![Buzovna çimərliyi](https://turan.az/resized/media/2022/main/060300046335-750-500-resize.webp)
Buzovna çimərliyi
Çimərlik mövsümünün standartları sual altında
Bakı/03.06.22/Turan: Artıq çimərlik mövsümü yaxınlaşır. Havaların isti keçməsinə görə bəzi ərazilərdə artıq dənizdə çimənlər var.
Əvvəlki illərdə rəsmi qurumlar çimərliklərdə dəniz suyunun çirkli olması və standartlara uyğun olmamasını bildirmişdi.
Bəs hazırda çimərliklər ekoloji standartlara nə dərəcədə uyğundur? Bakıda pulsuz, standartlara cavab verən çəmərliklər varmı?
Ekologiya və Təbii Sərvətlər Nazirliyindən bildiriblər ki, hər il olduğu kimi, bu il də qurum Səhiyyə Nazirliyinin Gigiyena və Epidemiologiya Mərkəzi ilə birgə may ayının 15-dən çimərlik ərazilərində monitorinqə başlayıb. Monitorinqlər Bakı, Abşeron və Xəzər dənizinin şimal və cənub bölgəsindəki çimərliklərin ərazisində aparılır. Bu monitorinqlər təkcə çimərlik mövsümündə yox, il ərzində aparılır. Sadəcə, çimərlik mövsümü ilə əlaqədar monitorinqlər daha intensiv həyata keçirilir.
Qurumdan qeyd olunub ki, mövsüm başlamamış hansı çimərliklərin istifadə üçün daha yararlı olduğu müəyyənləşdirilir. Yaxın günlərdə nəticələr ictimaiyyətə açıqlanacaq.
Bildirilib ki, monitorinqlər zamanı dəniz suyunun nümunələri götürülür və laboratoriyalarda suyun keyfiyyəti müəyyən olunur. Həm fiziki-kimyəvi, həm bioloji, eko-toksikoloji təhlillər aparılır. Bu keyfiyyət nəticələrinə uyğun olaraq hansı çimərliklərin daha çox çirkli, nisbətən az çirkli və ya təmiz olduğu müəyyənləşdirilir.
Bakı Şəhər İcra Hakimiyyətindən Turan-a bildiriblər ki, mövsümün başlamasını nəzərə alaraq qurum tərəfindən çimərliklərin geniş monitorinqi aparılıb: «Rayon icra hakimiyyətləri və özəl çimərliklərin məsul şəxsləri ilə birlikdə ərazidəki tullantıların təmizlənməsi, mövcud çatışmazlıqların aradan qaldırılması üçün geniş işlər aparılır».
Ətraf mühit siyasəti üzrə ekspert Cavid Qara deyib ki, əvvəlki illərdə olan vəziyyətin dəyişməsinə təsir edən ciddi faktor yoxdur: «Əksinə, pisləşməyinə təsir edən faktor ola bilər ki, yaşayış artır, sənaye aktivliyi artır, kanalizasiya suların dənizə axıdılması davam edir».
Ekspertin fikrincə, Abşeron yarımadasında təmiz çimərlik çətin ki tapılar: «Abşeron yarımadası böyük deyil və kanalizasiya suyu dənizə axırsa, o, bütün çimərliklərə yayılacaq».
Onun sözlərinə görə, Ekologiya və Təbii Sərvətlər Nazirliyinin monitorinqin nəticələri ilə bağlı açıqlamaları yetərincə optimist olacaq: «Real vəziyyət açıqlanan göstəricilərdən qat-qat pis ola bilər».
Ekoloq deyir ki, nazirliyin ölçmələri və tədqiqatları nə dərəcədə düzgün apardığını demək çətindir: «Bizdə isə müstəqil laboratoriyalar yoxdur ki, dəqiq ölçək, deyək vəziyyət nə yerdədir».
Cəmiyyət
-
Ədalət Naminə Həmrəylik Komitəsinin təşəbbüsü ilə təşkil edilən, Azərbaycanda insan hüquqları vəziyyətinə həsr olunmuş vətəndaş cəmiyyəti fəallarının onlayn görüşündə jurnalistlərin, siyasi fəalların və müharibəyə qarşı çıxanların həbsi ilə bağlı ciddi narahatlıqlar vurğulandı. Avqustun 30-da keçirilən bu toplantı Beynəlxalq İtkin Düşənlərin Anım Günü ilə üst-üstə düşdü və Qarabağ müharibələrindən sonra həm Azərbaycan, həm də Ermənistan cəmiyyətlərinin qarşılaşdığı davamlı çətinlikləri diqqətə çatdırdı.
-
Sentyabrın 1-də Bakıda və Abşeron yarımadasında hava yağıntısız olacaq. Şimal-qərb küləyi gündüz cənub-şərq küləyi ilə əvəz olunacaq. Havanın temperaturu gecə müsbət 21+26, gündüz müsbət 33+38 dərəcə olacaq, Milli Hidrometeorologiya Xidməti bildirib.
-
Ölkənin aparıcı mobil operatoru "Milli və müasir" rəqəmsal muzeyini təqdim edir Azercell milli dəyərlərimizi müasir texnologiyalar vasitəsilə yaşatmaq, onları geniş auditoriyaya tanıtmaq və gələcək nəsillərə çatdırmaq məqsədilə "Milli və müasir" rəqəmsal muzeyi layihəsini təqdim edir. Bu innovativ təşəbbüs sənət və texnologiyanı birləşdirərək şirkətin hər iki sahəyə olan dəstəyini bir daha vurğulayır.
-
Bakının Suraxanı rayonu ərazisində sənaye zonasında bir obyektdə yanğın başlayıb. Yanğının söndürülməsinə FHN-in Dövlət Yanğından Mühafizə Xidmətinin qüvvələri cəlb olunub.
Rəy yaz