Hüquqşünas: �Dənizə giriş məhdudlaşdırılmamalıdır�

Bakı/17.07.19/Turan: Azərbaycan Əmlak Məsələləri Dövlət Komitəsi Xəzər dənizindən 20-50 metr məsafədə sahildə yerləşən torpaq sahələrinin istifadəsinə nəzarətin gücləndirilməsi məqsədilə monitorinq qrupları yaradıb.

Monitorinq əsasən Bakının Qaradağ, Xəzər, Suraxanı, Binəqədi rayonları ərazisində sahili və Sumqayıt şəhərini əhatə edib.

Monitorinq zamanı sahil zolağında torpaq sahələrinin qanunsuz istifadəsi faktları aşkarlanıb.

Xəzər dənizinin mühafizə zolağına aid ərazilərin qeyri-qanuni istifadəsi faktı üzrə İnzibati Xətalar Məcəlləsinin248-ci maddəsinə əsasən protokollar tərtib edilib.

Xəzər dənizinin sahilboyu 20-50 metrlik zolağına aid olan torpaq sahələri ilə bağlı tələblərin pozulmasına görə fiziki, vəzifəli və hüquqi şəxslər müvafiq olaraq 4 min manat, 8 min manat və 40 min manat cərimələnir.

Həmçinin vəzifəli şəxslərin hərəkətində cinayət əməli əlaməti olarsa, onları 7 ildən 10 ilədək müddətə azadlıqdan məhrumetmə cəzası gözləyir.

Sahil zolağının qanunsuz istifadəsinə görə 80 hal üzrə inzibati xətalar haqda protokol tərtib edilib.

CM-in 188-ci maddəsinə əsasən 76 fakt üzrə materiallar toplanıb və iş DİN-ə göndərilib.

39 işlə bağlı məhkəmələrdə iddia qaldırılıb.

Bəzi hallarda sahil zolağından qanunsuz istifadə əhalini dəniz sahilində dincəlmək imkanlarından məhrum edir. Həmçinin qeyd olunur ki, hasarlama işləri yalnız qəfəsəli olmaqla uzunluğu 200 metrdən çox olmamalıdır. Hər 200 metrdən sonra dəniz sahilinə 6 metr enində gediş-gəliş yolu saxlanılmalıdır.

Öz növbəsində ekspertlər və sosial şəbəkələrin istifadəçiləri vaxtaşırı Xəzər sahilində hündür daş hasarla hasarlanmış villalar barədə video və foto yerləşdirirlər.

Bəzi hallarda villaların qarşısında dənizin içərisinə doğru da bir neçə metr hündürlüyü olan keçilməz hasarlar olur.

Hüquqşünas Aslan İsmayılov vəziyyəti bərbad adlandırıb.

"Əvvəllər qanunvericilikdə dəniz sahilində 120 metrədək ərazidən istifadə etmək olmazdı. Sonra oliqarxlar bu məsələyə girişdi, məsafəni 50 metrədək azaltdılar. Bu gün Xəzərin sahilində demək olar ki, vətəndaşların dəniz sahilinə ayaq basması üçün yer yoxdur. Hamısı zəbt olunub. Dəniz sahilində fərdi şəxslər bağlar tikib, beşmetrlik hasar tikib, 5 hektar da torpaq alıblar. Bu şəxlsər Azərbaycanda bir dəfə də dənizə girmirlər, dənizə ancaq xaricdə gedirlər, İtaliyada, İspaniyada və s. ölkələrdə", - A.İsmayılov deyib.

Digər tərəfdən sahilin bir hissəsini pullu çimərliklər tutub. O qeyd edib ki, dünyanın heç bir yerində dəniz sahili hasarlanmır.

A.İsmayılov hasarlama işlərinin yalnız qəfəsəli olmaqla uzunluğunun 200 metrdən artıq olmaması ilə bağlı təəccübünü bildirib.

"Əgər söhbət hasarlamadan gedirsə, deməli, oradakı mövcud hasarları rəsmiləşdirirlər. Dəniz sahilinə heç nə ilə giriş məhdudlaşdırılmamalıdır", - A.İsmayılov qeyd edib.-03B-