkən nəzərə alacagam”, - müəllif bildirib.

O, ilk kitabının təqdimatına polis veteranlarını dəvət edib. İbrahimin qətlinin araşdırılması zamanı Pankisi dərəsində  yaraqlıların düşərgəsində olan azərbaycanlı polis əməkdaşlarından biri, peşəkar əməliyyatçı   Elbrus Rüstəmovu xüsusilə qeyd edib.

“Kitab nəşr etdirməklə zəngin olmaq olarmı”, - mən soruşdum.

“Hər şeydən qazanc əldə etmək olar, yazıçılıqdan da. Əgər kitabın reklamını və menecmenti düzgün təşkil edərsənsə.

Kitaba çox xərc çəkməmişəm, dostlar kömək ediblər. Kitabın bədii tərtibatını rəssam və rejissor Samir Kərimoğlu öz üzərinə götürüb. Redaktor işləyib”, - Ramella açıqlayıb.

Onun üç övladı var – iki oğlu, bir qızı. Yəni, evdə kitab yazmağa vaxtı yoxdur, elə işdə də.  Kitab Sumqayıtdan Bakıya və əks istiqamətdə yolda yaranıb: taksidə, avtobusda, elektrik qatarında məhz bu məqsədlə alınan planşetdə mətn yığıb.  Mənim kitabım onu sübut edir ki, qarşıya qoyulmuş məqsədə çatmaq olar, əsas olan istəkdir, vaxt tapmaq olar”, - o vurğulayıb.

Kitab 600 nüsxə dərc edilib. Reklamı olmadığı üçün az satılır. R.İbrahimxəlilova kitab bazarında yenidir və etiraf edir ki, bədii məhsulun irəliləməsinin sirlərini bilmir. 

O, növbəti kitabın üzərində işləmək niyyətindədir. Artıq süjet var, bu da real hadisədir və əvvəlkindən daha kəskindir. Müəllif yeni kitab haqda çox danışmayıb, çünki bir şey haqda öncədən danışarsan, sonucda heç nə olmaz.