Səməd Seyidov ümid edir ki, sanksiya olmayacaq

Bakı/24.01.18/Turan: "Avropa Şurası ilə gərginliyi biz yaratmamışıq ki onu da aradan qaldıraq", - AŞPA-da Azərbaycan nümayəndə heyətinin rəhbəri Səməd Seyidov İlqar Məmmədovun işilə bağlı Azərbaycanla Avropa Şurası arasında yaranmış gərginliyin aradan qaldırılması yollarını şərh edərkən deyib.

S.Seyidov bildirib ki, Azərbaycan Avropa İnsan Hüquqları Məhkəməsinin bütün qərarlarına hörmətlə yanaşır. Bununla yanaşı, o, Avropa İnsan Hüquqları Məhləməsində İlqar Məmmədovun işi üzə xüsusi prosedurun başa çatmasını gözləməyin vacibliyini qeyd edib.

"İlqar Məmmədovun işi ilə bağlı Avropa İnsan Hüquqları Məhkəməsində xüsusi prosedur işə salınıb. Bu məsələyə Avropa İnsan Hüquqları Məhkəməsində baxıldığına görə nə Avropa Şurası, nə AŞPA, nə də hansısa başqa tərəf bu işə müdaxilə edə bilməz. Bu məsələ ilə bağlı səbrli olmaq lazımdır. Azərbaycan hər zaman Avropa Şurası ilə əməkdaşlıq edib, bundan sonra da edəcək", - S.Seyidov Turan-a müsahibəsində bildirib.

Azərbaycana qarşı mümkün sanksiyalara gəlincə, S.Seyidov qeyd edib ki, sanksiyaları tətbiq edən tərəflər bundan daha çox əziyyət çəkir, nəinki sanksiya tətbiq edilən tərəf.

REAL Hərəkatının lideri İlqar Məmmədov 2013-cü il yanvarın 23-24-də baş vermiş İsmayıllı hadisələri ilə əlaqədar həbs olunub. Şəhərə asayiş bərpa olunduqdan sonra getməsinə baxmayaraq, İ.Məmmədov kütləvi iğtişaşların təşkilində, polisə müqavimət göstərməkdə ittiham olunaraq 7 il azadlıqdan məhrum edilib.

2014-cü ilin mayında AİHM qərara alıb ki, İ.Məmmədovun həbs edilməsi və həbsdə saxlanılması Avropa konvensiyasının bir çox müddəasının pozulması ilə müşayiət edilib və onun azadlığa buraxılmasını tələb edib.

Bu il dekabrın 5-də Avropa Şurası Nazirlər Komitəsi İlqar Məmmədovun qeyd-şərtsiz azad edilməsi çağırışına riayət etmədiyinə görə Azərbaycana qarşı prosedura başlayıb.

Avropa İnsan Haqları Məhkəməsi bu qənaətə gəlib ki, İlqar Məmmədova qarşı görülən tədbirlər onun susdurulması və cəzalandırılması məqsədi daşıyır.

Məhkəmə Avropa İnsan Hüquqları Konvensiyasının 5 (azadlıq və toxunulmazlıq hüququ), 6 (ədalətli məhkəmə araşdırılması hüququ) və 18-ci (hüquqlarla bağlı məhdudiyyətlərdən istifadə hədləri) maddələrinin pozulduğunu müəyyən edib.16D06--