F5

Deyirəm adamın min dənə pullu day-dayı olunca bir dənə gecə-gündüz yatmayan qara bəxti olsaydı nə gözəl olardı. Onda bilirsən nələr etmək olardı. Açardın bir dənə agentlik, ağlınıza başqa şey gətirməyin, xəbər agentliyi deyirəm, olardın baş direktor, 100 faiz süni meyvə soku içə-içə, içindəki tarakanları seyr edə-edə, internetdən xəbər götürüb tərcümə edə-edə qara bəxtinə yalvaraydın ki, bütün dövlət idarələrindən rəsmi informasiyalar, ölüm-itim xəbərləri ancaq sənə verilsin, ölkəyə gələn və gedənlər ancaq sənin mikrofonlarına danışsın, özün də oturasan kabinetində şəhadət barmağını qoyasan kompüterdə F5 düyməsinin üstünə, qotur xəbərlərinin "oxunma" sayını artırasan ki, lider olasan. Həm də gecə-gündüz əlini qaldırasan göyə və deyəsən ki, "Ey yeri-göyü yaradan Allahım, sənə yalvarıram, elə et bir zamanlar hələ tələbə ikən jurnalistikaya gələndə cümlə qura bilməməyim, baş redaktorun "mənə belə reportyor lazım deyil, mənim yazmağı öyrətməyə vaxtım yoxdur" deyib qovması, məcbur olub gedib tolkuçkada özümü döydürməyim heç kimin yadına düşməsin". Allah da ki, yazıq bəndələrini ümidsiz qoymadığından təbii ki, səni eşidəcək, ta o vaxta kimi sən əndazəni aşmayasan. Elə ki, əndazəni aşdın, səni xatırlayan çox olacaq. Sən də çalış aşma da əndəzəni. Axı nəyinə lazımdır gedib kosmosda büro açırsan, elə həmin büroya xərclədiyini qoy cibinə NASA-nın internet saytını izlə də...İndi pis zəmanədir. Adamı gözü götürməyən çoxdur. Ona görə də, kimsə səndən 20 qəpik istəyəndə gərək deyəsən ki, "bağışla, amma mən elə indicə səndən 3 qəpik istəyəcəkdim". Bəs nə...Belə etməsən dərhal biləcəklər ki, əlin ya kiminsə cibindədir, ya da yatmış qara bəxtin oyanıb. Hər iki halda pisdir. Çünki həm bəxt küsə bilər, həm də cibin sahibi söz-söhbətə son qoymaq üçün sənin əlini kənara itələyə bilər. Cib axtaran o qədər əllər var ki...Ona görə də səbrli, təmkinli olmaq, özünü çox gözə dürtmək faydalı olmaz. Bax CNN, France-Presse, Reuters və başqaları gör necə ağır oturub batman gəlirlər,halbuki istəsələr Barak Obamanın özünə də bir mikrofon verib Ağ Evdən canlı reportaj hazırladarlar. Amma dilə-dişə düşmək istəmirlər. Nəticədə isə Bakıda baş verənlərdən dərhal xəbər tuturlar, halbuki bəziləri iddia edirlər ki, əlimizdə noutbuk yerdə bardaş qurub, neft daşlarından, konfrans salonlarından operativ xəbər veririk. Söz deməyə, icazə verilən yerdən şəkil çəkməyə nə var ki...Əsas odur ki, icazə verilməyəni çəkə biləsən, necə ki, "İdiot" yox a, "İdyot" onlayn gündəliyi Putinin hamıdan gizlədilən qızının fotosunu çəkdi, amma Bakıda Neft Akademiyasında baş verənləri son zamanlar bəyənmək istəmədiyimiz Türkiyə televiziyaları və xəbər agentlikləri ilk olaraq yaydılar. Halbuki onların nəinki kosmosda, heç Cırcırama kəndində də bürosu yoxdur. Bax gərək beləsindən öyrənəsən, həm də başını aşağı salasan ki, utanmasan da heç olmasa görənlər utandığını zənn edib desinlər ki, "ağac bar gətirəndə başını yerə əyər buna deyiblər" . Gərək kompüterində ən çox işlənən düymənin F5 olduğunu da heç kim bilməsin, hətta əlini saldığın cib sahibi də... Yoxsa halın fəna olar.
Amma neyləmək olar: nə day-day var, nə də qara bəxt....

Xanlar Xoca