Həlak olmuş əsgərlərin valideynləri ədalətsizlikdən narazılıq edirlər

Övladları hərbi xidmətdə dünyasını dəyişən bir qrup valideyn bazar ertəsi RATİ-də mətbuat konfransı keçirib. 

Tədbirə 2010-2012-ci illərdə hərbi xidmətdə vəfat edən əsgərlər İsmayıl İbayev, Elxan Əzizov, Pərviz İskəndərlinin valideynləri qatılıblar. Valideynlər övladlarının ölüm işlərinin düzgün araşdırılmamasından narazılıq ediblər. 

Valideynlər bu ölümlərin heç birinin bir təsadüf olmadığını iddia ediblər. Onların fikrincə, bu ölümlərin arxasında iri çinli hərbi məmurlar durur. Valideynlər bu fikirlərinə əsas kimi bu ölümlərlə bağlı istintaqın, daha sonra məhkəmə prosesinin həqiqəti əks etdirməməsini əsas gətiriblər. Onların fikrincə, istintaq həqiqi günahkarları aşkar etməyib, sadəcə “arxasız” olan hansısa əsgərləri bu cinayətin günahkarları kimi tanıdıb. Məhkəmə prosesində müttəhim əsgərlər bu ölümlərin baş verməsi haqda həqiqəti söyləsələrə də, onların ifadələrinin nəzərə alınmamasına diqqət çəkilib. 

Əsgər İ.İbayevin və P.İsgəndərlinin valideynləri oğullarının daxili orqanlarının çıxarıldığını iddia ediblər. E.Əzizov və S.Məmmədovn valideynləri isə Daşkəsnədəki məşhur hadisənin ört-basdır edildiyini nəzərə çatdırıblar. 2010-cu ildə buradakı hərbi hissələrin birində 5-6 ölüm hadisəsi olmasına baxmayaraq, həbs edilən müttəhimlərin rüşvət, iqtisadi mənimsəmə faktlarına görə ittiham olunduqlarını deyiblər. Belə haqsızlıqlarla üzləşən bir çox valideynlərin buna dözməyərək dünyalarını dəyişdirdikləri yada salınıb. Övladları hərbi xidmətdə dünyasını dəyişən 16 valideyn bu il mayın 3-də dövlət başçısına müraciət etsə də, hələ də cavab almayıblar. Valideynlər müraciətlərində övladlarının ölümlərilə bağlı yalnız ədalətli araşdırma tələb etdiklərini nəzərə çatdırıblar.

Valideynlərin fikrincə, bu məsələdə əsas günahkar müdafiə naziri və həbri prokurorluqdur. Belə ki, Müdafiə Nazirliyi orduda bu ölümlərin qarşısını almaq üçün təsirli tədbirlər görmür, prokurorluqsa istintaq araşdırmalarını düzgün aparmır. Bu ilin ötən 5 ayında hərbi xidmətdə 43 əsgərin öldüyü və bu ölümlərdən 35-nin qeyri-döyüş itkiləri olduğu xatırladılıb. Valideynlər bu göstəricini orduda sağlam mənəvi durum olmaması kimi dəyərləndiriblər. Bu vəziyyətdən çıxış yolu kimi valideynlər orduda islahatlar aparılmasının zəruri olmasına diqqət çəkiblər. İstintaq işlərini düzgün araşdırmadığı üçün hərbi prokurorluğun ləğv olunması, mülki prokurorluqlar nəzdində bu işi aparan xüsusi bir struktur yaradılması zərurəti nəzərə çatdırılıb. -05C-