MÜHARİBƏ VETERANLARINA AZADLIQ!!!

Dr. Leyla Yunus

Sülh və Demokratiya İnstitutunun direktoru

MÜHARİBƏ VETERANLARINA AZADLIQ!!!

  Ramil Səfərovla bağlı qəbul olunmuş qətnamə ilə əlaqədar aparıcı müxalifət partiyalarının hakim partiya ilə birlikdə Avropa Parlamentinə ünvanladığı müraciət səbr kasamı daşdırdı. Şoka düşdüm söyləsəm, demək heç nə deməmişəm.

  Zabit Ramil Səfərov düşmən ordunun zabitini döyüşdənkənar vəziyyətdə öldürüb və erməni silahlı  olmayıb. O 8 il həbs cəzasından sonra azadlığa çıxıb.

  Vətən uğrunda döyüşlərdə silahlı düşmənlərlə vuruşan, dostlarını   itirən, çoxsaylı yaralar, kontuziya olanlar isə 20 ildir ki, həbsxanada oturur. 

  XTPD-nin necə döyüşdüyünü unutduqmu, görəsən? Onlar hələ də əfv olunmağa layiq deyillərmi?  Budur onlar, Qobustan həbsxanasında olan XTPD döyüşçüləri: 

Elçin Əmiraslanov – 1996-cı ildən həbsdədir, ömürlük həbs olunub

Arif Kazımov – 1996-cı ildən həbsdədir, ömürlük həbs 

Dəyanət Kərimov – 1994-cü ildən həbsdədir, ömürlük həbs olunub

Səfa Poladov  - 1996-cı ildən həbs olunub, ömürlük həbs

Əliyusif Tahirov -  2000-ci ildən həbsdədir, ömürlük həbs olunub

Həsən Mustafayev -2000-ci ildən həbsdədir, ömürlük həbs 

Sahib Məmmədəliyev  - 1993-cü ildən həbsdədir, ömürlük həbs

Şəmsi Abdullayev  - 2000-ci ildən  həbsdədir ,14 il müddətinə mühakimə olunub(İTK № 11)

  Təkcə XTPD-çilər məhkum  olunmayıb. Könüllülərin dəstələrində vuruşan müharibə veteranları, yəni, müntəzəm ordu dəstələri formalaşmazdan əvvəl özlərinə atəş açmağa hazır olmaqla düşmənin qarşısını alanlar da mühakimə olunublar. Bizim gənclik yəqin bilmir ki, uzun müddət Sovet Azərbaycanının rəhbərliyi vətəndaşların müdafiəsindən imtina etmişdi və kişilər öz evlərini, öz torpaqlarını qorumaq üçün sovet ordusunun silahları olan anbarları ələ keçirirdilər.

Xatırlayanlar isə bilir ki, 1993-cü ildə amansız döyüşlər zamanı Heydər Əliyevin ilk hərəkətlərindən biri Silahlı Qüvvələrin 33 batalyonunu buraxmaq oldu. Onlar Xalq Cəbhəsi ilə əlaqələrdə ittiham olundular.      H.Əliyev Xalq Cəbhəsindən daha çox ehtiyat edirdi, nəinki Azərbaycanı erməni hücumundan qorumaq barədə düşünürdü. Məhz həmin dəstələrin buraxılması və onun ardınca Silahlı Qüvvələrdə repressiya ermənilərin ölkənin təxminən 20%-ni işğal etməsinə xidmət etdi.

  1994-1996-cı illərdə demək olar ki, döyüşmüş zabitlərin hamısı saxlanmalara, həbsə, istintaqa məruz qaldı. Onu demək kifayətdir ki, 

1992-1993-cü illərdə Azərbaycan ordusunda yalnız üç zabit – Frunze adına SSRİ Artilleriya Akademiyasını bitirən milliyyətcə azərbaycanlı  zabitlər xidmət edib. Onların ikisi həbs olunub. Artilleriya – “müharibənin allahıdır”, həmişə hərbi əməliyyatlar dövrünün zəif yeri olub. O zaman bizdə zabitlər yox idi. Bu gün isə həmin peşəkarlardan  biri İsa Sadıqov – Qarabağ müharibəsi qəhrəmanı mühacirətdə yaşamağa məcburdur.

  Bu batalyonlar nəinki buraxıldı, onların döyüşçüləri AXP ilə əlaqələrdə ittiham olunaraq repressiyalara məruz  qaldılar. Aşağıdakılar indiyədək həbsdədir:

Vaqif Hüseynov – 1994-cü ildən həbsdədir, ömürlük həbs cəzası  (Qobustan)

Maqsud Hüseynov – 1994-cü ildə həbs olunub, ömürlük həbs (Qobustan)

Rəşid İsmayılov- 1998-ci ildə  həbs olunub., ömürlük həbs (Qobustan)

Məqsəd Mustafayev  1994-cü ildən həbsdədir, ömürlük həbs (Qobustan) 

İntiqam Qaibov, 1993-cü ildən həbsdədir, ömürlük (Qobustan)

Yaşar Şahmuradov  -1993-cü ildən həbsdədir, ömürlük (Qobustan) 

  Qarabağ partizanları uzun müddətə həbs olunublar. Günahları  da o olub ki, öz torpaqlarını işğalçılardan azad etmək istəyiblər. Onlar özləri silah toplayıblar ki, işğal olunmuş ərazilərdə partizan müharibəsinə başlasınlar. Onlar heç kimi öldürməyiblər, silah işlətməyiblər. Onların həbsi göstərir ki, Azərbaycanda hakimiyyət Qarabağın azadlığı uğrunda döyüşə hazır olmaqdansa, daha çox öz vətəndaşlarından qorxur. Akif Nağıdan və Qarabağ Azadlıq Təşkilatından başqa kim bu şəxslərin vətənpərvərliyini dəyərləndirib və partizanların həbsdən azad olunması üçün mübarizə aparıb?  

  Onların əksəriyyəti çoxillik cəza müddətini başa vurub. Lakin hələ həbsdə olanlar var:

  Rövşən Bədəlov -2004-cü ildən həbsdədir, 9 il mühakimə olunub 

 Məmməd Məmmədov-  2003-cü ildən həbsdədir, ömürlük həbs   (Qobustan)

  İşğal olunmuş əraziləri azad etmək üçün peşəkar, yaxşı təlim keçmiş, hazırlanmış ordu lazımdır. 1991-1994-cü illərin təcrübəsi göstərdi ki, bizim dağ şəraitində ağır zirehli texnika həlledici rol oynamır, dağ şəraitində döyüşmək üçün hazırlanmış peşəkar hərbçilər lazımdır. 90-cı illərdə bu barədə dəfələrlə yazılıb.  Lakin Azərbaycanda hökm sürən mafioz rejim güclü, qalib ordunun yaradılmasında maraqlı deyil, xalqın mənəviyyatını, tarixini, təhsilini məhv edən rejimə korrupsiyaya uğramış, bacarıqsız ordu lazımdır.

  Ramil Səfərovun  ətrafındakı vəziyyət həm hakimiyyət, həm də müxalifət tərəfindən 2013-cü il prezident seçkiləri ilə əlaqədar siyasi motivlərdən irəli gəlir. Vətəni işğalçılardan azad etmək üçün başqa hərəkətlər lazımdır!