Sahibkar Əmlak Məsələləri üzrə Dövlət Komitəsindən şikayətlə Baş Prokurorluğa müraciət edib

Belə ki, keçən ayın sonunda iş adamı İsgəndər Qurbanov ƏMDK əməkdaşlarından şikayət ərizəsi ilə redaksiyaya müraciət etmişdi. Sənəddə deyilirdi ki, Əmlak Məsələləri üzrə Dövlət Komitəsinin əməkdaşları İ. Qurbanovu onun Bakı şəhər İcra hakimiyyəti başçısının 04.11.2016-cı il tarixli 460 saylı sərəncamı ilə ona bu məqsədlər üçün ayrılmış 28 hektar ərazidə Fransanın "Rişel" şirkətinin iştirakı ilə tikdiyi istixana kompleksini dağıdacaqları ilə hədələyirlər.

Həmin materialın yerləşdiyi ünvan: http://www.turan.az/ext/news/2017/7/free/economics%20news/ru/64458.htm

Fəqət bu da hələ işin hamısı deyil. ƏMDK-ni hətta sözügedən obyektin Azərbaycan İqtisadiyyat Nazirliyinin investisiyaların təşviqi proqramı ilə əhatə olunduğu və onun həyata keçirilməsi üçün Sahibkarliğa Kömək Milli Fondunun xətti ilə (SKMF) güzəştli kredit ayrıldığı da dayandırmadı. İ. Qurbanovun sözlərinə görə, ilkin olaraq layihə 250 yeni iş yerinin açılması və $10 mln. məbləğində illik tərəvəz istehsalı üçün nəzərdə tutulub. Belə çıxır ki, paytaxt icra hakimiyyəti və İqtisadiyyat Nazirliyi ilə razılaşdırılmış və SKMF-in güzəştli krediti üzrə demək olar ki, tamamlanmış layihə qəflətən Əmlak Məsələləri üzrə Dövlət Komitəsinin ürəyincə deyil. Gördüyünüz kimi, cəfəngiyatla rastlaşmışıq, çünki vətəndaşlar dövlət orqanlarının razılaşdırılmamış qərarlarına görə məsuliyyət daşımırlar. Amma hər şeyi öz sırası ilə...

Sahibkarın maraqlarını təmsil edən hüquqşünas Eldar Həsənov redaksiya ilə söhbətində ƏMDK-nın əməkdaşlarının öz hərəkətlərinı nə ilə əsaslandırıqları barədə suala cavab olaraq bunları deyib: "Düz üç gün, iyulun 25-dən başlayaraq, Əmlak Məsələləri üzrə Dövlət Komitəsinin işçiləri istixana kompleksinin sahiblərini artıq 90%-i tikilmiş obyektin inşasını vəziyyəti aydınlaşdırmaq üçün dayandırmağı tələb edərək qorxudurlar. Öz ad və soyadlarını çəkmədən, onlar bəyan ediblər ki, ağır texnika ilə istixananı sökməyə gələcəklər. Dəlillərdən biri kadastrdan çıxarışın olmaması idi, halbuki çıxarış üçün biz bu ilin hələ mart ayında həmin bu quruma müraciət etmişik. Qanuna görə, artıq bir aydan sonra çıxarış verilməli idi, lakin bunu indiyədək etməyiblər. Yəni məmurlar özləri qəsdən məhz bu vəziyyətin yaranmasına nail olurdular".

"Amma başlıcası budur ki, bizdə olan məlumata görə, sən demə, icra başçısı öz sərəncamını ƏMDK ilə razılaşdırmayıb. Bu dəlil, yumşaq desək, mənasızdır, çünki vətəndaşlar idarələrarası problemlərə görə məsuliyyət daşımırlar. Bu halda isə həmin məsələni Bakı Şəhər İcra Hakimiyyəti və Əmlak Məsələləri üzrə Dövlət Komitəsi öz aralarında həll etməli idi", - deyə E. Həsənov bildirib.

Sahibkarın Baş Prokurorluğa müraciət etməkdən başqa yolu qalmamışdı: "Keçən ayın sonunda Baş Prokurorluğa ərizə verildi, bundan sonra təzyiqlər sanki kəsildi və ƏMDK-in nümayəndələri obyektə daha gəlmirlər", - deyə hüquqşünas vurğuladı və qeyd etdi ki, prokurorluğun müraciətə reaksiyası tezliklə gözlənilir.

Baş verən hadisəyə hüquqi qiymət verilməsi üçün "Turan" Vəkillər Kollegiyasının üzvü, tanınmış hüquq müdafiəçi Əkrəm Həsənova müraciət edib. Ekspertin sözlərinə görə, baş verənlərin əsl səbəbləri aydındır və dövlət orqanları arasında mübarizənin korrupsiya tərkib hissəsi haqda sübutedici baza olmadan, bu problemin üzərində dayanmaq düzgün deyil. Ekspert problemin dərinliyinə baxmağı təklif etdi:

- Gəlin, həmin məsələyə bu cür baxaq: axı dövlət və dövlət orqanları nə deməkdir? Mülki Məcəllənin 43-cü maddəsinə görə, hüquqi şəxs dövlət orqanları deyil, dövlətin özüdür, yəni dövlət orqanları hüquq subyektləri deyil. Sadə misal üzərində izah edim: Məsələn, səhmdar cəmiyyəti ilə iş apararkən, sizin üçün məhz hansı vəzifəli şəxsin sizinlə hansısa bir sənəd və ya müqavilə imzaladığının fərqi yoxdur. Bu, idarə heyətinin sədri, idarə heyətinin özü, müşahidə şurası və s. ola bilər, amma vətəndaş üçün bu, əsas deyil, çünki sənədi təşkilat imzalayıb.

Analoji olaraq, əgər sənəd dövlət idarəsi tərəfindən verilibsə, bu o deməkdir ki, onu dövlət imzalayıb. Hüquqi şəxs olaraq, dövlət öz səlahiyyətlərini hüquq subyektləri olmayan dövlət orqanları vasitəsi ilə həyata keçirir. Beləliklə, idarələrarası məsələlər idarələrin özləri səviyyəsində həll olunmalıdır. O cümlədən, vətəndaşlar Əmlak Məsələləri üzrə Dövlət Komitəsi və şəhər icra hakimiyyəti arasında fikir ayrılığına görə məsuliyyət daşımırlar.

Və ən başlıcası, Azərbaycan Konstitusiyasının özbaşınalıqdan mühafizə və vicdanlı davranış görmə hüququnun qorunması haqqında olan 68-ci maddəsində deyilir ki, hər kəsin özünə qarşı dövlət orqanları tərəfindən özbaşınalığı istisna edən vicdanlı davranış görmə hüququ var. Daha sonra, başa düşmək lazımdır ki, dövlət onun orqanları və ya vəzifəli şəxsləri tərəfindən vurulmuş ziyanı ödəməyə borcludur. Məsələn, əgər dövlət orqanları, səlahiyyətlərini aşaraq, nəyə isə icazə veribsə, dövlət kompensasiya ödəməli və məmurları cəzalandırmalıdır.

Sabunçu rayonunun Maştağa qəsəbəsindəki istixana kompleksi ilə bağlı hadisəyə gəlincə, hazırda mən onunla bağlı sənədləri öyrənirəm, çünki Əmlak Məsələləri üzrə Dövlət Komitəsinin fəaliyyətini daha ətraflı araşdırmaq istəyirəm. Məsələ ondadır ki, bu günə ƏMDK, bir qayda olaraq, Dövlət Komitəsi tərəfindən yanlış və ya natamam sənədlər verməsinin səbəb olduğu bir sıra məhkəmə işləri, mübahisəli hallar və s. hadisələrdə iştirak edir. Bundan başqa, bu, məhkəmə qərarlarını icra etməyən azsaylı dövlət qurumlarından biridir. Onu da qeyd etmək vacibdir ki, bu günə ölkədə özəl biznes subyektlərinin böyük əksəriyyətində - hotellər, istirahət zonaları və s.yiyələrində - daşınmaz əmlaka dair sənədlərin tam dəsti yoxdur.

Özü də ki, söhbət ƏMDK sənədlərindən gedir, nəticədə biznes özünü müdafiə olunmamış, zəif hiss edir. Əminlik, müəyyənlik hissləri yoxdur. Bu, bazar iqtisadiyyatının dayağı olan mülkiyyət hüququnun qorunması misalında daha aydın görünür. Və təəssüf ki, bütün bunlarda başlıca mənfi rolu ilk baxışdan gözə çarpmayan dövlət orqanı - Əmlak Məsələləri üzrə Dövlət Komitəsi oynayır. Ölkədə özəlləşdirmə niyə belə ləng gedir? Çünki bu Komitəyə heç kim etibar etmir. Siz vaxt və pulunuzu sərf edərək dövlət müəssisəsini özəlləşdirə bilərsiniz, амма bundan sonra həmin bu qurum qondarma bəhanə ilə onu sizdən ala bilər... Belə işlər addımbaşı baş verir. Özəl şirkətlər isə bu Komitədən öz daşınmaz əmlakının adi kupçasını heç cür ala bilmir. Səbəbi bu qurumun sistemsizliyi və özbaşınalığıdır. Bu gün həmin orqan iqtisadiyyata hər hansı bir digərindən daha çox ziyan vurur.

A.Həsənovun sözlərinə görə, o, İ. Qurbanovun istixana kompleksi ilə baş vermiş insidentin sənədlərlə bağlı tərəfini öyrənir, çünki söhbət ayrıca götürülmüş biznesdən getmir, Əmlak Məsələləri üzrə Dövlət Komitəsinin fəaliyyəti isə yerli biznesin bir çox problemlərinin kökündə dayanır və xüsusi diqqət tələb edir.