Vergilər Nazirliyi 2019-cu ildə fiziki şəxslər tərəfindən sosial ayırmaların ödənişi məsələsinə aydınlıq gətirib

Bakı/29.11.18/Turan: Vergilər Nazirliyi mülki-hüquqi xarakterli müqavilələr üzrə, həm də sahibkarlıq subyekti qismində çalışan fiziki şəxslərin sosial sığortaya cəlb edilməsi məsələsinə aydınlıq gətirib. Sosial sığorta ödənilşləri üzrə qanunvericiliyə gözlənilən dəyişikliklər cəmiyyətdə müxtəlif fikirlərə səbəb olub.

Vergilər Nazirliyi qeyd edir ki, mülki-hüquqi xarakterli müqavilələr əsasında çalışan şəxslərin gəlirlərindən ödəmə mənbəyində 25 faiz dərəcə ilə sosial sığorta haqqı tutulacaq. "Bu şəxslər vergi orqanlarına uçota alınmayan şəxslərdir və onların müqavilələri üzrə vergi ayırmalarını işəgötürən ödəyir. Lakin həmin subyektlərin öz işini fərdi sahibkar kimi davam etdirərək başqa metodla sosial ayırmalar ödəmək haqqı var", - nazirliyin nümayəndəsi Şahin Məmmədov Turan-a bildirib.

2019-cu ildən vergu uçotunda duran fiziki şəxslər üçün sosial ayırmaların differensiallaşdırılmış ödənişi tətbiq edilir. Tikinti və ticarət sahəsində sahibkarlıq fəaliyyəti ilə məşğul olan fiziki şəxslər minimum əməkhaqqının 50%-i həcmində - 65 manat, digər şəxslər 25% - 32,50 manat ödəyəcəklər. Minimum əmək haqqı 130 manatdır.

Qeyd edək ki, hazırda sahibkarlıq fəaliyyətinin həyata keçirildiyi yerdən asılı olaraq (Bakı və regionlar) sosial ayırmalar üzrə fərq var. Bundan əlavə, həmin ayırmalar üzrə dərəcələr minimum əməkhaqqının 20%-ni təşkil edir.

Vergilər Nazirliyi hesab edir ki, sosial sığorta ödənişləri sahəsində yeniliklər sahibkarlıq fəaliyyətinin artmasına, iş yerlərinin leqallaşmasına gətirib çıxaracaq.

Fiziki şəxslər üçün mənfəət vergisini ümumi gəlirin 4%-dən 2%-ə azaltmaq planlaşdırılır. --08D--