Media-icmal 22.05.2017

Azərbaycanın islam dünyasında idmana liderlik etməsi, özəl sektora basqılar, Beynəlxalq Bank ətrafındakı durum bugünki (22 may, 2017-ci il) medianın aparıcı mövzusudur...

İslam dünyasının idman lideri - Azərbaycan

"Azərbaycan" qəzeti "Azərbaycan İslam dünyasında idman hərəkatına liderlik edir" (http://www.azerbaijan-news.az/index.php?mod=3&id=122600) sərlövhəli məqalədə ölkənin IV İslam Həmrəyliyi Oyunlarını təşkil etmək qabiliyyətini dəyərləndirir.

Müəllif deyir ki, təşkilatçı ölkə hər şeydən əvvəl müvafiq potensiala, bu sahədə təcrübəyə malik olmalı, həm də idmançıları beynəlxalq turnirlərdə nailiyyətləri ilə tanınmalıdır.

Müəllif IV İslam Həmrəyliyi Oyunlarının təşkilini öhdəsinə götürmüş Azərbaycanın bu tələblərə tamamilə cavab verdiyini bildirir.

Yazı müəllifi vurğulayır ki, Azərbaycan gənc və müstəqil dövlət kimi işğala məruz qalması, köçkün-qaçqın problemi olması faktlarıına baxmayaraq, dünya birliyində layiqli yer tuta bilib.

Müəllif deyir ki, ölkə idmanın maddi-texniki bazasını möhkəmləndirib: "Nəticə artıq göz qabağındadır. İstər paytaxt Bakıda, istərsə də bölgələrdə bir-birinin ardınca idman obyektləri - müasir tipli olimpiya idman kompleksləri, stadionlar, voleybol və basketbol arenaları, tennis kortları, şahmat məktəbləri və s. inşa edildi, mövcud obyektlər yenidən quruldu".

Müəllif hazırda ölkədə 10 mindən çox idman qurğusu fəaliyyət göstərdiyini, bütün bölgələrin idman obyektləri ilə təmin olunduqlarını və müasir idman infrastrukturunun yaradılması sayəsində ölkə atletlərinin uğurlarının artdığını bildirir.

Müəllif ölkə idmançılarının beynəlxalq olimpiya oyunlarına qatıldıqları 1996-cı ildən bu yana medal sayını artıra-artıra getdiyini xatırladır.

Daha sonra İslamiadanı islam aləminin olimpiadası adlandıran müəllif bu oyunların keçirilməsi qaydaları barədə və nəhayət 2013-cü ildə növbəti Oyunların təşkilinin Azərbaycana tapşırıldığını nəzərə çatdırır.

Müəllif bu yarışlarda Azərbaycan atletlərinin də iştirak etdiyini və ümidləri tamamilə doğrultduğunu xatırladır.

Son olaraq müəllif Bakının İV islam Həmrəyliyi Oyunlarına ev sahibliyi etməsini dəyərləndirir: "Müsəlman atletlərinin paytaxtımızda görüşü, əvvəlki Oyunlardan fərqli olaraq, ən yüksək səviyyədə təşkil olunub. Ölkəmiz bu dəfə idman tədbirinin həm iştirakçısı, həm də təşkilatçısıdır. Bu isə Azərbaycanın İslam dünyasının idman hərəkatında liderlik mövqeyinə yüksəldiyinə dəlalət edir".

Basqı altında olan "xilaskar"

"Novoe Vremya" qəzeti "Biznesə "basqı"iqtisadiyyat üçün minusdur" (http://www.novoye-vremya.com/w92384/.../#.WSHHsWiLTIU) sərlövhəli məqalədə işçilərin özəl sektordan dövlət sektoruna axın etməsinin səbəblərini müzakirəyə çıxarır.

Müəllif kiçik və orta sahibkarlıq sahələrindən dövlət sahəsinə kadr axınına əsas kimi ən azı üç səbəbi göstərir: "Buraya korrupsiya, inhisar və məmur özbaşınalığı aiddir və burada məmurların özbaşınalığı aparıcı amildir".

Müəllif belə basqıya məruz qalan şirkətlərdən birnin başına gələnlər barədə danışır və bu məsələdə bəzi rəsmi qurumları təqsirli bilir.

Yazı müəllifi hesab edir ki, belə basqıların nəticəsi olaraq bağlanılan özəl qurumlarda çalışmış şəxslərin sonra heç də hamısı dövlət sektorunda işlə təmin edilə bilməyəcək, bundan əlavə, belə əməllərin nəticəsi olaraq rəsmi dövlət qurumlarına etimad azalacaq: "Digər tərəfdən, sahibkarlara belə basqılar bütün ölkə iqtisadiyyatna fəlakətli dərəcədə pis təsir edir".

Müəllif bu məsələdə ölkə rəhbərliyinin xəttilə ayrı-ayrı məmurların əməllərinin üst-stə düşmədiyini xüsusi olaraq vurğulayır: "Ölkə rəhbərliyi bunu edir ki, biznes ölkədə bütün iqtisadi islahatların indikatoru olsun, amma belə alınır ki, bəzi hakimiyyət təmsilçiləri ölkə və onun iqtisadiyyatı üçün bu qədər önəmli olan prosesləri sabotaj edirlər".

Müəllif deyir ki, yuxarıda biznes qurumuna basqılarla bağlı göstərilən fakt məmur özbaşınalığına dair yeganə fakt deyil və yerlərdə biznes qurumlarına basqılar olmasna aid çoxsaylı informasiyalar yer alıb və regionlarda biznes qurumlarına olan basqılar açıq-aşkar özünü göstərir.

Müəllif hesab edir ki, cəzasızlıq mühiti məmur aparatı tərəfindən biabırçılıq yaradır və Azərbaycan iqtisadiyyatı üçün indiki ağır zamanda buna yol verilməsi özü yolverilməzdir: "Məmurlar öz əməllərinə görə məsuliyyət daşımalıdırlar. Əks halda, ilk növbədə Azərbaycana xarici kapital axınına səbəb olacaq əlverişli biznes mühiti yaratmaq mümkün olmayacaq. Kiçik və orta biznes deqradasiyaya uğrayacaq, iqtisadiyyat isə hələ uzun müddət böhrandan çıxış yolu axtaracaq.

Müəllif bəzi proqnozlara istinadən məmurlara bunu da xatırladır ki, bareli hər zaman 30 dollara qədər enmək şansı olan neft yox, məhz orta və kiçik biznes iqtisadiyyatın böhrandan çıxmasında əsas rol oynayacaq.

"Astar"ı "üz"ündən baha "sağlamlaşdırma"

"Yeni Müsavat" qəzeti "Əli Məsimli: Beynəlxalq Bankın sağlamlaşdırılmasının "astarı" dövlətə "üzündən" baha başa gəlir" sərlövhəli məqalədə Beyəlxalq Bank ərafındakı prosesi deputatla araşdırır.

(http://musavat.com/news/eli-mesimli-beynelxalq-bankin-saglamlasdirilmasinin-astari-dovlete-uzunden-baha-basa-gelir_439806.html).

Müəllif Azərbaycan Beynəlxalq Bankının (ABB) Nyu-York məhkəməsinə müraciət edərək müflis olduğunu elan etməsini istəməsini ölkənin bank sisteminin acınacaqlı durumda olmasının göstəricisi adlandırır və hesab edir ki, bu məsələnin üstündən heç nə olmamış kimi keçmək olmaz, bunun cəmiyyətə izahı verilməlidir.

Deputat Əli Məsimli deyir ki, ABB ətrafında baş verən hadisə və davam edən proseslər dövlət üçün ciddi problemə dönüb: "Nyu-York məhkəməsinin qərarı ilə bankın xarici kreditorlar qarşısındakı öhdəliklərinin dövlətin zəmanəti ilə təxirə salınması xarici öhdəliklər üzrə durumu bir qədər yumşaltsa da, bu problemin köklü həlli deyil, yəni problemin həlli yalnız ertələnməklə həll olunmalı vəziyyətə gətirilir".

Ə.Məsimli hesab edir ki, qarşılıqlı razılaşma əsasında bankın bir qədər fərqli variantlarda öhdəlikləri dövlət tərəfindən mütləq yerinə yetirilməli olacaq.

Deputat xatırladır ki, dövlət başçısı İlham Əliyev 2015-ci ilin iyulunda bankda yaranan durumla bağlı fərman imzalayıb, ötən iki il ərzində həmin sənəddə nəzərdə tutulan işlərin bir hissəsi həyata keçirilsə də, qərarlar tam dolğunluğu ilə icra olunmayıb".

Ə.Məsimli deyir ki, bankın ABŞ-ın Nyu-York məhkəməsinə müraciəti və bu sahədə yetərincə məlumatın olmaması bank ətrafında gedən proseslərin beynəlxalq əks-sədasını gücləndirib: "Bir sıra xarici mətbuat orqanları bu məsələni işıqlandıranda xeyli şişirtmələrə yol versələr də, - bankın müflis duruma düşməsini yetərincə valyuta ehtiyatı olan Azərbaycanın iflası kimi qələmə verilməsini nəzərdə tuturam, - fakt faktlığında qalır ki, bankda baş verən və hələ indi də ətrafında gedən proseslərin görünməyən tərəfləri görünən tərəfindən qat-qat böyükdür".

Ə.Məsimli vurğulayır ki, bankın sağlamlaşdırılması ilə bağlı dövlət illik büdcəyə 10 milyard manata yaxın vəsait xərc edib, amma problemin həlli hələ tam görünmür: "Ona görə də görünən odur ki, bankın özəlləşdirilməsinə gedən yolda onun sağlamlaşdırılmasının "astarı" dövlətə "üzündən" baha başa gəlir. Bu da büdcəyə və ölkənin maliyyə durumuna, maliyyə-bank sisteminə mənfi təsir göstərəcək".

Ə.Məsimli son zamanlar rəsmi dairələrə yaxın mətbuatda tənqid edilən həmkarı V. Əhmədovun təşəbbüsünü dəstəkləyərək deyib: "Yaranmış vəziyyət və ondan çıxış yolları barədə əhaliyə, səhmdarlara, müştərilərə, əmanətçilərə əsaslandırılmış və dolğun məlumatlar verilməlidir".