XƏBƏRSIZLƏŞDIRMƏ AGENTLIYI

`Turan` ilə APA-nın, daha doğrusu, bu qurumların rəhbərlərinin arasında qarşıdurma yaranıb. Mehman Əliyevin qəzetdə geniş izahını oxuyanda isə xeyli təəccübləndim. Mehman müəllim kimə izah verir, kimi inandırmaq istəyir? Doğrudanmı bizim cəmiyyət o qədər aşınıb ki, gün kimi aydın həqiqətləri ona izah etmək lazımdır?!
APA-nın rəhbəri son vaxtlar tez-tez ona-buna peşəkarlıq dərsi keçməyə qalxır. Zatən, mən onun da peşəkarlığını müzakirə etmək istəmirəm. Axı peşəkarlığın bura nə dəxli var?! Peşəkar olmayanlar da gözəl başa düşür ki, Vüsalə xanımın rəhbərlik etdiyi strukturlar peşəkarlıq hədəfləri üçün yaradılmayıb. Orada çalışan bacarıqlı işçilər özləri də yaxşı bilir ki, bu agentliyin və onun ətrafındakı xəbər qurumlarının yalnız və yalnız bir məqsədi var. İctimaiyyəti əsl xəbərlərdən uzaq salmaq. Çaşdırmaq, hakimiyyətin yalanlarının dövriyyəsi üçün zəmin yaratmaq.
APA xəbərlərlə zəngindir, amma bu xəbərlər əsas xəbərlər deyil, üstəlik, əsas xəbərləri kölgələmək üçün yayılır. Bu bolluq əsas xəbərləri bolluqda itirmək üçündür. Ölkəni talayan bir oğru rejimin yalanını, cinayət əməllərini gizlətmək üçündür. Saxta seçkilərə seçki donu geyindirmək, irtijaya dövlət imici qazandırmaq üçündür. Ölkədəki gerçək durumu pərdələmək üçündür, imitasiyadır.
Sən demə, Rəqsanə Moskvada doğmayıb. Paho!!! Heç əkiz də doğmayıb. Bəlkə də ümumiyyətlə doğmayıb. İşə bir bax, Rəqsanə yalan danışıb! Yalan danışmaq isə yalnız Əliyevlər hakimiyyətinin təmsil edənlərin hüququdur. Başqalarına olmaz. Ölkə qanunlarını əkiz-əkiz pozanlar, ölkə sərvətlərini üçəm-üçəm oğurlayanlara isə pul saymaq üçün rahatlıq lazımdır. Xalq bu haqda düşünməli deyil. Ölkəni ağuşuna alan monopoliya və rüşvət pramidasının kəlləsinə dırmaşmaq olmaz. Heç Hacıbalanın müavinin də adını çəkmək olmaz. Xalq şouya baxmalı, intihar xəbəri oxumalı, Rəqsanənin doğub-doğmamasını müzakirə etməlidir. Uqandada çayın daşmasını izləməlidir. Xalq ictimai problemlər barədə düşünməməli, siyasətdən yalnız müxalifət liderlərinin dartışmasını eşitməlidir. (Elə indicə maraq məni lap üzdü - bəs görəsən bu Rəqsanə uşağına ad gününü harada keçirir?)
APA yaxşı işləyir, amma məhz bir məqsədlə işləyir. Xəbərsizləşdirməyə çalışır. Amma 100 APA da olsa, `Turan`ın pis hazırlanmış ictimai fayda daşıyan 10-ca xəbərinin yanından yel olub keçə bilməz. Çünki o 10 xəbərin daşıdığı ictimai həqiqət yükü APA-nın xəbər bolluğunda bilərəkdən gizlədilib, onların faydalılığı və zəruriliyi isə heç vaxt mübahisə mövzusu ola bilməz. Peşəkarlıqdan danışmaq istəmirəm, amma xəbər bülleteninin düzümü anlayışı var və bu haqda xəbəri olanlar, bilərəkdən kənarda qalan informasiyaların xüsusi çəkisini asanlıqla təsəvvür edə bilərlər.
APA-Ekonomiks var. Niyə bu peşəkar agentlik bananın müxtəlif ölkələr üzrə müqayisəli qiymətini yaymır? Bəs niyə statistikaya görə biz Ermənistandan iki dəfə az banan idxal edirik? Kəmaləddin müəllimlə Bəylər müəllim nə möcüzə qurub görəsən?
Neçə yerdən pul almaq sonrakı məsələdir, bir yerdən pul almağı etiraf etmək də bütün bunların yanında xırda bir məqamdır. Bir var bütöv bir ölkənin, sənin də aid olduğun bir xalqın əleyhinə olan layihə, bir də var bu və ya digər çatışmazlıqları olan bir agentlik. Axı heç kim iddia etmir ki, APA-dakılar peşəkar deyil. Kimsə də iddia etmir ki, qrantları effektsiz xərcləmirlər. Əsas məsələ kimin nə üçün işləməsindədir. İnsafən, APA da pis işləmir, nə üçün işlədiyini bilən qurumdur və bizim oğru hakimiyyətin media sahəsində ən uğurlu layihəsi də sayıla bilər, sayılmaya da bilər.
Onu da deyim ki, qəzet redaktoru üçün APA da faydalıdır, biləsən ki, oradan sənə nə lazımdır. Redaktorluğum bağlanmamışdan öncə burada çalışanların zəhmətini yüksək qiymətləndirirdim. Nəyi və necə istifadə etməyi bilməlisən. Bu hakimiyyətin öz pulu ilə görülmüş iş də onun əleyhinə ola bilir, bir az diqqətlə baxmaq lazımdır. Üstəlik, min bir oyun qursalar da, həqiqət gec-tez ortaya çıxır. Sızılıb gəlir. Qayalıqlardan süzülən bulaq kimi - Lazersfeld nəzəriyyəsi. Xəbəri mötəbərliyi isə onu kimin deməyindən də asılıdır - Hayder üçbucağı və Kiçik Frenj modeli. Həqiqət isə qiymətsizdir - Qabil Abbasoğlunun keçmiş dostu.