Ekspedisiya Tovuzda neolit dövrünə aid məskəndə tədqiqatı yekunlaşdırıb

2009-cu ildən  müntəzəm fəaliyyətdə olan  Azərbaycan-Yaponiya Beynəlxalq arxeoloji ekspedisiyası cari ilin çöl-tədqiqat mövsümündə də işini davam etdirib. Bu haqda Turan- Azərbaycan Milli Elmlər Akademiyasının (AMEA) Aexeologiya və Etnoqrafiya İnstitutunun (AEİ) ictimaiyyətlə əlaqələrə məsul əməkdaşı Pərviz Qasımov bildirib. 

Ekspedisiyanın əsas tədqiqat obyekti Tovuz rayonunda aşkar edilən Göytəpə və Hacıəllamxanlı neolit dövrünə aid qədim yaşayış məskənləridir. Tədqiqat dövründə məskəndən götürülmüş nümunələrin, dünyanın qabaqcıl elmi mərkəzlərindən olan Tokio Universitetinin (Yaponiya) laboratoriyalarında radiokarbon, paleontoloji və paleobotanik analizləri aparılıb. Dünyanın nüfuzlu elmi jurnallarında dərc edilən təhlillərə görə, Hacıəlləmxanlı abidəsi Cənubi Qafqazda ən qədim neolit yaşayış məskəni kimi səciyyələndirilir. Göytəpə və Hacıəlləmxanlı neolit  kəndlərinin qədim əhalisinin iqtisadi və mədəni baxımdan həyat tərzi barədə təsəvvür yaradan və indiyədək elmə məlum olmayan bilgilər toplanır.  

AMEA AEİ-nin şöbə müdiri, tarix üzrə fəlsəfə doktoru, Tovuz arxeoloji ekspedisiyasının rəhbəri Fərhad Quliyevin və Tokio Universitetinin professoru, Ön Asiya neoliti üzrə tanınmış mütəxəssis, doktor Yoşihiro Nişiyakinin birgə rəhbərlik etdikləri adı çəkilən arxeoloji ekspedisiyası cari çöl-tədqiqat mövsümündə Hacıəlləmxanlı abidəsində işlərini yekunlaşdırıblar. Bölgənin digər neolit abidələrində yeni tədqiqatlara hazırlıq mərhələsini planlaşdırılır. Yaponiya ilə elmi əməkdaşlıq çərçivəsində, Azərbaycan arxeoloqları gələn il Tokio Universiteti nəzdindəki  arxeoloji muzeyin yenilənmiş sərgisinin açılış mərasiminə dəvət alıblar. Tokioda açılışı keçirələcək arxeoloji muzeyin yeni sərgisində Azərbaycan arxeologoiyasına həsr edilmiş xüsusi bölmə yaradılması gözlənilir.-05D-