Azərbaycanda insan hüquqları ilə bağlı vəziyyət ağırlaşır

Bakı/11.06.21/Turan: Siyasi icmalçı Nəsimi Məmmədli Turan İnofrmasiya Agentliyinin "Çətin sual" proqramında 14 iyul 2020-ci il tarixində mitinq zamanı baş vermiş insidentdə ittiham olunanların işi üzrə məhkəmə prosesinin gedişini, Rusiyanın xarici işlər naziri Sergey Lavrovun Dağlıq Qarabağın statusu məsələsinə toxunması və digər siyasi məsələləri şərh edib.

Məmmədlinin sözlərinə görə, Qarabağı işğaldan azad etmək çağırışı ilə çıxış etmiş şəxslərin hərəkətlərinə hakimiyyətin reaksiyası qeyri-adekvatdır. Məhkəmə araşdırması ilə müəyyən edilib ki, Xalq Cəbhəsinin fəalları və digərləri hüquqazidd əməllər törətməyiblər.

Hüquq-mühafizə orqanlarının və məhkəmənin yanaşması təəccüb doğurur. Prinsipcə, onlar fəallardan üzr istəməli və onlara dəyən zərəri ödəməliydilər. Məhkəmə prosesi zamanı prokurorun təqsirləndirilən şəxslərin şərti olaraq mühakimə olunmasını istəməsi faktının özü göstərir ki, hakimiyyət başa düşür ki, hədləri aşır və fəalların həbsləri cəmiyyətdə anlayışla qarşılanmayacaq.

Məmmədli qeyd edib ki, son on il ərzində Azərbaycanda insan hüquqları ilə bağlı vəziyyət daha da gərginləşir. Zaman-zaman hakimiyyət lazım bildikləri vaxt vətəndaşları həbs edir, azad edir, sonra yenə də həbs edir, bəzən hətta işgəncələrə məruz qoyur. Belə təcrübəyə son qoyulmalıdır.

Bu günlərdə Rusiyanın xarici işlər naziri Sergey Lavrovun Dağlıq Qarabağın statusu məsələsinə toxunmasına gəlincə, nazir deyib ki, “Dağlıq Qarabağın statusu məsələsi ATƏT-in Minsk Qrupu həmsədrlərinin (Rusiya, ABŞ, Fransa) iştirakı ilə razılaşdırılmalıdır, amma indi yox”.

Siyasi şərhçi xatırladıb ki, əvvəllər Rusiya prezidenti Vladimir Putin də status məsələsinin hələ həll olunmadığından və qarşıda onun razılaşdırılmalı olduğundan danışıb. Bu, bir tərəfdən Azərbaycana təzyiq göstərmək, xalqın birliyinə zərbə vurmaq, digər tərəfdən isə Qarabağın taleyinin böyük dövlətlərin əlində olduğunu göstərmək məqsədilə edilir.

"Biz yaxşı xatırlayırıq ki, əvvəllər də bizə işarə edirdilər ki, işğal olunmuş ərazilərin qaytarılması yalnız Qarabağa status verilməsilə mümkündür", - Məmmədli deyib və əlavə edib ki, beynəlxalq birlik bilməlidir ki, bu, olmayacaq. nun olmayacağını anlamalıdır.

Məmmədli qeyd edib ki, 44 günlük müharibə zamanı Ermənistan Silahlı Qüvvələri, demək olar ki, darmadağın edildi. Odur ki, Rusiya Ermənistanın tamamilə məğlub olmasına yol verməmək üçün Qarabağa qoşun yeritməyə məcbur oldu. Bu, mesaj idi: Ermənistana - sizin xilaskarınız bizik, Azərbaycana - son söz həmişə bizimdir. Ancaq əslində Rusiya yeni müharibədə o qədər də maraqlı deyil. Çünki əgər müharibə qızışarsa, digər oyunçuların da oraya cəlb olunmayacağına heç bir zəmanət yoxdur.

Vəziyyət Rusiya üçün həm də onunla mürəkkəbləşir ki, erməni ictimaiyyəti Qərbpərəst əhval-ruhiyyədədir, ölkədəki bir çox institutlar da bu əhval-ruhiyyədədir, kilsədə də, diasporun əksər hissəsində də Qərbpərəst əhval-ruhiyyə hökm sürür. Ona görə də Rusiya özünün 5-ci kolonunun köməyilə Ermənistanda öz mövqelərini möhkəmləndirmək istəyir.

İyunun 8-də Ermənistanın baş naziri Nikol Paşinyanın Azərbaycan prezidenti İlham Əliyevə müraciə edərək onun oğlunun bütün erməni hərbi əsirlərə dəyişdirilməsini təklif etməsinə gəlincə, bu, daxili auditoriya üçün nəzərdə tutulmuş populizm və dünya birliyinə apellyasiyadır. Buna heç diqqət yetirmək lazım deyil.—0-