Zərdüşt Əlizadə: Xurafatdan xilasın yolu insan azadlığıdır

Bakı/14.06.19/Turan: Son günlər sosial şəbəkələrdə Goranboy sakinlərinin "Qaloş piri"ndə guya qaloşu öpməklə şəfa tapması haqqında video yayılıb. Müasir insanların bu cür xurafatlara inanmasının səbəbi nədir və bununla necə mübarizə aparmaq olar? "Amerikanın Səsi"nin Azərbaycan xidmətinin bu suallarına cavabında şərqşünas Zərdüşt Əlizadə bildirib.

"Bircə əsas səbəbi var. İnsanlarda, vətəndaşlarda əvvəla savad səviyyəsi aşağıdır. Çünki bizim təhsil sistemimiz mütəmadi olaraq tənəzzülə uğrayır. Bu səbəbdən insanlar xurafatçı olur. Səhiyyəmizin bərbad vəziyyətində, insanların maliyyə durumunun ağır şəraitində bu vəziyyətdən çıxmaq üçün insanlar nəyə desən inanmağa hazırdır", deyə Əlizadə bildirib.

Hakimiyyət ölkədə bütün azadlıqların təmin edildiyini və həyat və təhsil səviyyəsinin daim artdığını iddia edir. Amma əslində vəziyyət fərqlidir. Hakimiyyət vətəndaşların azad və müstəqil olmasını istəmir. Onların vəzifəsi insanları hazırki vəziyyətdə saxlamaqdır ki, onlar xurafatlara inansınlar ki, onları idarə etmək asan olsun, Əlizadə belə hesab edir.

Bu vəziyyətdən çıxış yolu nədir? Bu suala cavabda Əlizadə deyib ki, xurafat cəhalətdən qidalanır. Bu problem hələ 19-cu əsrdə kəskin şəkildə mövcud olub, həmin dövrdə maarifçi Cəlil Məmmədquluzadə cəmiyyəti xurafatlara qarşı mübarizəyə çağırırdı.

Əslində xurafatlar dindən uzaqdır. İnsanların xurafata meylli olması təkcə savadsızlığın deyil, həm də dövlətin real institutlarına inamzıslığın göstəricisidir.

Bu, həm də milli mentalitetlə bağlıdır. Belə ki, bütün dövrlərdə xurafatı qınayan və ona qarşı çıxanlar əksəriyyət tərəfindən mənfi qarşılanıb. Təkcə çarizm dövründə deyil, sovet dövründə də belə olub. Həmin vaxt sovet hakimiyyətinin tənqidçilərini o dünyadan gəlmə hesab edirdilər. İndi də dövlət sistemindən narazı olanları, onun tənqidçilərini ən yaxşı halda o dünyadan gəlmə adlandırırlar.

Dövlətin bu məsələdə adekvat strategiyası yoxdur, dini tərbiyyəyə ayrılan vəsait isə formal tədbirlərə xərclənir və ya mənimsənilir. Bu da nəticəsi. Buna görə xurafata inam azalmır, deyə Zərdüşt Əlizadə qeyd edib. -03B-