Media-icmal 18.07.2016

İddia: Bütün dünyada cəlbedici ölkə            

“Azərbaycan” qəzeti “Regionlar iqtisadi üc amilə çevrilir”  (http://www.azerbaijan-news.az/index.php?mod=3&id=101255) sərlövhəli məqalə ilə çıxış edib. Məqalə ölkədə iqtisadi inkişafda olan regionların əhəmiyyətini göstərməkdir.

Müəllif  Nazirlər Kabinetinin 2016-cı ilin birinci yarımilinin iqtisadi nəticələrinə dair bu günlərdə  keçirilən iclasında dövlət başçısı İlham Əliyevin reğionların inkişafı ilə bağlı proqramların həyata keçirilməsindən danışır. Bununla bağlı dövlət başçısı deyib: “Azərbaycan böhran şəraitində inkişaf edir və hər bir sahədə konkret proqramlar var. 2016-cı ilin birinci yarısındakı nəticələr göstərir ki, bu il də uğurla başa vurulacaq”. Daha sonra müəllif regionlarda fəaliyyət göstərən iş adamlarına verilən kreditlər,  bu kreditlərin reğionların inkişafına xidmət edəcəyini bildirir. Məqalədə aqrar sahə ilə yanaşı ölkənin hər bir rayonunda sənayeni inkişaf etdirmək potensialı olduğu iddia edilir.

Məqalənin əksər hissəsi son 6 ayda İ.Əliyevin regionlara səfərlərinə həsr edilib.

Müəllif dövlət başçısının regionlara səfərlərini ümumilikdə belə dəyərləndirir: “ Son 6 ayda dövlət başçısının bölgələrə səfərləri bir daha sübut edir ki, Azərbaycan prezidenti regionların sosial-iqtisadi inkişafına çox ciddi diqqət yetirir”.

Müəllifə görə, regionlarda infrastrukturun yaxşılaşdırılması Azərbaycanın nəinki regionda, hətta dünyada cəlbedici ölkəyə çevrilməsinə şərait yaradıb.

Ekspert: “Bu, hər an ola bilər” 

“Azadlıq” qəzeti ekspert Nemət Əliyevin büdcənin durumu ilə bağlı şərhini diqqətə çatdırır. (http://www.azadliq.info/146914.html). Müəllifin şərhi onun Facebook səhifəsindən götürülüb.

Ekspert büdcənin gələcək taleyi ilə bağlı proqnozlar da tərdim  edərək deyir: “Kütləvi istehlak mallarının qiymətləri hər an qaldırıla bilər, çünki dövlət büdcəsinin gəlirləri kəskin şəkildə azalıb”.

Müəllif  deyir ki, may ayında əlavə dəyər vergisi (ƏDV) üzrə büdcəyə daxilolmalar yanvar ayının faktiki göstəricisi ilə müqayisədə 33,4% azalıb. Aprel ayında bu göstərici daha 5%-dən çox pisləşib. ƏDV-nin büdcə daxilolmalarında payı 22%-ə yaxındır.

N.Əliyev bildirir ki, mənfəət vergisi üzrə büdcəyə daxilolmalar yanvar ayı ilə müqayisədə 3 dəfə azalıb. Müəllif xatırladır ki, aprel ayında mənfəət vergisi üzrə büdcəyə daxilolmalar 2 dəfədən çox artmışdı. “Görünür, sahibkarlar Vergilər Nazirliyinin bu yükünü çəkə bilməyib. Odur ki, may ayında bu vergi üzrə büdcəyə ödəmələr sürətlə azalıb, hətta yanvar səviyyəsindən də 29% aşağı düşüb.

Müəllif deyir ki, “digər daxilolmalar” kateqoriyası büdcədə ən böyük paya malikdir. Bu kateqoriya  üzrə büdcəyə yığılan pul mayda yanvara nəzərən 83% azalıb. Dövlət büdcəsinin ümumi gəlirləri mayda 45%-dən çox azalıb, iyun ayında durum daha da pisləşib.

Hökumət büdcəni doldurmağı düşünür

“Yeni Müsavat” qəzeti deputat Vahid Əhmədovla müsahibə dərc edib http://musavat.com/news/musahibe/vahid-ehmedov-indiki-sheraitde-bashqa-chixish-yolu-gormurem_363737.html. 

Müsahibədə son günlər Türkiyədə baş verən olaylara yer verilib. Amma əsas diqqət elə elektrik enerjisi tariflərinin qaldırılması fonunda ölkədəki iqtisadi durumun analizidir. 

Deputat elektrik tarifinin qaldırılması ilə bağlı deyib ki, “neftin qiymətinin kəskin aşağı düşməsi, manatın iki dəfə devalvasiyaya uğraması, digər problemlər hökuməti bu addımı atmağa məcbur etdi”. O, son 12 ildə iqtisadiyyatın inkişafı istiqamətində gərəkli addımların atılmadığını ifadə edir.

“2004-cü ildə “Gülüstan” sarayında regionların iqtisadi inkişafı ilə bağlı konfransda cənab prezident hökumətin qarşısında iki məsələni həll etmək tapşırığını qoymuşdu: ərzaq təhlükəsizliyinin təmin edilməsi və qeyri-neft sektorunun inkişafi. Artıq 12 il keçib. Ötən 12 il ərzində çox şey etmək olardı. Qeyri-neft sektorunu elə bir səviyyəyə gətirib çatdırmaq olardı ki, biz heç elektrik enerjisindəki qiymət artımına fikir verməzdik”.

Deputat vurğulayıb ki, hökumət bütün diqqətini büdcəyə pul gətirməyə yönəldib.

“Hökumətdəkilər çıxış yolu axtarırlar ki, hansı addımı atsalar, büdcəyə əlavə vəsait gələr. Mən indiki şəraitdə başqa çıxış yolu görmürəm. Çünki vaxtında bu işlər görülsəydi, tədbirlər həyata keçirilsəydi, indiki şərait yaranmazdı. Mən demişəm, bu dəqiqə bütün dünyada alternativ enerjidən istifadə edilir. Sumqayıtda günəş batareyaları istehsal edən böyük bir zavod tikilib. Azərbaycanda çox sayda  hündürmərtəbəli binalar tikirlər. Niyə o binalarda həmin günəş batareyalarından istifadə etmirlər? Həmin batareyalar xaricə satılır, amma Azərbaycanda çox az səviyyədə istifadə olunur. Hökumət külək, günəş, su enerjisi ilə bağlı məsələlərə baxmalıdır”.

Deputat müsahibəsində ölkə başçısının ötən həftə gündəmə gətirdiyi məsələyə - torpaqların məmurlar tərəfindən mənimsənilməsinə də toxunub.

“Məmurlar - külli miqdarda torpağa sahib oldular. 200, 300, 500 hektar torpağa sahib olan insanlar var. Məndə məlumatlar var ki, Qubada 200-300 hektar torpaq alan şəxslər var, ancaq o torpaqlar istifadə olunmur. Özü də zəbt olunan təkcə əkinə yararlı ərazilər deyil. Yaylaqlar var ki, illərdir zəbt olunub”, - deputat qeyd edib.