"Tərtər işi"nin üstü niyə açılmır?

Bakı/23.11.21/Turan: Azərbaycan ordusunun 1-ci korpusunun hərbi hissələrindən birinin kəşfiyyat bölməsinin komandiri Elmar Allahverdiyev səs-küyə səbəb olan "Tərtər işi" ilə əlaqədar amansız işgəncələrə məruz qalan hərbiçilərdən biridir.

Elmar Allahverdiyev Ali Baş Komandan İlham Əliyev tərəfindən 2016-cı ilin aprel döyüşlərində Tərtər rayonunda yerləşən N saylı hərbi hissədə komandiri olduğu kəşfiyyat bölməsi ilə birlikdə göstərdiyi cəsarətə görə qızıl saatla təltif edilib. Amma bir il sonra, 2017-ci ilin mayında o, "Tərtər işi" ilə əlaqədar həbs edilib və istintaq zamanı ən amansız işgəncələrə məruz qalıb. Bundan sonra Elmar Allahverdiyev tərxis edilib. Bununla belə, İkinci Qarabağ müharibəsində könüllü olaraq iştirak edib.

"Tərtər işi" Silahlı Qüvvələrin, prokurorluğun yüksək rəhbərliyi tərəfindən saxtalaşdırılıb. İşin mahiyyəti ondan ibarətdir ki, 2016-cı ilin aprelində baş komandanın verdiyi tapşırığa uyğun olaraq Qarabağın şimalında işğal edilmiş ərazilərin bir hissəsi azad edilməli idi. Amma yüksək komandanlığın əmri ilə əlavə ordu hissələri mövqe tutmaq üçün xüsusi təyinatlıların yanına gəlməyib. Ordu komandanlığının satqınlığının arxasında hansı səbəblərin durduğu hələlik açıqlanmır. SQ komandanlığı öz satqınlığını ört-basdır etmək üçün "Tərtər işi"ni saxtalaşdırıb. Yüzlərlə əsgər işgəncələrə məruz qoyulub və işgəncələr altında erməni kəşfiyyatına işlədiklərini etiraf etmək məcburiyyətində qalıblar. Beləliklə, SQ-dəki real satqınlar öz cinayətlərinin üstünü örtməyə çalışıblar. Cinayətin üstü Dövlət Təhlükəsizliyi Xidməti tərəfindən açılıb və təfərrüatı barədə prezidentə məlumat verilib. Naməlum səbəblərdən satqınlıqda və diversiyada təqsiri olanlar, zorakılıq və terror qurbanları tərəfindən açıq şəkildə ifşa olunmalarına baxmayaraq, hələ də vəzifədədirlər. 

Kapitan Elmar Allahverdiyev "Çətin sual" verilişinə istintaq zamanı amansız işgəncələr və İkinci Qarabağ müharibəsi zamanı yaşadıqları barədə danışıb.

O, Tərtərdə baş verənləri soyqırım kimi səciyyələndirib. 

Allahverdiyevin sözlərinə görə, 2016-cı ilin aprelindəki döyüşlərdən sonra müdafiə naziri Zakir Həsənov baş komandan prezident İlham Əliyevə Seysulan və Talış kəndlərinin işğaldan azad edildiyi barədə məlumat verib. Amma əslində satqınlıq nəticəsində bu kəndlər azad edilməmişdi və düşmənin əlində qalırdı.

"2017-ci ilin may hadisələri ("Tərtər hadisələri") ilk növbədə prezidentə yalan məlumat verilməsi ilə bağlı idi - guya kütləvi satqınlıq törədən struktur aşkar edilib, bunun nəticəsində düşmən əks hücuma keçərək, guya bizim azad etdiyimiz Seysulan və Talış kəndlərini öz nəzarəti altına qaytarıb", deyə Allahverdiyev bildirib.

O qeyd edib ki, onun rəhbərlik etdiyi Tərtər rayonunun N saylı hərbi hissəsinin kəşfiyyat bölməsi 60-a yaxın döyüş tapşırığını uğurla yerinə yetirib və müdafiə naziri dəfələrlə bölmənin hərbiçilərini mükafatlandırıb.

"Düşmən məni də, bölmənin şəxsi heyətini də tanıyırdı. Siyahı əvvəlcədən hazırlanmışdı (may - "Tərtər" hadisələrinin siyahısı). Xüsusilə aprel döyüşlərində fərqlənənlərə böhtan atır, satqınlıqda ittiham ediblər, işgəncələrə məruz qoyublar, Seysulan və Talışda törədilən satqınlıqda ittiham ediblər", - deyə o bildirib.

Allahverdiyev qeyd edib ki, Seysulan və Talış kəndləri uğrunda döyüşlərdən əvvəl plan işlənib hazırlanmışdı, onun əsasında təlimlər keçirilmişdi. Plana əsasən bilavasitə döyüşdən əvvəl keçidlər minalardan təmizlənməli idi, bu keçidlərdən onun bölməsi düşmən mövqelərinə yaxınlaşmalı, hücum etməli və bu mövqelərdən düşməni çıxarmalı idi. Bunun ardınca motoatıcılar yetişməli və alınmış xətlərdə möhkəmlənməli idilər. 

Amma döyüş zamanı məlum olub ki, keçidlər minalardan təmizlənməyib.

"Satqınlıq elə buradan başlayıb. Satqın ilk növbədə korpus komandiri Hikmət Həsənovdur. O, keçidlərin minalardan təmizlənmədiyini çox yaxşı bilirdi. O, gülləsiz əsgərləri döyüşə göndərib, düşmənin istehkamları ələ keçirildikdən sonra isə onları qoruyub saxlamaq üçün əlavə qüvvə göndərməyib. Biz yalnız atıcı silahla silahlanmış 19 nəfər idi və təbii ki, zirehli texnika qarşısında dayana və bu mövqeləri əlimizdə saxlaya bilməzdik. Və ümumiyyətlə, kəşfiyyatçıların vəzifəsi mövqeləri saxlamaq, müdafiə etmək deyil. 

Komandanlığın bu əməlləri nəticəsində Talışda 100-ə yaxın xüsusi təyinatlını şəhid verdik", deyə kəşfiyyatçı bildirib.

Allahverdiyevin sözlərinə görə, Seysulan istiqamətində onun bölməsi dəstəksiz qalıb. Amma onun və bölməsinin bəxti gətirib. Burada düşmən ərazisinə nüfuzetmə dərinliyi Talışdakı kimi 7-8 km deyil, 400 m idi. Buna görə o, şəxsi heyəti snayper atəşi altından çıxarmağa müvəffəq olub.

"Amma döyüşlə ələ keçirilmiş mövqeləri tutmalı olan motoatıcılar və onların komandanlığı qaçırdı. Onlar minaatan və snayperlərin atəşinə tutulublar...", deyə kapitan qeyd edib.

Bundan sonra, hərbiçinin iddiasına görə, ona Bakıdan yoxlamaya gələnlərə və baş komandana yalan məlumat verməyi əmr ediblər. Bu qərarı Zakir Həsənov, Baş Qərargah rəisi Nəcməddin Sadıqov və 1-ci korpusun komandiri Hikmət Həsənov qəbul edib. O, bunu etməyib. Buna görə də "Tərtər işi"nin fiqurantı olub. -0-