İki polisin ölümü bahasına Gəncə icra başçısının vəzifəsi

Cəmiyyət iyulun 10-da Gəncədə iki polis rəisi müavininin - Gəncə Baş Polis İdarəsinin rəis müavini polkovnik İlqar Balakişiyevin və Nizami Rayon Polis İdarəsinin rəis müavini polkovnik-leytenant Səməd Abbasovun ölümü ilə nəticələnən kütləvi iğtişaş aksiyası haqqında məlumatı təəccüblə qarşıladı. Gəncəlilərin sosial şəbəkələr vasitəsi ilə bir-birini həbs edilmiş Yunis Səfərova dəstək üçün çıxmağa çağıra biləcəyi, amma işin söhbətdən o tərəfə keçməyəcəyi hesab olunurdu. İyulun 3-də şəhər sakinlərinin nifrət etdiyi şəhər icra başçısı Elmar Vəliyevə hücum edən şəxsə ürəkdən azarkeşlik etmək bir məsələdir, hakimiyyətə qarşı çıxmaq başqa məsələ.

İki polis rəisi öldürülüb, 40-a yaxın etirazçı həbs edilib. Əlbəttə, Gəncədə və şəhərin hüdudlarından kənarda polisə gətirilib xəbərdarlıq edilənlərdən, bəziləri isə sosial şəbəkələrdə çağırışlara görə inzibati həbsə məhkum edilənlərdən başqa, yeni həbslər davam edəcək. Qeyri-rəsmi məlumatlara görə, Gəncədə 15 polis öldürülüb, yəqin ki, şaiyələr böyüyəcək, rəqəmlər artacaq. Amma öldürülən iki polis zabiti də çoxdur.

Xüsusən, kədərli olan odur ki, inzibati-siyasi üsulla, Gəncə İH başçısı Elmar Vəliyevin tutduğu vəzifədən azad edildiyini elan etməklə, asanlıqla bu toqquşmanın, - Allah qoysa, axırıncı olar, - qarşısını almaq olardı. Ona Gəncənin büdcə işçiləri arasında öz müdafiəsi üçün məcburi-könüllü imza toplama aksiyası təşkil etmək imkanı verməmək, sakitcə istirahətə göndərmək lazım idi, özü də o, başından yaralanmışdı. Onun vəzifədən azad edilməsini işindəki müvəffəqiyyətsizliklərlə izah etməmək də olardı, yaralanma faktı kifayətdir. Vəssəlam, bu, gəncəliləri sakitləşdirərdi.

Niyə polis zabitlərinin əynində fərdi müdafiə vasitələri - zirehli jiletlər yox idi? Niyə bu insanlar bıçaqla yaxalanıb? Kütləvi etiraz aksiyaları zamanı özünümüdafiə metodlarına hakim olmaq məcburiyyətində olan polislərin peşə hazırlığı hanı? Bu kədər fonunda bu sualları verməyin mənası da yoxdur.

Dövlət cəmi bir məmuru işdən çıxararaq, -sanki o, ən dəyərli məmurdur və bundan sonra Vəliyevdən ağıllı heç kim olmayacaq, - cəmiyyətlə münaqişə vəziyyətindən asanlıqla çıxa bilmirsə, polislərin peşə hazırlığının olmamasının səbəbini soruşmağın nə mənası var?

***

Çərşənbə axşamı Gəncədə etirazçılar və hüquq-mühafizə qüvvələri arasında qarşıdurmalar zamanı iki polis zabiti həlak olub. 40-a yaxın insan saxlanılıb. DİN-in məlumatına görə, iyulun 10-da saat 20.00 radələrində radikal əhval-ruhiyyəli 150-200 nəfərdən ibarət bir qrup dindar Gəncə İcra Hakimiyyətinin binası qarşısındakı meydana toplaşaraq, ictimai asayişi kobud şəkildə pozmağa cəhd edib. Vəzifə öhdəliklərini yerinə yetirən polis əməkdaşlarının xəbərdarlıqlarına məhəl qoymayan bu şəxslər özləri ilə gətirdikləri küt və kəsici-batıcı alətlərdən istifadə edərək, hüquq-mühafizə qüvvələrinə müqavimət göstəriblər. 30 dəqiqə ərzində Gəncənin mərkəzində ictimai asayiş bərpa olunub. Qanunsuz əməllərin qarşısını alarkən iki polis zabiti kəsici-batıcı alətlərdən aldıqları zərbələr nəticəsində həlak olub. Azərbaycan Baş Prokurorluğu cinayət işi qaldırıb.