İsa Qəmbər: “Hakimiyyətin azad seçkilər keçirmək üçün iradəsi yoxdur”

Bakı/07.04.21/Turan:  Ölkədə azad, ədalətli və demokratik seçkilərin keçirilməsi üçün əsas maneə hakimiyyətin siyasi iradəsinin olmamasıdır. Bu fikri Milli Strateji Düşüncə Mərkəzinin rəhbəri İsa Qəmbər "Amerikanın səsi"nə müsahibəsində ABŞ Dövlət Departamentinin Azərbaycanda insan haqlarının vəziyyətilə bağlı tənqidlərini şərh edərkən deyib.

"Ən pisi odur ki, seçkidən seçkiyə vəziyyət nəinki yaxşılaşmır, hətta pisləşir. 2020-ci ilin fevralında keçirilmiş son növbədənkənar parlament seçkilərində də iştirakçılar üçün bərabər imkanlar yox idi.

Bütün göstəricilər üzrə inzibati resursdan hakim partiyanın və hakimiyyətyönlü namizədlərin dəstəklənməsi üçün istifadə edilib. Real müxalifətə, xüsusilə də seçkilərdə iştirak edən Müsavat Partiyasına qarşı son dərəcə ayrı-seçkilik olub", - İsa Qəmbər bildirib.

60-dan çox dairədə namizədləri olan partiyalara seçkiqabağı təşviqat üçün qanunla pulsuz efir vaxtı təyin edirlər. Müsavat Partiyasını pulsuz efirdən məhrum etmək üçün bu partiyadan yalnız 59 namizəd qeydə alınıb.

"Ödənişli efir vaxtı çox bahalı idi. Mahiyyətcə, televiziyada heç bir debat olmayıb. Hətta hakim partiya da efir vaxtından imtina edib ki, bu da absurddur. Bunun səbəbi odur ki, hökumət istəyirdi ki, heç bir debat olmasın ki, seçicilər seçkidən xəbərdar olmasınlar və siyasi proseslərə laqeyd qalsınlar", - İsa Qəmbər deyib.

Ədalətli seçkilərin təmin edilməsi üçün hansı islahatlar aparılmalıdır? Bu suala cavab verən İsa Qəmbər deyib ki, siyasi iradə olduqda mövcud qanunvericilik şəraitində də normal seçkilər keçirmək olar.

Lakin ümumilikdə Dövlət Departamentinin hesabatında da deyildiyi kimi, bərabər imkanlar və rəqabət yaratmaq üçün Seçki Məcəlləsinin təkmilləşdirilməsinə ehtiyac var.

"İlk növbədə, aparıcı siyasi qüvvələrin nümayəndələrinin seçki komissiyalarında iştirakına şərait yaradılmalıdır. Əgər komissiyalarda hakimiyyət nümayəndələri varsa, müxalifət nümayəndələri də olmalıdır", - İsa Qəmbər davam edib.

Bundan əlavə, seçkilərin monitorinqi üçün imkanlar genişləndirilməlidir ki, müşahidəçilər və namizədlərin səlahiyyətli nümayəndələri prosesi real olaraq müşahidə edə bilsinlər.

O deyib ki, seçkilərin istədikləri ssenari üzrə keçirilməsini asanlaşdırmaq üçün hakimiyyət müxalifət partiyalarına təzyiqləri artırır, onları nüfuzdan salmağa çalışır, guya cəmiyyətin demokratik seçkilərə hazır olmaması barədə təbliğat aparır. —16D-