Vətəndaşlar sosial şəbəkələrdə seçkiləri dəyərləndirirlər

Azərbaycanda növbədənkənar parlament seçkiləri (9 fevral 2020) ərəfəsində deputatlığa namizədlərin təbliğatı demək  olar ki, sosial şəbəkələrdə aparılıb ki, bunlardan da  ölkədə ən çox istifadə olunanı Facebook-dur.  Fevralın 10-u səhərdən sosial şəbəkələr seçkilərdən məyus olan istifadəçilərin fikir mübadiləsi üçün məkana çevrilib.

Çıxışçılardan biri REAL Partiyasının namizədi, televiziya çıxışlarından tanınan hüquqşünas Fərhad Mehdiyevdir. Oxucular onun videoyazısını izləyirlər. Namizəd seçki məntəqəsində bülletenlərin olduğu qutunun üstündə oturub bildirir ki, səslərin hesablanmasına dair protokolu alana qədər seçki qutusunu verməyəcək. Mehdiyevin gözləri yaşarır. O, arxa tərəfində dayanmış müəllimlərə -  məntəqə komissiyasının üzvlərinə deyir ki, onların hüquqları və rifahı üçün mübarizə aparır və müəllimlərin ona istehzalı münasibətindən təsirləndiyini bildirir.

F.Mehdiyev MSK-nın seçki qaliblərinin ilkin siyahısında deyil.

Jurnalist Aygün Muradxanlı da qaliblər siyahısına düşməyib. O, sosial şəbəkədə seçicilərin məktublarını paylaşır. Onlar  kollec direktoru, imtahanı 300 manata, diplomu min manata satan rüşvətxor Fatmadan danışırlar.

“Dünən Fatma tələbələrindən ibarət öz karusel dəstəsi ilə 30 dəfə qarşımıza çıxdı məntəqələrdə”, - A.Muradxanlı yazıb.

Hərbi ekspert Üzeyir Cəfərov Facebook səhifəsində yazıb ki, seçkilərdə qalibiyyəti elan edilən şəxslər arasındakı dostlarını təbrik etmək niyyətində deyil. 

“Təbrik etmirəm, çünki  qaliblər gözəl bilirlər ki, bu seçkini gözdən salan MSK sədri və başının dəstəsi kifayət qədər insanı dövlətdən və dövlətçilikdən incik, narazı saldılar. Bunun nəticəsini tezliklə görəcəyik. Bu seçkifason bir oyuna və sərf olunan xeyli pula görə də çoxları cavab verəcəklər”. 

Ü.Cəfərov diqqəti ona yönəldir ki, MSK qalmaqallı pozuntuların baş verdiyi  7 dairə üzrə nəticələri elan etmədi.  Seçki komissiyalarının sədrləri və üzvləri arasında çoxluq təşkil edən müəllimlərin ünvanına sosial şəbəkələrdə yayılan ittihamlar Ü.Cəfərovun yazısında da təkrarlanır.

“Bu seçki Azərbaycan cəmiyyətini daha da çox parçaladı. Heyflər olsun. Məzahir Pənahov (MSK sədri-red.) və başının dəstəsi xalqdan üzr istəməlidir. Bu işlərin sonu çox böyük gərginlik gətirəcək”, - Ü.Cəfərov yazıb.  

FB istifadəçiləri öz statuslarında artıq  hakimiyyəti yox, bu cür seçkilərə yol verən xalqı günahlandırırlar. Rəna Xəlilova yazır: “Məktəb müəllimləri sehrbaz İqor Kiodan dərs alıblar. Qutuya istədiyini at. Nə lazımsa o çıxacaq”.

Jurnalist Nailə Balayeva xatırladır ki, 2000-ci illərdə keçirilmiş seçkilərdən sonra mətbuat konfransında MSK sədri “Yeni Azərbaycan Partiyasının növbəti dəfə qalib gəldiyini” elan edəndə jurnalist Rauf Mirqədirov acıqla ona demişdi ki,  “xalq qadın deyil ki, özünə təcavüzdən zövq alsın”. Təəssüf ki, Rauf Mirqədirov kimi jurnalist də yanıla bilər”, - o qeyd edib.

2014-cü ildə Rauf Mirqədirov həbs olundu və Ermənistanın xeyrinə casusluq etmək ittihamı ilə 6 il müddətinə mühakimə edildi, ciddi rejimli koloniyada saxlanıldı.  23 ay təkadamlıq kamerada qaldı və sonra gözlənilmədən İsveçrəyə yaşamağa göndərildi.

Niyə xalq seçki saxtakarlığına yol verir? Bakı sakini Viktor Sapunkov öz fikirlərini FB-də söyləyir:

-Bizim məntəqədə vətəndaşların çoxu laqeyd qaldı. Çünki yeni namizədlər əsasən sadə insanlar arasında o qədər də tanınmırlar. Mən də bizim məntəqədən deputatlığa namizədləri tanımırdım, lakin kompüter və İnternetim olduğu üçün  Mərkəzi Seçki Komissiyasının saytına daxil oldum öz məntəqəmi tapdım və namizədi seçdim.  Ancaq bu, mənəm. İnterneti və kompüteri olmayan sadə vətəndaşlar nə etsinlər? Hesab edirəm ki, belə vəziyyətdə namizədlərin özləri və vətəndaşlar günahkardır. Əgər bizim məntəqədən yenə də Asim Mollazadə seçilərsə, söz verirəm ki, ondan çox şey tələb edəcəyəm. Eyni zamanda bizim mülkiyyətin Azərbaycan Respublikası Konstitusiyasının ən kobud şəkildə pozulması ilə sökülməsi məsələsində onun passivliyi yadımdadır.

Növbəti proqnoz FB-də populyar olan tarixçi Eldar Gineslidəndir. Keçmiş deputat Hadı Rəcəblinin fotosunu statusa qoyaraq yazıb:

-  Bu üz hamıya yaxşı tanışdır. Artıq əminliklə demək olar ki, bu, keçmişin, indinin və ən azı 2-3 çağırış MM-in siması olacaq. Hörmətli Hadi Rəcəblinin cəmi 73 yaşı var, güc, enerji, təzə fikirlər ilə doludur və yəqin ki, ölkənin və AR-də parlamentarizmin inkişafı üçün çox şey edə biləcək. Onun seçilməsi yeni tendensiyaların əyani sübutudur. Yəqin ki, AR-də sosial şəbəkələrin bağlanmasının vacibliyi barədə hələ iki il bundan əvvəl dilə gətirdiyi müqəddəs arzusunu bu dəfə reallaşdıracaq.—0-

 

Rəy yaz

Cəmiyyət

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti