İcbari tibbi sığorta sistemi necə işləyir?

Bakı/16.09.21/Turan:  Bu ilin aprelindən Azərbaycanda icbari tibbi sığorta sistemi tətbiq edilib. Rəsmi məlumatlara görə, ölkə əhalisi icbari tibbi sığorta xidmətləri paketinə daxil olan 2550 növ xidmətdən istifadə edə bilər.

Lakin çoxları şikayət edir ki, yarım il keçsə də, hətta ən adi tibbi xidmət əlçatmaz qalır.

Belə ki, adamlar şikayət edirlər ki, bəzən qeydiyyatda olduqları klinikada bəzi analizləri vermək mümkün olmur, bəzi analizlərə görə  pul ödəməlidirlər.

Bundan əlavə, dövlət klinikalarında ALT və AST analizləri aparılmır və onları özəl klinikalarda vermək lazım gəlir.

Vətəndaşlar şikayət edirlər ki, dövlət klinikalarında deyirlər ki, icbari tibbi sığortanın tətbiqi "hələ başlamayıb".

İcbari Tibbi Sığorta üzrə Dövlət Agentliyindən Turan-a bildiriblər ki, əgər vətəndaşlar bu cür problemlərlə üzləşsələr, agentliyin 1542 nömrəli Çağrı Mərkəzinə müraciət edə və ya agentliyin saytında "Elektron ərizə" bölməsinə yaza bilərlər. İcbari tibbi sığorta vətəndaşlara pulsuz tibbi xidmət göstərmə sistemidir. Sağlamlıq sığortası bütün ölkəyə şamil edilir və vətəndaşlar əlverişli yolla tibb müəssisələrinə müraciət edərək xidmətlər paketinə daxil olan xidmətlərdən pulsuz istifadə edə bilər.  Agentliyin məlumatına görə, bu ilin ilk altı ayında 2 milyon 74 min 276 vətəndaşa 9 milyon 234 min 527 tibbi xidmət göstərilib. "Bu müddətdə müalicə müəssisələrinə, onların şöbələrinə və Müalicə-Diaqnostika mərkəzlərinə 4 milyon 411 min 676 müraciət daxil olub", - qurumdam bildiriblər.

İcbari tibbi sığorta üzrə xidmət almaq üçün vətəndaş poliklinikaya müraciət etməlidir. "Ərizə verdikdən sonra vətəndaş müayinədən keçir. Təkrar müayinə və ya müalicə zərurəti yarandıqda onu əlavə müayinəyə və ya ambulator, yaxud stasionar müalicəyə göndərirlər", - qurumdan qeyd ediblər.

Tibb üzrə fəlsəfə doktoru Vasif İsmayıl Turan-a bildirib ki, icbari tibbi sığortanın tətbiqindən yarım il keçsə də, vətəndaşlar və həkimlər hələ də ona tam etibar etmirlər. "Sistem tam gücü ilə işləmir", - İsmayıl deyib.

Onun sözlərinə görə, ölkədə icbari sığorta sistemi tədricən yaxşılaşacaq. Amma bundan ötrü kardinal dəyişikliklər lazımdır. O qeyd edib ki, kosmetik islahatlarla heç nəyi dəyişmək mümkün olmayacaq. –06D-