Media-icmal 15.08.17

Etibarlı ərzaq təminatı məsələsi, gəlir bəyannaməsi formasının hələ də təsdiq edilməməsi, maliyyə ombudsmanlığının gələcək fəaliyyəti bugünki medianın (15 avqust, 2017-ci il) aparcı mövzularındandır...

Etibarlı ərzaq təminatı

"Azərbaycan" qəzeti "Sosial rifah, iqtisadi tərəqqi" sərlövhəli məqalədə (http://www.azerbaijan-news.az/index.php?mod=3&id=128108) ölkədə etibarlı ərzaq təminatı siyasətini dəyərləndirir.

Müəllif deyir ki, etibarlı ərzaq təminatı hər bir ölkənin iqtisadi sabitliyinin və sosial dayanıqlığının başlıca şərtidir və bu baxımdan Azərbaycanda da əhalinin təhlükəsiz ərzaq məhsulları ilə etibarlı təminatı dövlətin qarşısında duran ən vacib vəzifələrdən biridir: "Ərzaq təhlükəsizliyini iqtisadi strategiyanın əsas komponenti kimi daim diqqət mərkəzində saxlayan Prezident İlham Əliyev bu istiqamətdə xüsusi proqramlar həyata keçirir. Dövlət başçısının bu istiqamət üzrə vaxtaşırı verdiyi tapşırıqlar, tövsiyələr, imzaladığı fərman və sərəncamlar, dövlət proqramları uğurla icra olunur".

Müəllif deyir ki, son vaxtlar əhalinin ərzaq məhsulları ilə etibarlı təminatına dair dövlət proqramına uyğun icra edilən laihələr nəticəsində aqrar sektorda dönüş əldə olunub, istehlak bazarı sabitləşib, ixrac potensialı artıb, idxaldan asılılıq azalıb, ümumilikdə isə ərzaq təhlükəsizliyinin möhkəmlənməsinə səbəb olub.

Yazı müəllifi bildirir ki, dövlət başçısı İlham Əliyevin tövsiyəsi ilə ölkə iqtisadiyyatının ən vacib sahəsi olan kənd təsərrüfatında istehsalın, ixracın, əhalinin ərzaq məhsullarına olan tələbatının ödənilməsi üçün bölgələr üzrə bitkiçilik və heyvandarlığın sinfi təsnifatı hazırlanıb və bu uğurların əldə edilməsində regionların sosial-iqtisadi inkişafına dair dövlət proqramları xüsusi rol oynayıb.

Müəllif deyir ki, bu yaxınlarda Qaxda keçirilən müşavirədə İlham Əliyev ərzaq təhlükəsizliyini qarşıda duran vəzifələrdən biri kimi dəyərləndirib, bu mənada bəzi məhsullar istehsalı üzrə əhalinin tələbatının tam və ya əksər hissə olmaqla təmin edildiyini söyləyib: "Yəni ərzaq təhlükəsizliyi məsələləri prioritetdir, deyə bilərəm ki, bu sahədə əldə edilmiş nailiyyətlər çox sevindiricidir. Növbəti illərdə daha da böyük nəticələr olacaq".
Məqalədə deyilir ki, ölkədə kənd təsərrüfatı məhsullarının istehsal və emalına xüsusi diqqət yetirilir, regional inkişaf və ərzaq təhlükəsizliyinin təmin edilməsi üçün kənd təsərrüfatı kooperasiyasının inkişafı baxımından əlverişli biznes mühitinin yaradılması yönündə kompleks islahatlar aparılır.

Müəllif deyir ki, bütün bunlar bir daha təsdiqləyir ki, Prezident İlham Əliyevin sosial-iqtisadi inkişaf strategiyası hər bir sahənin inkişafı üçün konkret hədəf və məqsədləri müəyyən edir, bu strategiyanın əsas hədəfi vətəndaşların həyat səviyyəsini davamlı olaraq yüksəltmək, iqtisadiyyatı şaxələndirmək, rəqabət qabiliyyətini artırmaq, sahibkarlığı inkişaf etdirmək, yeni bazarlara çıxış əldə etməkdir.

Gəlir bəyannaməsi: nə vaxta qaldı?

"Exo" qəzetində "Azərbaycanda gəlir bəyannaməsini tətbiq etməyin zamanıdır" sərlövhəli (http://ru.echo.az/?p=61761) məqalə oxumaq olar.

Müəllif deyir ki, son zamanlar vətəndaşlar sosial şəbəkələrdə ölkə məmurlarının maddi durumlarını fəal müzakirə obyektinə çeviriblər: "Vətəndaşlar belə zəngin daşınar və daşnmaz əmlakların necə əldə edilməsi sualının cavabını heç cür tapa bilmirlər, eyni zamanda, çoxmilyonlu varidata malik olan məmurlar isə bunun izahını verə bilmirlər".

Müəllif elə bu fonda da xatırladır ki, "Dövlət məmurlarının gəlirləri haqqında bəyannamə haqqında" qanun 12 ildir ki, qəbul edilib, amma ötən 12 il ərzində bəyannamə forması hələ də təsdiq edilməyib və günahkar kimdirsə, məlum deyil.

Qəzetə şərh verən ekspertlər isə hesab edirlər ki, bu prosesi ancaq ictimaiyyət və media sürətləndirə bilər və vurğulayırlar ki, bu bəyannamə məsələsi bəzi məmurlara sərf etmir. Belə ki, onlar şəffaflıq mühitində yaşamaq istəmirlər və odur ki, prosesin sürətlənməsi üçün istər ictimaiyyət, istərsə də media Nazirlər Kabinetindən bəyannamə formasının indiyə kimi niyə təsdiq edilməməsinə cavab tələb etməlidir.

"Gəlir bəyannaməsi formasını hökumətin nə zaman qəbul edəcəyi sualına cavab verə bilmirik, buna dövlət aydınlıq gətirə bilər, onlar isə tələsmirlər, amma hökumətin hansı mövqe tutmasından asılı olmadan bu bəyannamə formasının təsdiqini yubandıran məmurlar cəzalandırılmalıdır". Bunu isə qəzetə ekspert Nəriman Ağayev şərh edir.

Ekspert deyir ki, kimin necə yaşadığını xalq yaxşı bilir, bu barədə məmurların maddi durumları ilə bağlı mediada müntəzəm olaraq yazılar dərc edilir və buna son qoymağın bir yolu var: "Uzun müddət məmurlar öz gəlirlərinə dair bəyannamə təqdim etməyiblər, buna son qoymaq vaxtıdır, o məmur ki, özünə arxayındır, gəliri barədə könüllü bəyannamə verməlidir. Bu isə məmurun şəffaf fəaliyyəti və cəmiyyətə açıqlığı göstəricisi olacaq. Bu, bir çox ölkələrdə məhz belədir".

Ekspert Fuad Əlizadə isə deyir ki, elə məsələlər var ki, illər ərzində həlini tapmır və gəlir bəyannaməsi formasının indiyə kimi qəbul edilməməsi də belə məsələlərdən biridir: "Günümüzdə gəlir bəyannaməsi məsələsi havadan asılı şəkildə qalır və burada heç nə etmək olmur, bu məsələni "ölü" nöqtəsindən nəyin tərpədə biləcəyi müəmma olaraq qalır".

Amma ekspert hesab edir ki, gəlir bəyannaməsi fomasının qəbul edilməsi belə çıxış yolu deyil, çünki, məmur varını gizlədə bilmək üçün yenə bir yol tapacaq.

Müəllif 2005-ci ildə "Dövlət məmurlarının gəlir bəyannməsi haqqında" qanunun qəbul edildiyini, amma ötən 12 il ərzində bəyannamə formasının təsdiq edilmədiyini və bunun niyə bu qədər yubanması haqda rəsmilərin açıqlama vermədiyini bildirir: "Bu formanın tətbiqi qanunsuz varlanmanın qarşısını almağa və müxtəlif əhali qrupları maraqlarının münaqişəsini tənzimləməyə şərait yaradar.

Maliyyə ombudsmanlığına ehtiyac varmı?

"Novoye Vremya" qəzetində isə "Maliyyə Ombudsmanı nə ilə məşğul olacaq?"(http://www.novoye-vremya.com/w102025/.../#.WZHfZ1GrTIU) sərlövhəli məqalə diqqəti cəlb edir.

Müəllif gələn aydan Azərbaycanda fəaliyyətə başlayacaq Bank Ombudsmanlığı fonunda məsələni müzakirə edir.

Yazı müəllifi deyir ki, maliyyə ombudsmanlığı institutunun məqsədi banklara etimadı gücləndirmək və məhkəmə müdaxiləsi olmadan tərəflər arasında mübahisələri tənzimləməkdir və maliyyə ombudsmanlığı tərəflər arasında 2 min dollar həcminə qədərki mübahisəli məsələləri həll edəcək: "Bundan əlavə, maliyyə ombudsmanına ancaq banklarla bağlı şikayət qəbul ediləcək, tərəflər razı olduqda ombudsman mübahisəli məsələni baxışa götürəcək və ombudsman bu vətəndaşlara banklarla mübahisəli məsələni həll etməkdə kömək edən hüquq müdafiəçisidir".

Müəllif bu qurumun səmərəli fəaliyyət göstərəcəyinə inamsızlığını bildirir və əsas kimi ölkə üzrə Ombudsman Aparatının fəaliyyətini göstərir: "Seçki, əmək, siyasi və iqtisadi hüquqlar pozulur və bu zaman "Ombudsman Aparatı haraya baxır?" sualı meydana gəlir və məlum olur ki, bu qurum heç yana baxmır, heç nə görmür və heç nə eşitmir".

Müəllif hesab edir ki, Ombudsmanlıq qurumunun əsas göstəricisi onun müstəqil olması, heç bir dövlət qurumunun onun fəaliyyətinə müdaxilə edə bilməməsi olmalıdır: "Ombudsmanlıq institutunun müstəqil olması əsas məsələdir, dövlət qurumlarının, siyasi partiyaların, ictimai qurumların, medianın onun işinə müdaxilə edə bilməsi yolverilməzdir və bu qurum vətəndaşla hakimiyyət arasında insan haqları məsələsində münsif olduğu üçün tərəfsiz olmalıdır".

Müəllif deyir ki, demokratik ölkələrdə bu institutun fəaliyyəti məhz belədir, çünki, xalqın haqlarının müdafiəçisi olmaq üçün ilk növbədə qurum və rəhbərliyi müstəqil olmalıdır.

Müəllif hesab edir ki, Azərbaycanda bu institut öz təyinatı üzrə fəaliyyət göstərə bilmir və bundan da irəli gələrək maliyyə ombudsmanlığı da səmərəli fəaliyyətə malik ola bilməyəcək.

"Maliyyə ombudsmanlığı aldadılmış əmanətçilərin və ya iki devalvasiya nəticəsində öz pullarını itirmiş əmanətçilərin problemini həll edəcək? Şübhəlidir", deyə müəllif bildirir.

Müəllif hesab edir ki, maliyyə ombudsmanlığının fəaliyyəti sadəcə insanlara maliyyə problemlərinin həll ediləcəyi təsəllisi verilməklə nəticələnəcək və başqa bir əsaslı nəticəyə səbəb olmayacaq.