Meşədə (Akutaqavaya oxşatma)

Tövbə zamanı Xozeyin nə dedi...

Adamı yaxşı tərəfdən göstərəndə ona ləzzət edir. Bahalı kostyumlarda, qalstuklarda özünə və ətrafdakılara sanballı, güvənli adam təsiri bağışlayırsan. Hətta ayaqlarını geniş aralayıb yüksək vəzifəli qonaqları qəbul etməyin də bu mənzərəni korlamır.
Müdrik və sanballı adam imici demək olar ki, artıq cəmiyyətin şüuruna yeridilmişdi, beyinlərin Ilboyu "yuyulması" nəticə verməyə bilməzdi axı. Və birdən Wikileaks!
Sən demə, bu yaramaz diplomatlar göründükləri kimi fərasətsiz deyilmişlər. Gör, necə oturub dinləyirlər, sonra da sakitcə qeydlər aparırlar. Yaraşıqlı kostyumlar və qalstuklardan, geosiyasi əhəmiyyətdən və qaz ehtiyatlarının əvəzsiz olması barədə yazmaq əvəzinə birdən-birə bu cür iyrənclik..
Burda hansı hislərdən söhbət gedə bilər? Elə bil ki, qəflətən kimsə sənin üstündən yorğanı götürdü və 9 milyon adam sənin tüklü ayaqlarını, o qədər də qəşəng olmayan bədənini, daha nə bilim nələrini gördü..
Eh, Wikileaks-dən əvvəl hər şey necə də yaxşı və sakit idi.. Amma indi.. get çirkabını təmizlə və sübut elə ki, günahkar deyilsən.
Yeri gəlmişkən, "Xaç atası" filminin bizim telekanallarda nümayişini qadağan etmək lazımdır.

Diplomat dindirmə zamanı nə dedi...

Mən nə yazmışam ki? Onlar nədən belə qəzəblənirlər? Bəlkə fikirləşirlər ki, biz koruq və onların hoqqabazlığına inanırıq? Əlbəttə, biz başa düşürük ki, siyasi məqsədəuyğunluq var. Odur ki, bütün dünyada bu cür rejimlərə əməkdaşliq etməliyik. Lakin heç kim sənə zəmanət verməyib ki, bütün həyatını firavan yaşayacaqsan və dünya ağzını açıb səni dinləyəcək.
Bəli, bizə neft və sabitlik, loyallıq və öncədən hər şeydən xəbərdar olmaq lazımdır. Ancaq fikirləşmə ki, sənin problemlərini biz həll edəcəyik. Sənin yerinə heç kim döyüşməyəcək və buna imkan yaratmayacaq. Bu, bizə lazım deyil. Necə bilirsən, elə də vəziyyətdən çıx, Serjiklə razılığa gəl və Sanninin taleyini unutma.
Əfqanıstanla İranın öhdəsindən sənsiz də gələrik. Gəlməsək də, cəhənnəm olsunlar. Düşünmə ki, bizi şantaj edə bilərsən. Sənə də, sənin atana da dəfələrlə deyiblər: sənin neftinə görə heç kimlə döyüşən deyilik.
Budur, bax, qonşun Mişa. Ağıllı adam olsa da, o, nə bizə, nə moskvalılara, nə də başqalarına qulaq asmaq istəmirdi. Axırı nə oldu?
Niyə hesab edirsən ki, bütün dünya sizi alqışlamalıdır, ən əsası nəyə görə? Yəni siz o qədər özünüzə vurgunsunuz ki, reallıq hissini tamamilə itirmisiniz?
Sənin ailən mənə ən çox Rza Pəhləvinin ailəsini xatırladır.

Hökumət naziri dindirmə zamanı nə dedi (Tadzemaru)

Amerikalılar ilə çəkilən şəkillərin hamısını cırmaq, ən yaxşısı isə yandırmaq lazımdır. Fərhad Əliyevə "qonaq" getməyə həvəs yoxdur. Ümumilikdə, amerikalılardan uzaq durmaq lazımdır. Amma ki, bizim pullarımız necə olsun? Nahaq vəsaiti ora yatırdıq. Götürsək, Wikileaks yayacaq, götürməsək, bizimkilər deyəcəklər ki, amerikalılara işləyirik. Dedilər də
isveçrəlilərlə işləyin!...
Bu amerikanlar da əclafdır, özlərini prinsipial kimi göstərirlər. Səudiyyə ərəbistanlıları ilə işləyərkən demokratiyanı unudurlar, amma öz maraqlarına qarşı nəsə edəndə dərhal azadlıqların boğulmasından danışırlar.
Bizimki isə tamam ağlını itirib. Hər rayonda, hətta Dubayda 9 villa sənin nəyinə lazımdır? Bütün banklar sizindir, neft, ölkə sizindir. Artıq hər şeyi zəbt eləmisiniz, özəlləşdirmisiniz, daha nə istəyirsiniz? Sakitləşin, bizə də rahat yaşamağa imkan verin də!
Düzünə qalsa, nəhayət, kimsə dedi - kral çılpaqdır!
Əslində bu Donald Lu ki var a, onu Azərbaycanın xalq yazıçısı elan etmək lazımdır.