Məktəb binalarının dağlması səbəbi nədir?

Bakı/22.04.22/Turan: Aprelin 20-də Bərdə rayonu Mehdili kənd tam orta məktəb binasının bir hissəsi uçub. Hadisə dərs zamanı baş verib və xoşbəxtlikdən xəsarət alan olmayıb.

Ötən ilin oktyabrında idman zalının bir hissəsi uçan bu məktəbdə elə ötən il təmir işləri aparılıb və o dərslərin keçirilməsi üçün təhvil verilib. Lakin bu dəfə məktəbin divarı uçub.

Bu, ilk belə hadisə deyil. Martın 31-də Cəlilabad rayonun Musalı kənd məktəbin sinif kimi istifadə olunan dəhlizinin divar və döşəməsinin bir hissəsi uçub. Məktəb 1969-cu ildə tikilib və heç vaxt əsaslı təmir olunmamışdı.

Yanvarın əvvəlində isə Ucarın Təzə Şilyan kənd tam orta məktəbin arxa otaqlardan birinin tavanı çökmüşdü. Hadisə nəticəsində ikinci mərtəbədən mişar daşları otağa tökülmüşdü. Həmin məktəb 2000-ci ildə tikildiyi bildirilir.

Azərbaycanda bəzi məktəblər niyə bu vəziyyətdədir?

Maliyyə Nazirliyinin məlumatına görə, 2022-ci ildə Təhsil Nazirliyi üzrə mərkəzləşdirilmiş alış və xidmətlər, əsaslı və cari təmir və digər tədbirlər üçün 537,5 milyon manat vəsait ayrılıb.

Təhsil Nazirliyindən Turana bildirilib ki, Azərbaycanın bütün şəhərlərində və rayonlarında tam yararlı olmayan məktəb binaları var. «Bu binaların sayı təxminən 900-ə yaxındır. Bu məktəblərin bəzilərinin əsaslı təmirə, bəzilərinin qəzalı olduğu üçün sökülüb-tikilməyə ehtiyacı var».

Qurumdan qeyd olunub ki, Təhsil Nazirliyi tərəfindən bunun planlı şəkildə araşdırılması aparılır. «Bütün məktəblərin eyni ildə, eyni anda düzəldilməsi mümkün deyil, maliyyə yükü böyükdür. Bu yalnız addım-addım ola bilər. Hər 4 məktəbdən üçü təhsilə yararlı vəziyyətdədir».

Bildirilib ki, dövlət başçısının müvafiq sərəncamları və tapşırıqları ilə Azərbaycanda hər il təxminən 100-ə qədər yeni məktəb istifadəyə verilir. «Heydər Əliyev Fondu tərəfindən də məktəblər tikilir».

Nazirlikdən vurğulanıb ki, 2021-ci ildə Heydər Əliyev Fondunun təşəbbüsü və dəstəyi ilə ölkə üzrə 12, Bakı Şəhər İcra Hakimiyyətinin sifarişi ilə 3, Mənzil İnşaat Dövlət Agentliyinin sifarişi ilə 2, Qaçqınlar və Məcburi Köçkünlərin Sosial İnkişaf Fondu sifarişi ilə 1 təhsil müəssisəsi inşa və əsaslı təmir olunaraq müəllim və şagirdlərin ixtiyarına verilib. «2021-ci ildə Təhsil Nazirliyi tərəfindən 69 təhsil müəssisəsi tikilib və əsaslı təmir edilib. Onlardan 29-da tikinti, 9-da əsaslı təmir işləri görülüb, o cümlədən, 1 peşə mərkəzi tikilib, 31 modul tipli məktəb quraşdırılıb».

Təhsil məsələlər üzrə ekspert Kamran Əsədov isə bildirib ki, bu çox ciddi bir problemdir. «Bir məktəbin bir il ərzində 2-3 dəfə dağılması onu göstərir ki, tikinti işləri ciddi qüsurlarla həyata keçirilir. Bulavasitə bu işlə məşğul olan şəxslər ciddi şəkildə qanun pozuntuları törədirlər. Bu, Nazirlər Kabinetinin 171 saylı qərarın ciddi şəkildə pozulmasıdır».

Ekspert hesab edir ki, orta təhsil məktəblərində tikinti və təmir işləri xüsusi nəzarətə götürülməlidir. «Çünki bu istiqamətdə ciddi şəkildə yeyintilərin oıması ehtimal olunur. Burada çox ciddi şəkildə keyfiyyətsiz xidmətlərin göstərilməsi var».

Onun fikrincə, bu məsələdə ciddi nəzarət mexanizmi olmalıdır. «Tikinti normaları var. Məktəblər azyaşlı uşaqların məkanıdır və hər bir məktəbin inzibati binası tikiləndə ən azı bu 20-30 illik küləyə, yağışa və bütün kənar müdaxilələrə davamlı olaraq tikilir. Fərq etmir bu tikinti və ya təmirdir. İş keyfiyyətli olmalıdır».--0-