Azərbaycanın AŞ-a üzvlüyünün alternativi yoxdur � vətəndaş cəmiyyəti

Bakı/06.11.17/Turan: "Azərbaycan və Avropa Şurası arasında münasibətlər: bizi nə gözləyir?" - noyabrın 5-də NİDA Hərəkatının Müsavat Partiyasının qərargah mənzilində təşkil etdiyi ictimai müzakirələrin mövzusu belə idi.

Azərbaycan və Avropa Şurası arasınakı gərginlik və rəsmi Bakının təşkilatdan çıxma mümkünlüyü haqqında bəyanatı müzakirə olunub, deyə NİDA fəalı Əbülfəz Qurbanlı bildirib.

Bununla belə, o qeyd edib ki, hakim düşərgədə də bu məsələ ilə bağlı fikir ayrılıqları var. Belə ki, xarici işlər nazirinin müavini Mahmud Məmmədquliyev və deputat Zahid Oruc AŞ-da qalma zərurətini qeyd ediblər.

NİDA hərəkatı hesab edir ki, Azərbaycan öz öhdəliklərini yerinə yetirərək, AŞ-da qalmalıdır, deyə Qurbanlı bildirib.

Demokratik Təşəbbüslər İnstitutunun rəhbəri Akif Qurbanlı Azərbaycanın AŞ qarşısında öhdəliklərini beş qrupda təsnif edib.

"Birincisi Qarabağ problemini sülh yolu ilə həll etməkdir. İkincis AŞ-ın bütün konvensiyalarını qəbul etmək, üçüncüsü yerli qanunvericiliyi Avropa standartlarına uyğunlaşdırmaq, dördüncüsü - bu, çox vacibdir, - insan hüquqlarına hörmət etməkdir. Və nəhayət, beşincisi yerli demokratiyanı təmin etmək, bələdiyyələrin səlahiyyətlərini genişləndirmək, paytaxt da daxil olmaqla, seçimli mer vəzifəsini tətbiq etməkdir", deyə Akif Qurbanlı qeyd edib.

Onun sözlərinə görə, bir çox öhdəliklər yerinə yetirilmir və bunlardan biri də, ilk növbədə, AİHM-nin ReAl lideri İlqar Məmmədovun işi üzrə qərarıdır ki, o, hələ də həbsdədir.

Akif Qurbanlı hesab edir ki, hakimiyyət hazırki vəziyyətdə vaxt udmağa çalışacaq. Onun fikrincə, hakimiyyətin ölkənin AŞ-da gələcək iştirakı haqqında ziddiyyətli bəyanatları da bununla bağlıdır.

Müsavat Partiyasının sədr müavini Elman Fəttah hesab edir ki, AŞ-ın tələbləri və Azərbaycanın maraqları arasında ziddiyyət yoxdur. Onun fikrincə, Bakı və Strasburqun münasibətlərində gərginliyə hakimiyyətin şəxsi maraqları səbəb olub. Dünya trendi təcrid deyil, əməkdaşlıq, şəffaflıqdır.

Fəttah Azərbaycanın konseptual sənədlərində avrointeqrasiyanın əsas götürüldüyünə diqqət çəkib. Buna görə də "erməni lobbisinin fitnələri" və ya "xristian klubları" haqqında iddialar əsassızdır.

Fəttah Azərbaycanın Avropa Şurası qarşısında seçkilər və yerli demokratiya sahəsindəki öhdəliklərini yerinə yetirməməsinə diqqət çəkib. Hakimiyyət seçki komissiyalarında müstəqil üzvlərin iştirakı öhdəliyinə riayət etmir. Yerli İdarəetmə haqqında Xartiya ratifikasiya olunsa da ona riayət olunmur. Şəhər merlərinin seçimləri də keçirilmir. "Səbəb sadədir - harada ki, söhbət seçkilərdən gedir, hakimiyyət müqavimət göstərir", deyə Fəttah qeyd edib. -06D-