Qanuna dəyişikliklərə qarşı mübarizə davam edir

Vətəndaş Cəmiyyətinin Hüquqlarını Müdafiə Komitəsi (VCHMK) cümə günü RATİ-də növbəti toplantısını keçirib.

Keçən ilin dekabrında QHT-lərlə bağlı qanunlara dəyişikliklər edilməsi üçün parlamentə layihə təqdim edilib. Həmin layihə QHT-lər önündə 17 əlavə öhdəlik nəzərdə tutur. Öhdəliklərə münasibətdə pozuntulara yol verən QHT-lərin yüksək həcmdə cərimələnməsi, fəaliyyətinin bir il müddətinə dayandırılması və s. gözlənilir. Buna cavab olaraq, QHT sektoru təmsilçiləri keçən il dekabrın 30-da VCHMK-ni təsis ediblər. Bu formatda qanuna dəyişikliklər olunmamasına səy göstərilir. 

Komitə üzvü Qubad İbadoğlu VCHMK-nin bu yöndə bu il yanvarın 16-da QHT-lərin Forumunun keçirilməsini, 100-dən çox QHT-nin imzaladığı müraciətin PA-ya göndərildiyini xatırladıb. Həmin müraciətdə qanuna nəzərdə tutulan dəyişikliklərin imzalanmasının vətəndaş cəmiyyətinin fəaliyyətində hansı neqativlərə yol açacağı qeyd edilib. Q.İbadoğlu qanuna dəyişkliklərlə bağlı 3 variant olduğunu qeyd edib. Dəyişikliklərdən imtina olunması, dəyişikliklərin bir hissəsinin və ya hamısının qəbul edilməsi kimi variantlar var. Komitə hər üç variant üzrə hansı işləri görməli olacağını planlaşdırır.  

Komitə üzvü Leyla Əliyeva bu sahədə beynəlxalq qurumlarla görülən işlərdən danışıb. Adı çəkilən Foruma ABŞ, Böyük Britaniya, Avropa Birliyi səfirləri qatılıblar. Forum QHT-lərin öz hüquqlarını müdafiə etmək yönündə göstəricisi kimi dəyərləndirilib. Bir sıra beynəlxalq tərəfdaşların Azərbaycan QHT-lərinə ciddi dəstək kampaniyası başlanıb.

Növbəti addımlara gəlincə, QHT-lərin fəaliyyətinə qanunlara dəyişiklik yolu ilə məhdudiyyətlər qoyulması haqda AŞPA-ya bəyanat ünvanlanıb. Reportyorların Azadlıq və Təhlükəsizlik İnstitutunun direktoru Emin Hüseyn bəyanatın mətnini nəzərə çatdırıb. Yanvarın 27-si səhərə kimi bəyanatın imzalanmaq üçün açıq olacağı deyilib. Yanvarın 27-də isə bəyanatın AŞPA rəhbərliyinə təqdim edilməsi nəzərdə tutulur.   

Adı çəkilən bəyanatda ölkədə əsas insan azadlıqları sahəsində durumun pisləşdiyi qeyd edilib. Sənəddə QHT-lərin fəaliyyətilə bağlı qanunlara nəzərdə tutulan dəyişikliklər əslində bu qurumların sərt dövlət nəzarəti altına alınması kimi dəyərləndirilir. Buna qədər isə rəsmi Bakının kommersiya fəaliyyətilə bağlı qanunları sərtləşdirməklə bu fəaliyyət sahəsinə vətəndaş cəmiyyətinin nəzarətini heçə endirdiyi qeyd olunur. Ölkədə ifadə, mətbuat, sərbəst toplaşmaq, etiqad azadlıqlarının pozulduğu vurğulanır. Siyasi fəallığa görə 10-larla insanın həbsə salınmasına diqqət çəkilir. Son olaraq, bəyanatda AŞPA-ya rəsmi Bakıya qanuna dəyişikliklərin imzalanmaması müraciəti etməsi xahiş olunur. -05C-