"Bankların lisenziyasının ləğvi Elman Rüstəmovun idarəedici kimi zəifliyini göstərir" - Əkrəm Həsənov

Bakı/13.05.20/Turan: “Karantin zamanı hətta ən pis bankı bağlamaq düzgün deyil. Bu, çaxnaşma yaradır, əmanətçilər bir yerə yığılır və virusun yayılma təhlükəsi yaradır".

Bu barədə “Turan”a bank məsələləri üzrə ekspert Əkrəm Həsənov deyib.

O qeyd etdi ki, Azərbaycandan başqa dünyanın heç yerində pandemiya zamanı bir neçə bank bağlanmayıb.

“Problemlər vaxtında, yaranan zaman həll olunmalı idi. Qısa müddətdə Mərkəzi Bank dörd bankın lisenziyasını ləğv etdi. Ancaq onların hər birində vəziyyət fərqlidir ", deyə o bildirib.

Onun sözlərinə görə, “Atabank” birmənalı olaraq problemli bank idi və onu xilas etmək mümkün deyildi, lakin digərləri ilə bağlı vəziyyət fərqlidir.

Ə.Həsənov qeyd edib ki, Mərkəzi Bank bu məsələdə şəffaf deyil və bu bankların çoxlu problemli kreditlərinin olduğunu və məcmu kapitalının aşağı olmasını bəyan etməklə kifayətlənir.

“Əgər bu belədirsə, Azərbaycanda əksər banklar bağlanmalıdır. 2015-ci ildə baş verən iki devalvasiyadan sonra bütün bankların kredit portfeli problemli oldu. Lakin, əslində, hər şey kreditin verildiyi girovdan asılıdır. Bankın problemli krediti olsa, eyni zamanda müvafiq girovla kredit vermiş olsa, gec-tez pulunu qaytara biləcək. Bu vəziyyətdə Mərkəzi Bank vəziyyəti düzəltmək üçün bu banka kredit verməlidir", - o qeyd edib.

Ə.Həsənov xatırladıb ki, iflas edən “Standart” bank tərəfindən verilən kreditlərin 60%-i girovsuz idi və buna görə də onu xilas etmək mümkün deyildi.

“Ancaq bilirəm ki, “AGBank”da verilən kreditlər üçün kifayət qədər girov var idi. Başqa sözlə, bank borcluları məhkəməyə verə bilər və girovu satmaqla pulu geri qaytara bilərdi”, deyə ekspert vurğulayıb.

Mərkəzi Bankın sədri Elman Rüstəmov problemli kreditlərin olduğunu deyir, lakin bu kreditlər üçün girovun miqdarı barədə danışmır.

“Mərkəzi Bankın idarəçiliyi zəifdir. Bilirəm ki, Mərkəzi Bankda bank nəzarətini həyata keçirən şəxs bu sahəni ümumiyyətlə bilmir ”, - deyə o bidirib.

Ekspert qeyd edib ki, Mərkəzi Bankın idarəçiliyinin zəifliyi özünü bankları xilas etmək, sağlamlaşdırılması üçün iş aparmaq əvəzinə ən asan yolu seçməkdə göstərir, bu da lisenziyaların ləğvidir.

“Bankı xilas etmək üçün çoxlu iş görülməlidir. Onlar isə özlərinə əziyyət vermək istəmir”, - Ə.Həsənov hesab edir.

Digər tərəfdən, onun fikrincə, qapanan bank ləğvedici üçün dadlı tikədir.

"Əgər banka vəziyyəti xilas etmək üçün fürsət verilsə, o özü üçün mübarizə aparacaq, girovu satışa çıxaracaq qoyacaq və kreditləri qaytaracaq. Ancaq ləğvedici bunun qayğısına qalmır. Onun işi yalnız bankın əmlakının satılması və bundan pul qazanmasıdır. Bundan əlavə, buna görə “otkat” alacağı da istisna edilmir”, - o bildirib.

Xatırladaq ki, aprelin sonu və mayın əvvəlində Mərkəzi Bank dörd bankın – “Atabank”, “Amrahbank”, “NBC”, “AGBank”ın lisenziyasını ləğv edib.–71В-