İran Azərbaycana münasibətdə mədəniyyət diploamtiyasına üstünlük vermək istəyir

İranın Azərbaycan səfirliyi yanında Mədəniyyət Mərkəzinin rəhbəri İbrahim İbrahimi çərşənbə günü jurnalistlər üçün mətbuat konfransı keçirib.

Bugünki mətbuat konfransının tanışlıq xarakterli olduğu və bundan sonra mətbuat təmsilçilərilə mərkəzin əlaqələrinin sıxlaşacağı vədi verilib. Mədəniyyət sahəsində əməkdaşlığın gücləndirilməsinin dövlətlər və millətlər arasında əlaqələrin güclənməsinə təkan verəcəyi iddia edilib. Bu əlaqələrin sıxlaşmasında mətbuatın xüsusi gücə malik olduğu iddia edilib. Azərbaycan və İran mədəniyyətlərinin musiqi, kino, incəsənət, muğam və s. baxımdan bir-birinə çox yaxın olduğu, ikinci belə iki ölkə olmadığı xüsusi vurğulanıb. “Azərbaycan İrandan sonra ikinci şiə ölkəsidir və bu da bizim ortaq dəyərlərimizdən biridir”, - deyə İ.İbrahimi iki ölkə arasında məzhəbçiliyi ortaq dəyərlərdən biri kimi qiymətləndirib.

İranda 35 milyon nəfər Azərbaycan türkünün olduğu qeyd olunub və bu məsələnin də İran-Azərbaycan əlaqələrinə xüsusi təsir göstərdiyi nəzərə çatdırılıb. “Ola bilər ki, dövlətlərin iqtisadi, siyasi sahələrdə fəqrli baxışları olsun, amma elmi-mədəni sahə əməkdaşlıq üçün geniş meydan verir”, - deyə mərkəz rəhbəri mövqeyini açıqlayıb. Eyni zamanda, konkert ad çəkilmədən bəzi qüvvələrin İranla Azərbaycanın yaxınlaşmasına mane olduğu iddia edilib.

İranın Azərbaycanla mədəni əlaqələri gücləndirməkdə maraqlı olduğu deyilib. İranın Azərbaycanda, Azərbaycanın isə İranda mədəniyyət günləri və həftəsinin keçirilməsi nəzərdə tutulduğu qeyd olunub. Kino, musiqi, rəssamlıq sahəsində əmədaşlıq üçün geniş imkanlar olduğu xatırladılıb. Bundan əlavə, ziyalılar, universitet müəllimləri arasında əlaqələr yaradılması təklifi irəli sürülüb. Azərbaycanda İran filmləri, İranda Azərbaycan filmləri festivalının keçirilməsinin gözlənildiyi ifadə edilib. Kinematoqrafiya sahəsində əməkdaşlıq üçün əlaqələr olduğu deyilib. İran və Azərbaycan müharibə yaşayan ölkələr olduğu üçün hərbi sahədə müştərək filmlər yaratmaq üçün imkanlar olduğu ifadə edilib. Belə əməkdaşlığın mədəniyyətləri birbirinə sıx şəkildə yaxınlaşdıra bildiyi söylənib.

Hər iki ölkənin milli orkestrlərinin birgə konsert proqramı ilə çıxış etməsinin də nəzərdə tutulduğu qeyd edilib. “İran tərəfi belə layihələrə tərəfdardır və “mədəniyyət diplomatiyası” qonşularla sıx münasibətlər yaratmaqda əvəzsiz rola malikdir”, deyə İ.İbrahimi qeyd edib. İran və Azərbaycan kino sənətçilərinin “Səkkizinci səma” adlı ilk müştərək filminin artıq hazır olduğu və İranda nümayiş etdirildiyi deyilib. Bu ilin sentyabrında Bakıda mərhum şair Şəhriyar, Təbrizdə isə şair Füzuli ilə bağlı tədbir keçirilməsi nəzərdə tutulur. 

Daha sonra əlaqələrin gücləndirilməsi üçün Azərbaycan jurnalistlərinin İrana səfərlərinin təşkili də vasitələrdən biri sayılıb. Belə qarşılıqlı səfərlərin, turizm sahəsində əməkdaşlığın İranı və Azərbaycanı bir-birinə tanıtdıra biləcəyi iddia edilib. -05C-