Elmar Məmmədyarov başa çatmaqda olan ilin yekunları haqqında

Azərbaycanın ərazi bütövlüyü Qarabağ münaqişəsinin tənzimlənməsi üzrə danışıqların predmeti deyil, bu barədə Azərbaycan XİN rəhbəri Elmar Məmmədyarov KİV-ə müsahibəsində bildirib.

“Bizim mövqeyimizin siyasi və hüquqi əsasını beynəlxalq hüquq norma və prinsipləri, BMT-nin nizamnaməsi, BMT Təhlükəsizlik Şurasının qətnamələri və digər beynəlxalq təşkilatların qəbul etdikləri sənədlər təşkil edir”, deyə o bildirib.

NATO-nun Uels sammitinin yekun bəyanatında NATO üzvü olan dövlətlər Azərbaycanın ərazi bütövlüyünə və suverenliyinə dəstək ifadə edərək qeyd ediblər ki, Cənubi Qafqazda münaqişənin məhz bu prinsiplər əsasında həllini dəstəkləyirlər.

Xocalı soyqırımının beynəlxalq aləmdə tanınması üzrə müəyyən iş görülüb. Bu günə qədər Kolumbiya, Çexiya, Rumıniya, Serbiya, Qonduras, Peru, Panama, Pakistan, Meksika, İordaniya, Bosniya və Herseqovina və Sudan parlamentlərində, Amerikanın 15 ştatında Xocalı soyqırımı rəsmi olaraq tanınıb.

“İşğal edilmiş ərazilərimizdə qanunsuz fəaliyyətin qarşısının alınması, bu fəaliyyətə xarici fiziki və hüquqi şəxslərin cəlb edilməsinə yol verilməməsi Azərbaycan XİN-in və diplomatik nümayəndəliklərinin diqqət mərkəzindədir”, deyə Məmmədyarov bildirib.

Yerevanın konstruktiv mövqe tutması və sülh sazişi üzərində işləməyə başlaması üçün ATƏT-in Minsk qrupu danışıqlarda Ermənistanın bəhanələrinə və təxribatlarına son qoymaq üçün zəruri təcrübi tədbirləri görməlidir, deyə nazir bildirib.

Azərbaycan-Rusiya münasibətlərinə toxunan Məmmədyarov Rusiyanı Azərbaycanın əsas ticarət tərəfdaşlarından biri adlandırıb.

Azərbaycan-Rusiya münasibətlərinin xüsusiyyətlərindən biri humanitar əlaqələrdir. “Azərbaycan və Rusiya arasında bütün səviyyələrdə qarşılıqlı səfərlərin intensivliyi bizi sevindirir”, deyə Məmmədyarov bildirib.

Bərabərhüquqluluğa və qarşılıqlı maraqlara əsaslanan əməkdaşlıq Azərbaycan və Avropa İttifaqı arasında münasibətlərin əsasını təşkil edir, deyə o sözünə davam edib.

Şərq Tərəfdaşlığı ölkələri və Aİ arasında Vilnyus sammitində imzalanmış ikitərəfli sənədlər və onların həyata keçirilməsi üzrə sonrakı işlər Azərbaycanın Aİ ilə əməkdaşlığının əsas hissəsidir. İşgüzar dairələr arasında əlaqələrin inkişafı, turizmin genişləndirilməsi təşviq edilib, xüsusən, Viza rejiminin sadələşdirilməsi haqqında Sazişin imzalanması nəticəsində imkanlar yaradılıb, energetika sahəsində tərəfdaşlıq təşviq edilib, deyə nazir qeyd edib.

Eyni zamanda, Məmmədyarov Azərbaycanda insan hüquqlarının pozulması haqqında beynəlxalq tənqidi təkzib edib. “Təəssüf ki, bəzi dairələr insan hüquqlarını xarici siyasət alətinə çevirərək, məqsədyönlü şəkildə bir sıra dövlətlərə qarşı əlaqələndirilmiş kampaniya həyata keçirir, bunu siyasi təzyiq və böhtan kampaniyasına çevirməyə çalışır”, deyə o bildirib.

ABŞ-la münasibətlərə toxunan nazir qeyd edib ki, onlar Bakının qlobal enerji təhlükəsizliyinə, terrorizmə və transmilli təhlükələrə verdiyi töhfə, Əfqanıstandakı əməliyyatlara maddi-texniki, tranzit və maliyyə dəstəyi ilə səciyyələnir.

ABŞ ATƏT-in Minsk Qrupunun həmsədri kimi, Rusiya və Fransa ilə birlikdə Qarabağ münaqişəsinin tənzimlənməsi üzrə danışıqlarda vasitəçi rolunda çıxış edir. “ABŞ bu məsələnin Azərbaycan cəmiyyəti üçün nə dərəcədə həssas və ağrılı olduğunu bilir, buna görə Azərbaycan ABŞ-dan, eləcə də digər həmsədrlərdən münaqişənin beynəlxalq hüquq norma və prinsipləri, xüsusən Azərbaycanın ərazi bütövlüyünə, suverenliyinə və beynəlxalq səviyyədə tanınmış sərhədlərinə hörmət, BMT TŞ-nin qətnamələri əsasında tezliklə həllinə yönəlmiş səylərin daha da fəallaşdırılmasını gözləyir”, deyə Məmmədyarov qeyd edib. -06D-