Media-icmal 20.02.2016

Ölkədə rüşvət, regionda siyasi maraqlar, təhlükəsiz qida medianın aparıcı mövzusudur. 

Rəsmi qəzetlər isə yalnız dövlət başçısı İlham Əliyevin rəsmi qəbulları, ölkənin “artıq böhrandan çıxması” mövzularına yer verirlər.

“Əlbəttə, bunlar hamısı yalandır, böhtandır, amma araşdırma da gedir ki, görək kim hansı işləri törədib”, - Ailə, Qadın və Uşaq Problemləri Komitəsinin sədri  Hicran Hüseynova 170 min rüşvət qalmaqalı ilə bağlı barəsindəki  iddiaları rədd edib. “Azadlıq” qəzeti yazır ki, bunu H.Hüseynova mediaya açıqlamasında bildirib.

H.Hüseynova barəsində yazılanlara bağlı jurnalistlərə “etikanı unutmamaq” tövsiyəsi verməyi də arxa plana keçirməyib. “Xüsusilə, dövlət məmurları haqqında belə şeyləri yazanda fikirləşsinlər ki, bu, kimə nöqsandır?”, - H. Hüseynova bildirib.

Xatırladaq ki, komitənin keçmiş aparat rəhbəri Səfər İmanov Eynur Kərimov adlı şəxsdən icra hakiminin müavini təyin edilməsi üçün 170 min dollar rüşvət alıb.

S.İmanov bu ilin yanvarında ölkədən qaçıb. Məsələni E.Kərimovun vəkili Adəm Məmmədov ictimailəşdirib. Hətta A.Məmmədov komitə sədrinin özünü də bu məsələdə təqsirli bilib və dediklərini sübut etmək üçün əlində kifayət qədər əsasların olduğunu xatırladıb.

“Bakı, Tbilsi və Ankara regionun geosiyasətini dəyişməyə cəhd edir?”. “Novoe Vremya” qəzeti bu 3 ölkənin xarici işlər nazirlərinin Tbilisi görüşünə belə münasibət bildirir. Qəzetə görə, hətta Ankara neçə vaxtdır ki, bu formatda hərbi ittifaq yaratmaq istəyir.

Daha sonra qəzet bu kontekstdə NATO-nun şərqə doğru irəliləməsi məsələsinə toxunur. Bu günlərdə NATO gəmilərinin ilk dəfə Batum limanına gəlməsini xatırladır və bu iki fakt arasında “anti-Rusiya paraleli” gördüyünü ifadə edir.

“Artıq neçə vaxtdır ki, Ankara Azərbaycan və Gürcüstanla hərbi ittifaq yaratmağa çalışır. “Foreign affairs” jurnalı yazır ki, Ərdoğan Türkiyə, Azərbaycan və Gürcüstan hərbi ittifaqını gücləndirəcək, bu ittifaq dolayısı ilə regionu NATO-nun nüfuz dairəsinə daxil edəcək” , - qəzet yazır.

Qəzetə görə, bu regionda Rusiyanın maraqlarına toxunur. “Yada salaq ki, NATO-nun Gürcüstanla birgə təlim mərkəzi yaratmaq istəməsini Rusiya tərəf geosiyasi təsirini genişləndirmək üçün Qərbin “təxribatçı siyasəti” adlandırmışdı. Görünən budur ki, region yenə də maraqların toqquşduğu episentrə dönür”, - qəzet münasibət ifadə edir.

“Rəsmi Kremlin Ermənistana verdiyi silahların siyahısını açıqlaması rəsmi Bakının İŞİD-ə qarşı koalisiyaya qoşula bilməsi fikrinə cavabdır”, - “Yeni Müsavat” qəzeti siyahının məhz indi açıqlanmasını bu baxımdan təsadüfü saymır. Özü də bu silahlar 200 miyon dollar həcmində kredit olaraq  verilir.

Rusiyanın Ermənistana “Smerç”, “İqla-S” kimi reaktiv yaylım atəş, zenit-raket sistemləri və s. silahları verməsi xüsusi vurğulanır. “Ancaq siyahının məhz indi üzə çıxarılması nəzərdən yayına bilməz və əlbəttə ki, ən əvvəl Ankara ilə yaxınlaşmaq meyli göstərən Bakıya ikiqat mesaj xarakteri daşıyır”, - qəzet dəyərləndirmə verir.

Bu sırada qəzet rəsmi Bakının “koalisiyaya qoşula bilmək” fikri səsləndirməsindən sonra Kremlin “danışan dili, kloun-siyasətçi” Jirinovskinin “Rossiya-1” telekanalında Türkiyə və Azərbaycanı, özü də erməni kartı ilə hədələyən çıxışını da xatırladır.

“İnhisarçılar əhaliyə zərərli məhsullar yedizdirirlər”. “Bizim yol” qəzeti bu iddia ilə çıxış edir. “Əksər ərzaq məhsulları xaricdən gətirilir və Azərbaycanda keyfiyyətə nəzarət zəifdir”, - ekspertlər bu iddianın doğruluğunu sübut etməyə çalışırlar.

Ekspertlər həm də ölkəyə keyfiyyətli malların gətirilməməsinin əsas səbəbi kimi inhisarçlığın özünü göstərirlər. “Nə vaxt ki, idxaldan inhisarçılıq götürüləcək, o zaman ölkəyə keyfiyyətli məhsullar gətiriləcək”, - ekspert Vahid Məhərrəmov  bildirib. O, ölkəyə gətirilən malların yoxlanılmasının ictimaiyyət üçün açıq və şəffaf olmasını vacib şərt sayır.

  “Müstəqil ekspertizanın, normal yoxlamanın olmadığı bir ölkəyə hər cür mal gətirilə bilər”, - ekspert Əyyub Hüseynov deyib. O bildirib ki, Braziliyadan gətirilən genetik modifikasiya olunmuş ərzaq Azərbaycanda iki ekspertizadan  keçib, biri təsdiq edib, digəri isə genetik modifikasiya olunmasını aşkar edə bilməyib.

Ekspertlər beynəlxalq qurumların tələblərinə baxmayaraq, Azərbaycanda hələ də “Qida təhlükəsizliyi haqqında” qanun qəbul olunmamasına diqqət çəkirlər. Bundan əlavə, əhalini keyfiyyətsiz ərzaqdan qoruya bilmək üçün 50 ilə yaxındır ki, ABŞ-da ərzaq təhlükəsizliyi məqsədilə tətbiq edilən HACCP sisteminin tətbiq olunmasını təklif  edirlər.