"İstək" liseyləri bağlanır

Bakı/11.07.18/Turan: Bir həftədir ki, "İstək" liseylərinin pedaqoji kollektivi və şagirdləri həyəcanla gözləyirlər. Azərbaycanda 12 belə lisey var, bunların 4-ü paytaxtda, qalanları ölkənin regionlardadır. Beləliklə, 2000-dən çox şagirdin valideynlərini də əlavə etsək, narahat olanların sayı çoxdur.

Onlar Təhsil Nazirliyindən sözügedən təhsil müəssisəsinin gələcək taleyi ilə bağlı cavab gözləyirlər. Bir müddət əvvəl "İstək" liseylər şəbəkəsinin təsisçisi ölkənin baş təhsil idarəsinə bu təhsil müəssisəsinin fəaliyyətinin dayandırılması haqqında qərar qəbul edilməsi üçün müraciət edib. Məktubda lisey müəllimlərinin işə düzəlməsinə, şagirdlərin başqa məktəblərə keçirilməsinə və gənc istedadların təhsili davam etdirmələri üçün şərait yaradılmasına yardım etmək xahişi yer alır. Yeri gəlmişkən, ötən il Hindistanda keçirilən Qlobal Sahibkarlıq Sammitinin ən gənc startap-iştirakçısı Reyhan Camalova da burada oxuyur. O, yağış enerjisini elektrik enerjisinə çevirən cihaz düzəldib və bu ixtirasına görə mükafat alıb.

Adı hamıya tanış olan "İstək" liseylərinin bağlanması haqqında məlumat partlayan bomba effekti yaradıb. Söhbət biznes qurumundan, oliqarxlardan getsəydi, rəqiblərin fitnələrindən, monopoliya sahələri uğrunda mübarizədən danışmaq olardı. Amma ölkənin təhsil bazarında hələlik sabitlikdir, tibb, inşaat və ticarət sahəsindən fərqli olaraq, amansız rəqabətdən danışmaq üçün əsas yoxdur. Xüsusilə, bir həftə əvvəl lisey administrasiyasının növbəti tədris ili üçün müqavilələrin uzadılması və təhsil haqqının əvvəlcədən ödənilməsi üçün şagirdlərin valiydenlərinə zəng etməsi ilə əlaqədar bu qərar qəribə görünür.

Və birdən-birə, aydın səmada ildırım kimi, "İstək" bağlanır. Valiydenlər bir neçə gün ərzində onları fakt qarşısında qoyan liseylər şəbəkəsinin təsisçisi və təhsil müəssisələrinin müdriyyəti ilə görüşməyə çalışıblar. Holdinqin bütün rəhbərliyi, digər menecerlər səssizliyi qoruyur, valideynlərlə, xüsusilə də jurnalistlərlə hər hansı əlaqədən imtina edirdilər.

Turan-ın müxbirinin Bakı "İstək" liseyinin direktoru Samir Şəmiyevlə əlaqə saxlamaq cəhdləri uğursuz olub. Bu mövzuda şərh vermək xahişini çətinliklə eşidən xəttin digər ucundakı şəxslər gah lisey rəhbərliyinin olmadığını, gah nə vaxt başa çatacağı məlum olmayan təcili müşavirə olduğunu bildiriblər.

Amma yenə də materialın müəllifi anonimlik şərti ilə lisey müəllimlərindən biri ilə söhbət etməyə müvəffəq olub.

"Bizim üçün bu xəbər pis gözlənilməzlik oldu. Hələlik liseylərin bağlanmasının səbəbləri ilə bağlı rəsmi bəyanat yoxdur. Amma bizə bildiriblər ki, əsas səbəb maliyyə problemləridir. Müəllimlərin və texniki işçilərin əmək haqqı, cari təmir xərcləri ilə yanaşı, başqa şəhərlərdən gələn istedadlı şagirdlər üçün Bakıda mənzil kirayəsi və onların qidalanması xərcləri də var. Administrasiya onlar üçün döşənmiş ev tutur ki, bu da ucuz deyil. Bu gün 12 liseydə 2000 şagird təhsil alır. Valideynlər onların təhsil haqqını müntəzəm şəkildə ödəyir. Bakıda illik təhsil haqqı 7000 manatdan10 000 manata qədər, regionlarda illik 4000 manatdır. Amma görünür, bu vəsait fəaliyyətin davam etdirilməsinə kifayət etməyib", deyə Turan-ın həmsöhbəti bildirib.

"İstək" liseyləri ətrafındakı vəziyyət qəfildən və kortəbii olaraq yaranmayıb. Onlar Azərbaycanda 1990-cı illərin əvvəllərində təsis edilib, o zamanlar "Dədə Qorqud" adlanırdı və "Çağ Öyretim" qrupuna - Türkiyə ilahiyyatçısı Fətullah Gülənin rəhbərlik etdiyi Hizmet hərəkatının himayəsi altında olan qlobal təhsil şəbəkəsinə daxil idi. Amma beş il əvvəl Türkiyədə Gülən tərədarlarının təqibi başlayıb. Təşəbbüs Azərbaycan hakimiyyətini də əhatə edib. Onlar dərhal qovulub. Elə həmin vaxt "Çağ Öyretim" qrupunun həyatında da "qara çağ" başlayıb. Özəl türk liseylərinin adını "İstək" olaraq dəyişdirməli olublar. Amma bu, vəziyyətdən çıxış yolu olmayıb: liseyə müraciət edənlərin sayı azalmağa başlayıb. Yüksək ixtisaslı pedaqoqların təhsil müəssisəsini tərk etməyə başlaması ən pisi idi. Nəticədə "İstək" liseylərinin məzunlarının göstəriciləri pisləşməyə başlayıb.

Dövlət İmtahan Mərkəzinin məlumatına görə, 2011-ci ildə "Dədə Qorqud" liseyləri ölkənin ən yaxşı ümumtəhsil məktəbləri reytinqinə daxil idi, bu liseylərin məzunları ali məktəblərə qəbul imtahanlarında yüksək bal yığırdılar. Şagirdlər beynəlxalq olimpiadalarda iştirak edir və medallar qazanırdılar. Əvvəlki bir neçə il üçün hesabatlarda adı "İstək" olaraq dəyişdirilmiş liseylər bu reytinqə ümumiyyətlə düşməyib, bu da bu müəssisələrdə şagirdlərin təhsil səviyyəsinin düşdüyünü göstərir. Valideynlər övladları üçün artıq başqa məktəb və liseylər seçirdilər.

Turan-ın mənbəyinin sözlərinə görə, "İstək" liseylərinin kollektivləri Təhsil Nazirliyinin vəziyyətdən çıxış yolu tapacağına, bu təhsil müəssisələrinin bağlanmasına imkan verməyəcəyinə ümid edirlər. Liseylərin maliyyələşdirilməsini üzərinə götürə biləcək sponsor axtarışı mühüm vəzifədir.

Bu arada, nazirlikdə şagirdlərin və pedaqoji kollektivin başqa təhsil müəssisələrinə paylanması üçün işçi qrup fəaliyyət göstərir. Şagirdlərin və onların valideynlərinin nəzərinə çatdırılıb ki, şagirdlərin seçimi əsasında müvafiq təhsil müəssisələrində təhsili davam etdirməsi, habelə bu məktəbdə işləyən pedaqoqların istəyindən asılı olaraq onların başqa təhsil müəssisələrinə paylanması üçün şərait yaradılacaq. -0-