İlham Əliyev: Enerji təhlükəsizliyi Azərbaycan və Aİ münasibətlərinin gündəliyinin mühüm hissəsidir

Bakı/18.07.21/Turan: Azərbaycan və Avropa İttifaqı qarasında güclü siyasi təmaslar, əlbəttə ki, əməkdaşlığın şaxələndirilməsi üçün çox yaxşı təməl yaradır, bu barədə iyulun 18-də prezident İlham Əliyev Aİ Şurasının prezidenti Şarl Mişellə danışıqları başa çatdıqdan sonra mətbuat konfransında bildirib.

Avropa İttifaqı bizim əsas ticarət tərəfdaşımızdır. Ticarətimizin demək olar ki, 40 faizi Avropa İttifaqı ilə aparılır. Ötənilki ticarət dövriyyəsi demək olar ki, 9,5 milyard ABŞ dolları idi. Azərbaycanın Avropa İttifaqına üzv dövlətlərlə ixracının həcmi 6,8 milyard ABŞ dolları təşkil edir. Üzv dövlətlərdən 1700-dən çox şirkət Azərbaycanda fəaliyyət göstərir. Bu, həmçinin bizim iqtisadi fəaliyyətimizin miqyasını nümayiş etdirir. Biz üzv dövlətlərlə ikitərəfli əlaqələrdə çox fəalıq. Azərbaycan Avropa İttifaqının 9 üzv dövləti ilə strateji tərəfdaşlıq haqqında sənədlər imzalayıb və ya qəbul edib”, deyə Əliyev qeyd edib.

Onun sözlərinə görə, “gündəliyimizin mühüm hissəsi, sözsüz ki, enerji təhlükəsizliyi ilə bağlıdır”.

O, bu sahədə “tarixi nailiyyətlər” arasında “Cənub Qaz Dəhlizi layihəsinin tamamlanmasını” göstərib.

“Trans-Adriatik kəməri artıq istismara verilib. Yanvarın 1-dən bu günədək Azərbaycandan Avropa İttifaqına üzv dövlətlərə, xüsusilə İtaliya, Yunanıstan və Bolqarıstana 3 milyard kubmetrdən çox təbii qaz ixrac olunub. Əlbəttə ki, Avropa bazarına ixrac olunacaq təbii qazın həcmi artacaq”, deyə Əliyev qeyd edib.

O xatırladıb ki, “uzun illərdir - artıq 15 ildir ki, Azərbaycan Avropa istehlakçılarının etibarlı xam neft təchizatçısıdır”. “İndi sözsüz ki, qaz təchizatçısı kimi bizim potensialımız artacaq və bu, ixracatçı olaraq bizim üçün, tranzit ölkələr üçün və istehlakçılar üçün daha çox imkanlar yaradacaq. Çünki Azərbaycan qazı təkcə yeni marşrutdan olan qaz deyil, yeni mənbədən olan qazdır və bu, layihəni həqiqətən də enerji təhlükəsizliyi layihəsinə çevirir”, deyə Əliyev vurğulayıb.

O qeyd edib ki, Mişellə danışıqlarda nəqliyyat sahəsində əməkdaşlıq məsələləri müzakirə olunub.

“ötən il 10 noyabr tarixli üçtərəfli razılaşmada əks olunduğu kimi, regionda bütün kommunikasiyaların açılması üçün yeni imkanlar var. Beləliklə, bu məsələ, eləcə də regionda münaqişədən sonrakı inkişafla bağlı başqa məsələlər bu gün geniş şəkildə müzakirə olundu”, deyə Əliyev bildirib.

“Azərbaycan ərazilərinin uzun müddət Ermənistan tərəfindən işğalına son qoydu və BMT Təhlükəsizlik Şurasının qətnamələrini özü yerinə yetirdi”, deyə o qeyd edib. “Azərbaycan müharibəyə son qoydu. Ona görə də indi sülh barədə düşünmək və səhifəni çevirmək vaxtıdır”, deyə o əlavə edib.

“Bu gün biz cənab Prezidentlə planlarımızı, təşəbbüslərimizi və yeni yaranmış vəziyyətə yanaşmalarımızı geniş şəkildə müzakirə etdik”, deyə Əliyev bildirib. -06D-