Açılan məktəblərin əlavə müəllimlərə ehtiyacı var

Bakı/22.01.21/Turan:  Azərbaycanda fevralın 1-dən təhsil müəssisələrində tədris mərhələli şəkildə bərpa olunur.

Bu, Baş nazir Əli Əsədovun imzalanmış “Xüsusi karantin rejimi dövründə Azərbaycan Respublikasının ərazisində fəaliyyət göstərən təhsil müəssisələrinin fəaliyyətinin təşkili ilə bağlı əlavə tədbirlər barədə” qərarında əks etdirilib. 

Yanvarın 22-də xüsusi karantin rejimi dövründə təhsil müəssisələrinin fəaliyyətinin təşkilinə dair brifinqdə Təhsil naziri Emin Əmrullayev də bildirib ki, fevralın 1-dən bütün ölkə üzrə ibtidai təhsil, məktəbəhazırlıq, icma əsaslı qrupların fəaliyyəti mərhələli bərpa ediləcək.

Nazirin sözlərinə görə, iri şəhərlərdə tədris həftədə 3 dəfə olmaqla, digər rayonlarda isə həftədə 4 və 5 dəfə olmaqla bərpa olunacaq.

Nazir deyib ki, sonrakı iki həftədə V-IX siniflərdə, həmçinin peşə və ali məktəblərdə əyani tədrisin qismən bərpası gözlənilir, amma bu, yoluxmadan asılıdır. «Metronun fəaliyyəti hələ də bərpa edilməyib, növbəti mərhələdə belə qərar olarsa, V-IX siniflər də açıla bilər.  Daha az yoluxma olarsa, bölgələrdə daha sürətli açılma ola bilər. Növbəti həftələrdə - yəqin ki, fevralın 8-i və 15-i mümkün qədər açılış ola bilər, məqsəd mümkün dərəcədə məktəbləri dayanıqlı formatda əyani təhsilə qaytarmaqdır. Tələsik açıb, tələsik bağlamaq istəmirik».

Bundan əvvəl keçən ilin sentyabr ayında məktəblərdə və ali məktəblərində təhsil mərhələli şəkildə bərpa olunmuşdu, amma qısa müddətdən sonra yoluxmanın artım fonunda bütün təhsil müəssisələr onlayn təhsil formasına keçmişdi.

Ölkədə vaksinasiyaya hələ yeni başlaması fonunda indidən təhsil müəssisələrinin ənənəvi tədris formasına keçməsi nə dərəcədə düzgündür?

Milli Məclisin Elm və Təhsil komitəsinin üzvü Eldar Quliyev Turana bildirib ki, koronavirus pandemiyası çox sahələrə, o cümlədən də təhsil sahəsinə çox təsir edib. «Mən ənənəvi təhsilin tərəfdarıyam, amma bu gün insan həyatından söhbət gedir. Biz yaşlı insanları da, gənc insanları da qorumalıyıq. Ona görə də dövlət təhsilin ənənəvi formatdan onlayn rejiminə keçirməyə məcbur olub».

Deputat qeyd edib ki, müəyyən yumşalmalara getmək vacib idi. «Birinci, ikinci siniflərin şagirdlərinin, həmçinin ali məktəblərin birinci kursların tələbələrinin əyani şəkildə təhsil almaları vacibdir. Çünki birinci siniflərin şagirdi üçün onlayn dərslər çətindir və əlbəttə ki, nəticədə təhsil səviyyəsi aşağı düşəcək. Birinci kurs tələbələri də nə müəllim tanıyırlar, nə dekan tanıyırlar. Bunlara mütləq lazımdır ki, heç olmasa 1-2 il oxusunlar bilsinlər ki, nə nədir nə deyil».

E.Quliyev vurğulayıb ki, məktəb və universitet yalnız təhsil vermir, həmçinin tərbiyə də verir. «Bu 44 günlük müharibəsi zamanı biz nə qədər vətənpərvər ruhunda böyümüş gənclərimiz var. Bu son illərdə Azərbaycanda aparılan təlimlərin nəticəsidir. Bütün bunlar, vətənpərvərlik, tərbiyə yalnız evdə yox, həm də məktəbdə öyrədilir və bu proses əyani şəkildə olsa daha yaxşı olar».

Deputat qeyd edib ki, ölkədə vaksinasiya prosesi başlayıb və ümid var ki, yaya qədər Azərbaycanda pandemiya bitəcək. «İndi isə digər sahələrdəki kimi, təhsil sahəsində də karantin rejiminin müəyyən yumşalmalara getmək vacibdir. «Bu həm valideynlər üçün də vacibdir. Əvvəl işləyən valideynlər uşağı məktəbə qoyub rahat işə gedirdi, indi isə məcburdur uşağa görə evdə otursun. Digər tərəfdən kompyuterin nə qədər xeyri varsa o qədər də sağlamlıq cəhətdən ziyanı var. Məktəblərin açılması çox vacibdir, amma insan sağlamlığı ondan da vacibdir. Ona görə də bu prosesin mərhələli şəkildə aparılması təqdirəlayiqdir».

Təhsil üzrə ekspert Kamran Əsədov AzadlıqRadiosuna bildirib ki, yeni qərara əsasən 640 min şagird fevralın 1-dən dərs prosesinə başlaya bilər. «Bu, ibtidai sinif şagirdləri əhatə edir. Mən bu başlamanı müsbət hesab edirəm və növbəti pillələrdə tədris prosesin bərpası vacib bir addım kimi qiymətləndirirəm. Bu prosesi başlamaq vacib idi, çünki ibtidai siniflər onlayn qaydada zəruri biliklərə yiyələnə bilmirlər. Digər tərəfdən isə bu yaş kateqoriyasına aid olan uşaqların onlayn platformalarda qeydiyyatdan keçmək imkanlar çox azdır. Eyni zamanda kompyuterlərin, planşetlərin internetin olmaması, xüsusilə riyaziyyat fənninin onlayn formatda keçirilməsi çətinliklər ibtidai siniflərdə təhsilin bərpasını zəruri edib. Bu gözlənilən qərar idi və dünyanın bir çox ölkələrində xüsusulə ibtidai siniflər tədris prosesinə cəlb edilib».

Ekspert hesab edir ki, diqqətdən yayınan bir neçə məsələ də var. «İbtidai siniflərdə çalışan müəllimlərin 37 faizinin yaşı risk qrupuna aiddir. İkinci məsələ isə budur ki, fevral ayıdır, satış yerlər bağlıdır və valideynlərin gəlirləri pandemiyaya görə aşağı düşüb. Belə olan halda şağırdlər hansı formada məktəbə gedəcək? Uşaqlar sentyabrda yay formasını geyinmişdilər, indi isə qış aylarıdır və uşaqlar hansı formadan istifadə etməsi olduqca vacib məsələdir. Başqa bir məsələ də açıq qalıb. Şagirdlərin məktəbdə iştirakı könüllüdür. Bəs müəllimlər? Müəllimlər də yoluxmadan narahat olarlar və onların bu səbəbdən məktəbə getməməyə ixtiyarları varmı? Bu məsələlər hələ ki, açıq olaraq qalır, amma mən əminəm ki, onlar da öz həllini tapacaq».

K.Əsədov məktəblərə giriş-çıxış məsələsinə də toxunub. «Sentyabrda dərslər başlayanda valideynlər məktəbin qarşısında yığılırdılar və bu da yoluxma sayına kəskin şəkildə təsir göstərirdi. Qaydalara riayət baxımından ciddi tələblər olmalıdır».

Ekspert hesab edir ki, Təhsil Nazirliyi əlavə müəllim kontingentini işə cəlb etməlidir. «Əlavə müəllim kontingentini cəlb etmək lazımdır ki, pandemiya səbəbindən və yaxud da vaksinasiyadan sonra hansısa bir müəllimin səhhətində problem yaranarsa onları əvəzləyə bilsin».—0—