İstixanalarda məhsul istehsalı ilə məşğul olan kiçik sahibkarların qarşılaşdıqları inzibati əngəllər müzakirə edilib

5 noyabr 2014-cü il tarixində Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının konfrans zalında “Örtülü torpaqlarda (istixanalarda) məhsul istehsalı ilə məşğul olan kiçik sahibkarların qarşılaşdıqları inzibati baryerlərin aşkara çıxarılması" mövzusunda dəyirmi masa keçirilib.

Sahibkarlığın və Bazar İqtisadiyyatının İnkişafına Yardım Fondunun (SBİİYF) sədri Sabit Bağırov bildirib ki, İTM-in ekspert qrupu istixana biznesinin mövcud vəziyyəti ilə bağlı tədqiqat aparmaqla bu sahədə sahibkarların işinə mane olan inzibati baryerlərin aşkara çıxarıb.

İTM-in aqrar məsələlər departamentinin rəhbəri Vahid Məhərrəmov rəsmi statistik göstəricilər əsasında qeyd edib ki, Azərbaycanın bu biznes növünün inkişafı üçün böyük potensiala və əlverişli iqlimə malik olmasına baxmayaraq, adambaşına düşən tərəvəz məhsullarının istehsalı və məhsuldarlığına görə bir sıra dünya ölkələrindən geridə qalır. 

Tədqiqat qrupunun üzvü Qalib Toğrul istixanaların qeydə alınması, tikintisi və fəaliyyəti ilə bağlı qanunvericiliyin tələblərindən danışıb, qaz, su və elektrik təchizatı ilə bağlı texniki şərtlərin alınması sahəsində sahibkarların üzləşdikləri çətinliklərdən bəhs edib. O, əksər istixanaların Vergilər Nazirliyindən qeydiyyatdan keçmədiyini, həmçinin bəzi istixanaların texniki tələblərə cavab vermədiyini vurğulayıb.

Dəyirmi Masada iştirak etmiş niderlandlı sahibkar Leonardus Sveegers istixana biznesinin Niderland təcrübəsindən, müasir texnologiyanın istixana təsərrüfatlarında tətbiqinin səmərəli nəticələrindən bəhs edib.

Müzakirələr Azərbaycanda kiçik sahibkarlığın inkişafına dəstək” layihəsi çərçivəsində keçirilib. ABŞ Beynəlxalq İnkışaf Agentliyinin (USAID) maliyyə dəstəyi ilə həyata keçirilir. Dəyirmi Masada özəl sektorun təmsilçiləri, hüquqşünaslar və ekspertlər iştirak ediblər. .  08D