İntiqam Əliyev: Azərbaycan hakimiyyətinin vəkili kimi tanınan adamı siyasi məhbuslar üzrə məruzəçi təyin ediblər

Siyasi məhbuslar üzrə məruzəçinin təyin edilməsi bir uğurdur. Bu, beynəlxalq və yerli hüquq müdafiə təşkilatlarının birgə işinin nəticəsidir. Hakimiyyət bunu istəmirdi. Bu barədə Hüquq Maarifçiliyi Cəmiyyətinin rəhbəri İntiqam Əliyev Obyektiv televiziyasına (www/Obyektiv.tv) müsahibəsində bildirib.

Amma o, Aqramundun bu vəzifəyə seçilməsini pis hadisə kimi səciyyələndirir. “Pis odur ki, həmin vəzifəyə uzun müddət başqa pozisiyada çıxış edən, Azərbaycan hakimiyyətinin dostu, vəkili kimi tanınan bir adamı təyin ediblər. Pedro Aqramundun o vəzifəyə təyin edilməsi çox pis hadisədir. Aqramund AŞPA-nın üzvü olduğu bütün dövrlərdə insan hüquqları ilə bağlı bütün sahələrdə (seçkilər, siyasi məhbus və b.) rəsmi və qeyri-rəsmi olaraq Azərbaycan hakimiyyətinə dəstək verib”.

O, siyasi məhbusla bağlı yerli QHT-lərin çətin şəraitdə iş aparacağını  deyib. “İşimiz asan olmayacaq. İşin mürəkkəbliyi həm də ondan ibarətdir ki, Azərbaycanın vətəndaş cəmiyyətinin də bu məsələyə münasibəti birmənalı deyil. Hökumət çoxlu sayda qeyri-hökumət təşkilatları (QHT) yaradıb. Təəssüf ki, onlar siyasi məhbuslar sahəsində də fəaliyyət göstərir. Vaxtı ilə bu sahədə uğurlu fəaliyyət göstərən QHT-lərin bir hissəsi də hökumətə dəstək verir. Yəni AŞPA-nın sessiyalarındakı müzakirələrdə onlar hökumətə dəstək verir. Ona görə çətin olacaq. Amma, prinsipcə, iş üçün imkanlar var”.

İntiqam Əliyev hesab edir ki, siyasi məhbus probleminin kökündə hakimiyyətin bölgüsü, azad seçki, müstəqil media və müstəqil məhkəmələrin olması dayanır. “Bu sahədə dəyişiklik olmasa, müstəqil demokratik institutlar yaradılmasa siyasi məhbus problemi hər zaman qalacaq. Ola bilər ki, beynəlxalq təşkilatların və bizlərin səyi nəticəsində kimləri isə buraxdılar. Amma yenə də növbəti adamları tutacaqlar.

Məhkəmələr bu ölkədə hakimiyyətin əlində siyasi oponentlərini, fərqli düşünən insanları sıradan çıxarmaq, medianı, vətəndaş cəmiyyətini boğmaq üçün bir vasitədir. Bu vasitədən də hakimiyyət effektli şəkildə istifadə edir”.

O deyib ki, bu ilin iyununda Avropa Məhkəməsinin Azərbaycanda seçki və media azadlığı ilə bağlı qəbul etdiyi qərarların icra durumu müzakirə edilib. “Dinləmələr hökumətin bu sahədə gördüyü ümumi xarakterli tədbirlərlə bağlı idi. Azərbaycan hakimiyyəti AŞ Nazirlər Komitəsinə bu sahədə gördüyü işlər barədə fəaliyyət planı təqdim edib. Təzə qərara görə məhkəmənin hər bir qərarı ilə bağlı hökumət  fəaliyyət planı təqdim etməlidir. 90 səhifəlik fəaliyyət planı idi. Nazirlər Komitəsi bildirdi ki, Azərbaycan hökumətinin təqdim etdiyi fəaliyyət planı onun bu sahədə gördüyü işlərlə bağlı yetərincə məlumat vermir. Çox ümumidir və qanunları fəaliyyət planında əks etdiriblər”.

Ekspertin dediyinə görə, bu səbəbdən Nazirlər Komitəsi Azərbaycan hökumətinə çox konkret suallar göndərib. “Bu suallar seçki komissiyalarının formalaşdırılması, seçki şikayətlərinə baxılması, məhkəmələrin müstəqilliyi, hakim korpusunun formalaşdırılması və başqa sahələri əhatə edir.  Azərbaycan hakimiyyətinə cavab verməsi üçün sentyabradək vaxt verilib”.

İ.Əliyev hesab edir ki, hökumət seçkilərin keçirilməsində maraqlı deyil. “Seçkilərlə bağlı istənilən təkliflər, iradlar hakimiyyət tərəfindən qıcıqla qarşılanır. Çünki hakimiyyət anlayır ki, azad seçki keçirsə bu sistem dağılacaq. Azərbaycan vətəndaşı korrupsiyaçı, avtoritar hakimiyyətə səs verməyəcək. Bu, birmənalıdır. O anlamda inanmıram ki, hakimiyyət demokratik seçkilər keçirəcək. Yeri gəlmişkən, çox səhv mesajlar verirlər, - seçkini udmuşuq. Çox yanlış mesajdır. Ölkədə müstəqil media, hakimiyyət  bölgüsü, müstəqil seçki komissiyaları, toplaşmaq azadlığı yoxdursa, seçki azad ola bilməz və orada biz yox, yalnız İlham Əliyev qalib gələ bilər. YAP qalib gələ bilər o seçkilərdə”, deyə o qeyd edib. -03B-