«Hüquqlar naminə idman» kampaniyası Azərbaycanda həbs edilmiş jurnalistləri azad etməyə çağırıb

“Hüquqlar naminə idman” beynəlxalq hüquq müdafiə koalisiyası Azərbaycan hakimiyyətinin müstəqil KİV-ə və digər tənqidi səslərə qarşı amansız repressiyalarını pisləyir.

Koalisiya öz bəyanatında Bakını ölkədə söz azadlığının yaxşılaşdırılması üzrə təcili və konkret addımlar atmağa, YUNESKO-nun Gilyermo Kano mükafatı laureatı Xədicə İsmayılın və digər həbs edilmiş jurnalistlərin, blogerlərin və digər siyasi məhbusların qeyd-şərtsiz azadlığa buraxılmasından başlamağa çağırıb.

“Bu yaxınlarda 16 siyasi məhbusun azad edilməsinə baxmayaraq, onlarla insan siyasi səbəblərlə həbsdə qalır. Onlar arasında jurnalistlər Nicat Əliyev, Araz Quliyev, Seymur Həzi və Xədicə İsmayılova, blogerlər Əbdül Əbilov, Fərəc Kərimov, Rəşad Ramazanov və İlkin Rüstəmzadə, habelə müxalif Respublikaçı Alternativ (ReAl) təşkilatının lideri İlqar Məmmədov kimi ifadə azadlığı hüququnu həyata keçirdiyinə görə həbs edilmiş digər şəxslər var”, deyə bəyanatda bildirilir.

“İsmayılovanın və digər jurnalistlərin həbsinin davam etməsi yolverilməzdir və bu yaxınlarda Azərbaycanda siyasi məhbusların azad edilməsindən sonra ortaya çıxmış xoş iradəyə xələl gətirir.

Hakimiyyət İsmayılovanı azad etməli və tənqidi səslərə hücuma son qoymalıdır”, deyə KİV-ə Beynəlxalq Dəstək təşkilatının icraçı direktoru Jesper Hojberq bildirib.

Lakin Azərbaycan hakimiyyəti siyasi motivli təqibləri davam etdirir. Belə ki, martın 30-da 79 yaşlı yazıçı Əylisli İtaliyada ədəbiyyat festivalına gedərkən Bakı aeroportunda saxlanılıb. O, 12 saat ərzində dindirilib və ölkədən buraxılmayıb. Onu uydurma hakimiyyət nümayəndəsinə müqavimət göstərmək ittihamı ilə üç ilədək həbs cəzası gözləyir.

Baş Prokurorluq həmçinin Meydan TV-yə - Azərbaycan xəbərlərinin alternativ işıqlandırılmasını təmin edən müstəqil internet-KİV-ə qarşı cinayət işi qaldırıb.

Meydan TV qanunsuz sahibkarlıq fəaliyyətində, vergilərdən yayınmaqda və hakimiyyətdən sui-istifadədə ittiham olunur. İş fiqurantları on beş jurnalistdir, onların əksəriyyətinin ölkəni tərk etməsi qadağan edilib və həbs təhlükəsi ilə üz-üzədirlər.

Meydan TV-nin xaricdə olan əməkdaşları da hədələrə və qohumlarına qarşı təzyiqlərə, onların işdən çıxarılmasına və siyasi motivli həbslərinə məruz qalıblar.

“Meydan TV-yə təzyiq və digər tənqidi KİV-lərə qarşı repressiyalar Azərbaycan hökumətinin istənilən tənqidə dözmək istəmədiyini və ifadə azadlığını təmin etmək üçün əsl islahatlar keçirməkdən tam imtina etdiyini göstərir”, deyə “Article19”un icraçı direktoru Tomas Hyuz bildirib.

Bütün bunlar Azərbaycanda fikri ifadə azadlığının və digər hüquqların daha geniş şəkildə pozulması fonunda baş verir. Digər müstəqil KİV və QHT-lər də təzyiqlə qarşılaşıblar. Belə ki, Azadlıq Radiosunun bürosu və Reportyorların Azadlıq və Təhlükəsizlik İnstitutunun ofisi bağlanıb. Dövlət yayım KİV-lərinə tamamilə nəzarət edir. Qalan azsaylı tənqidi qəzetlərdən biri olan “Azadlıq” vaxtaşırı nəşrini dayandırmaq məcburiyyətindədir, bağlanmaq təhlükəsi ilə üz-üzədir. Jurnalistlərə hücumlar, o cümlədən onların qətlləri cəzasız qalır ki, bu da qorxu atmosferini qoruyub saxlayır.

“Hüquqlar naminə idman” kampaniyası beynəlxalq ictimaiyyəti iyunun 17-19-da Bakıda keçiriləcək “Formula-1” yarışları ərəfəsində Azərbaycanda insan hüquqlarının pozulması faktlarına diqqəti artırmağa çağırır. -06D-