Media-icmal 22.04.19

İnfrasturktur və sosial layihələrin həyata keçirilməsi, islahatlar ətrafında müzakirələr, əhalinin enerji təminatına baxış və s. məsələlər bugünki (22 aprel, 2019-cu il) medianın aparıcı mövzularındandır...

İnfrastruktur və sosial layihələrin icrası

"Azərbaycan" qəzeti "Yol salmaq, su çəkmək, ev tikməkdən savab iş yoxdur" sərlövhəli məqalədə sosial layihələrin icrasını dəyərləndirir.

Müəllif deyir ki, dövlət başçısı İlham Əliyevin rəhbərliyi ilə aparılan iqtisadi islahatlar ölkənin ümumi inkişafı ilə yanaşı, sosial məsələlərin həllinə də xidmət edir.

Bu sırada müəllif vurğulayır ki, yol infrastruktur layihələri, demək olar ki, ölkənin bütün regionlarını əhatə edir: "Ümumiyyətlə, 2004-cü ildən bugünədək ölkə ərazisində ümumilikdə 15 min kilometrdən çox avtomobil yolu salınıb. Təkcə keçən il 2 min kilometr yeni avtomobil yolu çəkilib. Başqa sözlə, 920 kəndin yol infrastrukturunu yaxşılaşdırıb, yerli əhalinin rahat gediş-gəlişini təmin edib. Həmin yaşayış məntəqələrində 2,2 milyon insan yaşayır".

Müəllif yol infrastrukturunun əhəmiyyətini Prezidentdən sitat gətirməklə də ön plana çıxarır: "Bildiyiniz kimi, bu, eyni zamanda iqtisadi amildir. Çünki yol olan yerdə kənd təsərrüfatının inkişafı da sürətlənir, yol olan yerdə sosial məsələlər də öz həllini tapır... Bu il ən azı, hələlik ən azı 1000 kilometr yol salınacaqdır".

Məqalə müəllifi ölkədə su mənbələrinin sayının az olduğunu, amma su anbarları yaradılması ilə həm yüz min hektarlarla əkin sahələrinin, həm də minlərlə əhalinin içməli suya olan tələbatının ödənilməsinə imkan verdiyini qeyd edir.

Buna nümunə olaraq müəllif "Şəmkirçay", "Taxtakörpü", "Tovuzçay" kimi nəhəng su anbarlarını göstərir: "Təkcə ötən il 100 min hektar torpağa suyun verilməsi təmin edilib. Düzdür, 60 min hektara əvvəl də su verilirdi, lakin bu, çox aşağı səviyyədə idi. Onu da qeyd edək ki, aqrar sektorda məhsul istehsalının artmasını təmin edən əsas amillərdən biri məhz su ilə təminatdır".

Müəllifin sözlərinə görə, ya çayların ərazidən uzaq, ya da relyefinə görə həmin ərazilərə kanal vasitəsilə su çəkmək mümkün olmur, bu halda ümid artezian quyularına qalır və hər il 300 subartezian quyusu qazılır, bu il də 300 artezian quyusunun qazılması nəzərdə tutulur.

Müəllif sosial baxımdan həssas olan bəzi əhali kateqoriyalarının problemlərinin də həllini tapdığını, təkcə ötən il 5800 köçkün ailəsinə yeni mənzillər verildiyini, bu il isə 5000 köçkün ailəsi üçün yeni mənzillər tikildiyini, şəhid ailələri və Qarabağ müharibəsi əlillərindən 626 ailəyə keçən il mənzil verildiyini vurğulayır.

Müəllif bu işin 2019-cu ildə də davam edəcəyini bildirir.

Deputat: Problemlərin çoxu inhisar və korrupsiya ilə bağlıdır

"Unikal.org"da isə "Məhkəmələrdə korrupsiya problemləri özünü qabarıq şəkildə göstərir - Fazil Mustafa (MÜSAHİBƏ)" sərlövhəli məqalə oxumaq olar.

Müəllif ölkədə həyata keçirilən islahatlar və bu islahatların gedişi barədə deputat Fazil Mustafa ilə söhbətləşir.

Müəllifin sözlərinə görə, uzun müddətdir ki, ölkədə mövcud olan durğunluq sanki müəyyən dəyişiklik dönəmi ilə əvəzlənir, sosial-iqtisadi sahədəki yeniliklər, müəyyən kadr dəyişiklikləri, məhkəmə-hüquq sistemində islahatların aparılmasına start verilməsi ölkədə yeni bir dönəmə qədəm qoyulduğunu düşünməyə əsas verir.

Deputat isə deyir ki, ölkədə baş verən dəyişikliklər əslində ondan ibartdir ki, Prezident gerçək bir islahat niyyəti ortaya qoyub, yanvar ayından etibarən bu islahat niyyəti tam bariz şəkildə özünü göstərir.

F.Mustafaya görə, bu, hələ yetərli deyil: "Amma gəlin, görək, bu niyyət hamı tərəfindən anlaşılıbmı? Bunu söyləmək çətindir. Xüsusilə hakimiyyət komandasında xeyli qüvvələr var ki, bu islahatların həyata keçirilməsinə maneçilik törədir".

Deputat diqqəti prezidentin Novruz Bayramı ilə bağlı çıxışında məhkəmə hüquq sahəsində elan etdiyi islahatlar üzərində cəmləyir və deyir: "Amma məhkəmə-hüquq islahatlarını həyata keçirəcək şəxslərin özləri məhkəmə sistemini bu vəziyyətə salan qüvvələrdir. Ona görə də bunun necə həyata keçiriləcəyi açığı sual altındadır", deputat bu sahədə islahatın baş tuta biləcəyinə inamsız yanaşır.

Bu vəziyyətdən çıxış yolu barədə danışan deputat hesab edir ki, bura daha çox parlamentin potensialı cəlb olunmalı, parlament üzvlərinin, xüsusilə müstəqil hüquqşünasların münasibəti lazım idi.

F.Mustafa hətta hazırkı məhkəmə-hüquq sistemindəki blokla islahatları mümkünsüz sayır: "Onu da qeyd etməliyəm ki, həmin qüvvələr vəkillər sistemini də alt-üst etdilər. Nümayəndəlik institutunu ləğv elədilər. Bu gün vətəndaşın normal müdafiə imkanları sıfıra enib. Çox ciddi problemlər var. Ona görə də islahat niyyəti hələ ki prezidentdən aşağı səviyyələrdə əngəllə qarşılanır. Digər sahələrdə də elədir".

Deputat deyir ki, prezident sərəncam verdi ki, sahibkarları yoxlamaq olmaz, bununla belə həmin maneələr yenə də qalır, tikinti və başqa sektorlarda fəaliyyət sərbəstliyi baş vermədi, müstəqil təşəbbüs imkanı boğulur.

Deputat hesab edir ki, ona görə də islahatlar kompleks, real məzmun daşımalıdır, amma aşağılarda buna maneələr çox olduğuna görə islahatın nəticələrini, hələ ki, görmək olmur.

F.Mustafaya görə, ilk növbədə islahatın öz kadrlarını tapmaq lazımdır, daha sonra hakimiyyət eşalonunda olan insanlar müəyyən dərəcədə öz imtiyazlarından imtina etməyi göz önünə almalıdırlar: "Çünki imtiyazdan imtina etmədən islahat aparmaq olmaz. Aşağı səviyyədə problemlərin çoxu inhisarçılıqla, korrupsiya ilə bağlıdır. Bunlara qarşı müəyyən cəbhə açmaq üçün mütləq yuxarı eşalondakılar bundan imtina etməli, bu imtiyazlardan uzaqlaşmalıdırlar. Uzaqlaşmadıqda islahatın həyata keçirilməsi düzgün deyil".

"Qənaət" deyəndə elə kasıb-kusub yada düşür?

"Azpolitika.info"da isə ""Qənaətcil" deputatın utanmadan oynamaqlığı... - Aydın Hüseynov da Hadı Rəcəblinin yolunu gedir" sərlövhəli məqalə diqqət cəlb edir.

Müəllif bəzi deputatların sosial peroblemlərlə bağlı açıqlamalarının əhalidə qıcıq yaratmasını gündəmin müzakirəsinə çəkir və belə deputatlardan birinin Aydın Hüseynov olduğunu bildirir.

Müəllifin sözlərinə görə, parlamentdə bir neçə ildir ki, əhaliyə tətbiq edilən qaz və elektrik limiti məsələsi müzakirəyə gətirilir, bəzi deputatlar bunun ləğv olunması məsələsini qaldırır, bəziləri isə əleyhinə çıxır.

Müəllif deyir ki, YAP-çı deputat A.Hüseynov da məhz bu limit əleyhinə çıxanlardan biridir və açıqlamalarında iddia edir ki, limit tətbiqi hər kəsin qaz və elektrik enerjisini qənaətlə işlətməsinə şərait yaradıb: "Məlumdur ki, elektrik enerjisinə və qaza tətbiq olunan limitin məqsədi artıq məsrəfə yol verilməməsi, qənaət rejimindən istifadə olunmasıdır. Əhalinin gəliri artdıqca bu problemlər öz-özlüyündə həll olunacaq. Doğrudan da limitlərin tətbiqi hər kəsin qazı və elektrik enerjisini qənaətlə işlətməsinə şərait yaratdı..."

Müəlif deputatın bu mövqeyini bu qərarın əhalinin onsuz da çətin olan sosial vəziyyətini daha da ağırlaşdırmasını, insanların evlərini qızdırmaqda çətinlik çəkməsini, rayonlarda buna görə əhalinin meşələri qırmalı olmasını, qaz ola-ola odundan istifadə eməsini nəzərə almaması kimi dəyərləndirir.

Müəllif də hesab edir ki, qənaət vacib məsələdir, amma nədənsə bu qənaət hər zaman kasıb-kusuba aid olanda yada düşür və deputat sual ünvanlayır: "Görəsən, Aydın Hüseynov özü bu limitlər tətbiq olunandan sonra nə qədər vəsaitə və enerjiyə qənaət edə bilib? Ümumiyyətlə, bu adamın "qara camaatın" vəziyyətini anlaması və seçicilərinin rifahını düşünməsi nə dərəcədə inandırıcıdır?".

Müəllifin iddiasına görə, həmkarı Hadı Rəcəbli kimi, A.Hüseynovun da sosial məsələlər barədə fikirləri əhalidə qıcıq yaradır və A.Hüseynov bu yaxınlardakı son açıqlamasında enerji daşıyıcılarına tətbiq olunan limitlə bağlı fikrini belə tamamlayıb: "Qaz və elektrik enerjisi ilə bağlı limitlərin ləğvi real deyil".

Müəllif isə xatırladır ki, bəzi "deputat-ekspertlər" vaxtilə problemli kreditlərlə bağlı güzəştləri də real hesab etmirdilər və az qalırdı camaata desinlər ki,"gedin canınız çıxsın, ödəyin".

Müəllifin sözlərinə görə, problemli kreditlərin həllilə bağlı ölkə başçısının məlum fərmanından sonra bu qismdən olan deputatlar əvvəlcə bir mddət susdular, sonradan isə həmin güzəşt fərmanı qərarını alqışlamağa, təriflər yağdırmağa başladılar.

Sonda isə müəllif deyir: "Bəs, görəsən, nə vaxta qədər belə olacaq? Olmazmı ki, bunlar əhalinin sosial durumuna təsir edən məsələlərlə bağlı ümumiyyətlə sussunlar və sadəcə öz işlərilə - tərifləmək, məddahlıq etmək, yaltaqlanmaqla məşğul olsunlar?..."