Ağaclara can verən Cəbrayıl

Yazıdakı başlıq Sizi aldatmasın. Yazı çox oxunsun deyə də bu başlığı seçmədim. Sadəcə Cəbrayıl Quliyevlə ilk dəfə tanış olanda və əsərlərini görəndə bu sözləri işlətdim.

Cəbrayıl Azərbaycanda nadir işlərdən biri olan “intarsiya” sənəti ilə məşğul olur. Bu sənət haqqında yazının sonuna əlavə edəcəm. Amma indi Cəbrayılın gördüyü işlərdən istərdim qeyd edim.

Yəqin Azərbaycanda çoxlu sayda heykəltaraşlar, rəssamlar görmüsünüz. Cəbrayıl özü Rəssamlıq Akademiyasını bitirib. Amma Akademiyanı bitirdikdən sonra, yağlı boya ilə deyil, ağacların üzərində olan təbii rənglərdən istifadə etməyə başlayıb.

Əvvəl kiçik ölçülü əsərlər hazırlasa da zaman keçdikcə iri həcmli əsərlər hazırlamağa başlayıb. Cəbrayıl deyir ki, işin unikallığı ondan ibarətdir ki, hazırlanan əsərlərin ikinci bir nüsxəsi yoxdur. Yəni görülən iş ağacların təbii rənglərindən və naxışlarından istifadə olunur. Bu rəng və naxış yalnız bir ağacda olur.

İkinci bir ağacda tapmaq mümkün deyil. Hazırda Cəbrayılın qarşısında bir problem var ki, o da hazırladığı nadir əsərlərin satış probemidir. Yerli vətəndaşlar Cəbrayılın işinə elə də göstərməsələr belə, xarici vətəndaşlar daha çox maraq göstərir.

Cəbrayıl deyir ki, “palitram –ağacların öz rənglərindən ibarətdir. 70-ə yaxın ağac növündən istifadə edirəm. Onların arasında yerli ağaclarla bərabər Fransa, Afrika, Almaniya, eləcə də Cənubi Amerikadan gəlmə ağaclar var”

Hazırda Cəbrayılın bir istəyi və bir arzusu var. Hazırladığı işlərin sərgisini keçirtmək...

İndi qısa olaraq yazının əvvəlində qeyd etdiyim “intarsiya” sözünün mənasına qayıdım. İntarsiya nazik ağac lövhəciklərindən, yonqarlarından yığılmış mozaikadır. Bu mozaikalar müxtəlif ölçülü və müxtəlif növ ağacların bir-birinə keçirilməsi, yapışdırılması ilə quraşdırılır. İntarsiya müxtəlif növ ağacların təbii quruluşundan və rəngindən istifadə olunmaqla yaradılır.

Müxtəlif növ ağaclar seçildikdən sonra onların hər biri kəsilir, formaya salınır və cilalanır. Sonra kəsilərək şəkil formasında bir - birinə keçirilir və dayaq rolunu oynayan taxtaya yapışdırılır.

Əziz Kərimov