Siyasi və ictimai xadimlər Əli Kərimliyə təzyiqləri pisləyiblər

Bakı/20.04.20/Turan: AXCP lideri Əli Kərimlinin İnternet və telefon rabitəsinin kəsilməsi ölkənin siyasi və ictimai xadimləri arasında tənqidlərə səbəb olub.

“Hakimiyyət sərt qadağalara, repressiv tədbirlərə üstünlük verdi. Əhaliyə yetərli sosial yardımın edilmədiyi, orta və xırda biznesin xilası üçün lazımi tədbirlərin görülmədiyi şəraitdə yüksək cərimələr və həbslər davam edir. Bu dövrdə, xüsusilə siyasi müxalifətə qarşı repressiv tədbirlər həm Azərbaycan cəmiyyəti, həm də beynəlxalq birlik tərəfindən böyük narazılıqla qarşılanır”, - Müsavat Partiyasının sədri Arif Hacılı Facebook-da yazıb.

“Tofiq Yaqublunun qondarma ittihamlarla həbs edilməsi, bunun ardınca bir çox siyasi fəllara, jurnalistlərə, AXCP üzvlərinə, xüsusilə Əli Kərimliyə yaxın olan partiya üzvlərinə və şəxsən onun özünə qarşı olan təziqləri qətiyyətlə pisləyirəm. Azərbaycan hakimiyyətini cəmiyyətdə qarşıdurma yaradan addımlardan çəkinməyə, siyasi təqiblərə son qoymağa çağırıram”, - A.Hacılı vurğulayıb. 

Vəkil Fuad Ağayev hesab edir ki, Əli Kərimlinin və onun ailə üzvlərinin İnternet və  telefon əlaqələrinin kəsilməsi Avropa İnsan Hüquqları və Əsas Azadlıqların Müdafiəsi haqqında Konvensiyanın bir neçə bəndinin pozulmasıdır.

“Əli Kərimlinin bir neçə köməkçilsinin həbsi, indi isə onun rabitə vasitəsindən məhrum edilməsihətta Rusiya kimi avtokratik dövlətlər üçün səciyyəvi deyil.

Bu məhdudiyyətlərin tətbiq edilməsi, uzun illər boyu pasportu belə verilməyən, bununla bağlı Avropa İnsan Hüquqları Məhkəməsinin qərarı icra edilməyən insana qarşı həm də amansız rəftar olmaqla, ona mənəvi-psixoloji təzyiqin davamı kimi qiymətləndirilə bilər. Özünü güclü sayan iqtidar belə üsullardan istifadə etməməlidir”, - F.Ağayev bildirib.

Azərbaycan Demokratiya və Rifah Hərəkatı hakimiyyəti karantin rejimindən siyasi məqsədlər üçün sui-istifadəyə son qoymağa, AXCP sədrinin informasiyaya və rabitə vasitələrinə çıxış imkanlarını bərpa etməyə, Tofiq Yaqublunu və həbsdə olan bütün siyasi fəalları, jurnalistləri azad etməyə çağırır”, - Hərəkatın bəyanatında deyilir.

Repressiya və İşgəncələr Əleyhinə Komitənin koordinatoru sNamizəd Səfəriov hakimiyyətin Əli Kərimliyə qarşı törətdiyi əməlləri, ictimai qaydaları kobud surətdə pozmaqla cəmiyyətə qarşı açıq hörmətsizlik ifadə edən qərəzli hərəkətləri xuliqanlıq adlandırıb.

İctimai fəal Bəxtiyar Hacıyev hesab edir ki, Əli Kərimlinin telefon və İnternet əlaqələrinin kəsilməsi ondan ehtiyatlanmanın və narahatlığın əlamətləridir. “Bir neçə il əvvəl Ə.Kərimliyə  ümumvətəndaş pasportu verməməklə onun ölkədən çıxması və qayıtmasını qadağan etmişdilər, indi də ona ən yaxın olan adamlara qarşı ya cinayət işi açıblar, ya ruhi xəstəxanaya göndərirlər, ya da karantin rejimini pozmaqda ittiham edib ondan təcrid edirlər. İqtidarın narahat olmasının ikinci göstəricisi də müxalifətə və müxalifət liderlərinə münasibətdən hiss olunub. Müxalifət liderinə qarşı Novruz bayramından tutmuş, nazirlərlə iclasa qədər bütün görüşlərdə sərt çıxışlar iqtidarın vətəndaşlar arasında narazılıqdan narahat olduğunun daha bir göstəricisidir. Görünür, iqtidar öz mənbələrindən məlumat əldə edir ki, qarşıdakı aylarda ölkəni gözləyən iqtisadi və sosial problemlərə görə vətəndaşlar arasında narazılıq sürətlə artacaq, ona görə də qorxu və narahatlıqla müxaliətə hücuma keçib. Əks halda, 2020-ci ildə, informasiya texnologiyaları dövründə müxalifət liderinin sabit telefon xətti və İnterneti kəsilməzdi”, -  o, Facebook səhifəsində  qeyd edib.

Rəsmi dövlət orqanlartı hələlik Ə.Kərimlinin İnternet və telefon əlaqələrinin kəsilməsinə münasibət bildirməyiblər. Eyni zamanda DİN

mətbuat katibi Ehsan Zahidov bildirib ki, Əli Kərimlinin ev və mobil telefonunda problem yaranıbsa aidiyyatı üzrə müraciət etməlidir. Həbs olunmuş AXCP üzvlərinə gəlincə, DİN-dən bildiriblər ki, onların heç biri siyasi motivlərlə həbs olunmayıb, karantin rejimini pozduqlarına görə inzibati məsuliyyətə cəlb olunublar. —03D06-