Media-icmal 21.08.20

Keçmiş səfir Eldar Həsənovun həbsi ətrafında baş verən hadisələr, idman zallarının açılması barədə düşüncələr, icra hakimiyyətlərində aparılan həbslər və s. məsələlər medianın aparıcı mövzuları sırasındadır....

"Yenisabah.az"  Azərbaycanın Serbiyada, Monteneqroda, Bosniya-Herseqovinada keçmiş səfiri Eldar Həsənovun vəkili Adil İsmayılova istinadən onun həbsi və hazırkı durumu barədə yazır .

Vəkilin sözlərinə görə, səfir E.Həsənov avqustun 13-ü xarici işlər naziri Ceyhun Bayramovla görüşə gedərkən saxlanılıb.

"Eldar Həsənov 2020-ci il avqustun 13-də səhər saat 9 radələrində evindən çıxaraq XİN-ə yeni nazirlə əvvəlcədən razılaşdırılmış görüşə gedərkən DTX əməkdaşları tərəfindən saxlanılıb və oraya gətirilib. Bundan sonra onun arzusu ilə məni dəvət ediblər və müdafiəçi kimi işdə iştirak etməyə buraxılmışam", deyə vəkil həbsin təfərrüatlarına toxunub.

"Avqustun 13-də  E.Həsənov şübhəli şəxs kimi saxlanılıb, avqustun 14-də isə Səbail rayon məhkəməsi barəsində həbs qətimkan tədbiri seçib. Məhkəmənin qərarından apellyasiya şikayəti vermişik. Avqustun 20-də Bakı Apellyasiya məhkəməsi şikayəti təmin etməyib və qərarı qüvvədə saxlayıb. Eldar Həsənov vəzifə səlahiyyətlərindən sui-istifadə etməkdə və büdcə vəsaitlərini təyinatı üzrə istifadə etməməkdə ittiham olunur. O, ittihamları qəbul etmir, həbsini qərəzli, əsassız hesab edir və saxlanıldıqdan bu günə kimi ifadə verməkdən imtina edib, heç bir ifadə verməyib".

Xatırlatma: Sui-istifadəyə görə Azərbaycan XİN-də bəzi şəxslər həbsə alınıblar, mənimsəmə, rüşvət alma faktlarına görə cinayət məsuliyyətinə cəlb edilərək barələrində məhkəmə qərarları əsasında həbs qətimkan tədbiri seçilib.

Maliyyə yoxlamaları zamanı Azərbaycanın Serbiyada, Monteneqroda, Bosniya və Herseqovinadakı səfiri Eldar Həsənovun büdcə vəsaitinin təyinatı üzrə istifadə edilməməsi və digər qanun pozuntularının törədilməsinə dair əsaslı şübhələr müəyyən edilib. Eldar Həsənova qarşı Cinayət Məcəlləsinin 308.2-ci (vəzifə səlahiyyətlərindən sui-istifadə), 308-1.1-ci (büdcə vəsaitlərinin təyinatı üzrə xərclənməməsi) maddələrilə ittiham irəli sürülüb. Səbail rayon Məhkəməsinin qərarı ilə onun barəsində noyabrın 3-dək həbs-qətimkan tədbiri seçilib.

"Redaktor.az"da isə "Professordan təklif: İdman zalları açılsın, yoxsa…" sərlövhəli məqalədə professor Adil Qeybullanın təklifləri diqqətə  çatdırılır.

Professor hesab edir ki, idman zalları açılmalıdır və idman zallarının fəaliyyətinə hər hansı problem yoxdur.

"Karantin yumşaldılmazdan əvvəl tərəfimizdən müəyyən təkliflər verilmişdi.

Həmin təklifdə qeyd etmişdik ki, sosial həyatın bütün sahələrinə karantin davranışlarına əməl etməklə icazə verilə bilər. Hazırda Operativ Qərargah mərhələli şəkildə yumşaldılma həyata keçirir. İlk növbədə açıq havada olan ictimai iaşə obyektlərinin açılışına qərar verilib".

A.Qeybulla qapalı məkanlar olaraq marketlərin faliyyətə başlamasını göstərərək, idman zallarında da karantin davranışlarına əməl etməklə qorunmağın mümkünlüyünü vurğulayır: "Əsas odur ki, karantin qaydaları gözlənilsin. Karantin davranışlarına əməl etməklə nəinki idman zalları, hətta toylara da icazə verilə bilər".

Professor yaxın zamanlarda müəyyən qaydalar əsasında idman zallarının açılışına icazə veriləcəyinə ümid edir.

Deputat Bəhruz Məhərrəmov da hesab edir ki, idman zallarının açılması dövlətin də, vətəndaşların da marağındadır: "İndiki məqamda hazırki şərtlərlə, hər fərdin istifadəsindən sonra avadanlıqların dezinfeksiya edilməsi, havalandırma şərtlərinin dəyişməsi, insanların kiçik partiyalarla zala buraxılması kimi digər önləyici tədbirlər idman zallarının sahibləri üçün izafi xərclərdir və açığı, obyektlərin çoxunun bu xərclərin altından qalxa biləcəyini düşünmürəm. İdman zallarının fəaliyyətinin açıq hava şəraitinə keçirilməsi isə xərcləri də, təhlükəni də azalda bilər", deyə deputat bildirib.

"Moderator.az" isə "Həbslərə baxmayaraq, onlar hələ də öz əməllərindən əl çəkmək istəmirlər" sərlövhəli məqalədə icra hakimiyyətlərində baş verən həbslər barədə yazır.

Müəllif deyir ki, ölkədə rüşvət və korrupsiyaya qarşı mübarizə davam edir, son olaraq belə əməliyyat Kürdəmir Rayon İcra Hakimiyyətində həyata keçirilib.

Müəllif bu əməliyyatların nəticə etibarilə əyalətlərdə iqtisadi-biznes mühiti, sahibkarların fəaliyyəti üçün əlverişli şəraitin yaradılmasına səbəb olub-ola bilməməsi barədə deputat Vahid Əhmədovla söhbətləşir.

V.Əhmədov hesab edir ki, DTX və Baş Prokurorluğun həyata keçirdiyi əməliyyatlar korrupsiyaya qarşı mübarizə baxımından mühüm önəm kəsb edir, rüşvət və korrupsiya ölkə üçün hələ də bir bəla olaraq qalmaqda davam edir. 

"Artıq altıncı icra başçısıdır ki, həbs olunub. Aparılan həsblər insanlara müəyyən qədər öz müsbət təsirini göstərir. Amma hələ ki, bu həbslər fonunda rayonlarda iqtisadi durumun, biznes mühitinin yaxşılaşdığını deyə bilmərik. Icra başçılarının əksəriyyəti yenə də öz köhnə əməllərindən əl çəkmirlər".

V.Əhmədova görə, yenə insanları incidir, sahibkarlarla normal münasibətlər qura bilmirlər. Sahibkarlığın inkişafı üçün rayonlarda yenə də müəyyən maneələr var, çünki biz bununla bağlı müəyyən məlumatlar, informasiyalar əldə edir, məktublar alırıq.

"Hesab edirəm ki, bu kimi addımlar zamanla sahibkarlar üçün daha əlverişli mühitin yaradılmasına kömək edəcək. Çünki bu gün mərkəzi icra orqanlarında da rüşvət və korrupsiyaya qarşı mübarizə məqsədi ilə önəmli addımlar atılır. Bu problem öz həllini tapmalıdır ki, sahibakrların normal fəaliyyəti üçün lazımi şərait formalaşsın.