BMT ASAN xidmətin təcrübəsini bölüşməyi təklif edir

Bakı/23.03.18/Turan: Cümə axşamı Cenevrədə BMT İnsan Hüquqları Şurasının 37-ci sessiyasında Azərbaycanın təşəbbüsü ilə "Dövlət xidmətlərinin şəffaf, məsuliyyətli və səmərəli çatdırılması vasitəsilə insan hüquqlarının və davamlı inkişaf məqsədlərinin təşviqi" adlı qətnamə yekdilliklə qəbul edilib. Bu barədə Azərbaycan Xarici İşlər Nazirliyinin martın 22-də yaydığı məlumatda deyilir. Məlumatda deyilir ki, qətnamə dünyanın qlobal inkişaf proqramını müəyyən edən BMT-nin davamlı inkişaf məqsədlərinin 2015-ci ildə qəbul olunmasından bəri BMT-nin İnsan Hüquqları Şurasının çərçivəsində Azərbaycanın təşəbbüsü ilə qəbul edilmiş ilk sənəddir: "Qətnamənin irəli sürülməsində məqsəd ölkəmizin korrupsiyaya qarşı mübarizə sahəsində mühüm nailiyyətlərimizdən biri hesab edilən "ASAN Xidmət" konsepsiyasına əsaslanan "dövlət xidmətlərinin şəffaf, məsuliyyətli və səmərəli çatdırılması" prinsipinin BMT sistemi daxilində təşviq edilməsidir".

Qətnamədə dövlət xidmətlərinin innovativ yanaşmalarla insan hüquqlarının müdafiəsinə verdiyi töhfə vurğulanır və BMT üzv ölkələri sahədə uğurlu modellər təcrübələrini digərləri ilə bölüşməyə dəvət edir.

Sənəddə BMT qurumları və digər beynəlxalq təşkilatlar mövcud olan uğurlu təcrübələri təşviq etməyə və mükafatlandırmağa davam etməyə çağırılır

Xatırladaq ki, Azərbaycan tərəfindən irəli sürülmüş bu qətnaməyə BMT-nin bütün coğrafi və siyasi qruplaşmalarını təmsil edən 87 dövlət həmmüəllif qismində qoşulub. 2015-ci ildə "ASAN Xidmət"in təltif edildiyi "BMT-nin Dövlət Xidmətləri Mükafatı"nı dövlət xidmətlərinin göstərilməsi sahəsində dünyanın ən nüfuzlu mükafatı sayılır.

"ASAN xidmət" mərkəzlərinin də daxil olduğu Vətəndaşlara Xidmət və Sosial İnnovasiyalar üzrə Dövlət Agentliyi 2012-ci ilin iyulunda yaradılıb.İlk "ASAN xidmət" mərkəzi 2013-cü ildə yaranıb və hazırda 13 mərkəz fəaliyyət göstərir.