Türkiyə parlamenti ATƏT qrupunun sədri: �Bütün beynəlxalq iclaslarda Qarabağ problemimizi gündəmə gətiririk�

***

Turan: Türkiyənin regional və beynəlxalq terrorçuluğa qarşı mübarizəsində gəlinən mərhələni necə xarakterizə edərdiniz?

Avcı: Bu gün Türkiyə Böyük Millət Məclisinin təşəbbüsü ilə terrora qarşı regional əməkdaşlığın yollarını müzakirə edirik. Bu iclasın əsas xüsusiyyətlərindən biri budur ki, burada xalqların, millətlərin təmsilçiləri iştirak edirlər. Ona görə burada hər siyasi dünya baxışına mənsub millət vəkili iştirak edir. O baxımdan çox mənalı bir iclasdır. Açılışda da, ondan sonrakı iclaslarda da gördük ki, problemlərin çoxu müştərəkdir. Daha doğrusu hamı nələrin problem olduğuna dair həmfikirdir. Bu,çox mühümdür. Bundan da mühüm məsələ- bu problemlərin həlli ilə bağlı da hamı həmfikirdir. Çin, Rusiya, Əfqanıstan, Pakistan təmsilçilərinin hamısı Qərb ölkələrinin terrorizmi lazımi şəkildə qavramamasından şikayətçidirlər. Belə bir fikir hakimdir ki, terrorizm problemlərinin həllində Avropa və ABŞ digər o biri yarımkürədəki ölkələrlə lazımi dərəcədə əməkdaşlıq etmir. Şərq yarımkürəsi bu problemlərdən şikayətçidirsə, demək, burada daha çox kommunikasiyaya və müzakirəyə ehtiyac var. Kommunikasiya və müzakirə problemini həll etmək üçün əsas platformalardan biri BMT-dir. Ancaq təəssüf ki, BMT bugünkü strukturu ilə təkbaşına bu kokmmunikasiya və müzakirə probleminin öhdəsindən gəlməyə qadir deyil. Ona görə hörmətli prezidentimizin bütün platformalarda, xüsusilə BMT Baş Assambleyasında gündəmə gətirdiyi "Dünya 5-dən böyükdür" ifadəsinin həqiqət olduğunu buradakı çıxışlar da göstərir. Bilirsiniz ki, mən parlamentdəki ATƏT qrupunun sədriyəm. 10-12 aprel 2020-ci ildə ATƏT-in Türkiyədə mühüm bir iclasını keçirəcəyik. Sizin həmvətəniniz Azay Quliyevin təşəbbüsüylə ATƏT Parlament Assambleyasında yaradılan "İpək yolu dəstək qrupu" var. Axırıncı dəfə qrupun iclasını İsveçrədə keçirmişdik. 4-cü iclası apreldə İstanbulda keçirəcəyik. Azərbaycanla müştərək layihəmiz olan "Orta dəhliz"i də burada müzakirə edəcəyik. Ölkələrin bir-birinə daha sıx bağlanaraq əməkdaşlıq etməsi məsələsini "İpək yolu" çərçivəsində də müzakirə edəcəyik. Sizin vasitənizlə bunu da anons edirəm.Buna görə sizə də təşəkkür edirəm.

Turan: Biz sizə təşəkkür edirik. Milli təhsil naziri ikən FETÖ-nün xaricdəki məktəblərinin bağlanması üçün çox iş görmüşdünüz. Hətta bir dəfə sizinlə söhbət edərkən demişdiniz ki, sabah hörmətli prezidentlə Bakıya gedib məsələni kökündən həll edirik. Keçmiş nazir kimi o sahədəki prosesləri təqib edə bilirsinizmi?

Avcı: Biz Türkiyədə o işləri qəti şəkildə həll etdik. Bilirsiniz ki, Maarif vəqfi yaradıldı və Afrikanın, Asiyanın bir çox ölkəsində o məktəblər vəqfə verildi. FETÖ-nün necə təhlükəli bir təşkilat olduğunu və olacağını hələ də fərq etməyən bəzi ölkələr var. İnşallah onlar da başlarına pis işlər gəlmədən bu işlərlə bağlı lazımi addımları atarlar.

Turan: Mərhum professor Nevzat Yalçıntaş Türkiyə parlamenti ATƏT qrupunun sədri ikən Azərbaycanın işğal altındakı torpaqları və Qarabağ məsələsini daim gündəmdə saxlayırdı. Bu məsələ ilə bağlı sizin də eyni xətti davam etdirəcəyinizə əminik. Nə demək istərdiniz?

Avcı: ATƏT Parlament Assambleyası da daxil olmaqla, biz bütün beynəlxalq təşkilatlarda Qarabağ problemimizi gündəmə gətiririk. Hətta ATƏT PA-nın 15 gün əvvəl Mərakeşdə keçirilən iclasında biz ermənilərə və yunanlara cavab verməkdən gündəmin əsas maddələrini müzakirə edə bilmədik. Bu, bizim vəzifəmizdir, bu sahədəki fəaliyyətimizi eyni qərarlılıqla davam etdirəcəyik.