Media-icmal 24.07.18

İlham Əliyevin Fransaya səfəri fonunda Azərbaycan-Fransa münasibətləri, "Azəraqrartikinti" ASC-nin fəaliyyətinə baxış, Şəki sahibkarlarının bir qrupunun etiraz aksiyası xəbərdarlığı bugünki (24iyul, 2018-ci il) medianın aparıcı mövzularındandır ...

Avropa Birliyi ilə münasibətlərə təsir edəcək səfər

"Azərbaycan" qəzeti "Yüksək etimadın bariz nümunəsi" sərlövhəli məqalədə dövlət başçısı İlham Əliyevin bu il iyulun 19-20-si Fransaya baş tutmuş səfəri fonunda nəticələri dəyərləndirir.

Müəllif deyir ki, Fransa Prezidenti Emmanuel Makronun dəvəti ilə baş tutan bu səfərdə Fransa prezidenti, eləcə də böyük şirkətlərin rəhbərləri ilə keçirilən görüşlər əlaqələrin yeni müstəviyə keçməsinə səbəb oldu.

Məqalə müəllifi vurğulayır ki, prezident seçildiyi 2003-cü ildən bu yana İ.Əliyev Fransaya 13 səfər edib və bu iki dövlət arasında münasibətlərin daha da inkişaf etdirilməsində Birinci vitse-prezident Mehriban xanım Əliyevanın müstəsna rolu var: "Azərbaycan-Fransa münasibətləri dostluq, qarşılıqlı maraq, hörmət əsasında qurulub və bir çox sahələri əhatə edir. Azərbaycanla Fransanın 15 şəhəri arasında əməkdaşlıq və dostluq sazişlərinin bağlanması iki ölkə arasında dostluq əlaqələrinin daha da inkişaf etməsinə şərait yaradır".

Müəllif deyir ki, son görüşdə Azərbaycan-Fransa əməkdaşlığının çoxcəhətli aspektləri, Azərbaycan Avropa İttifaqı əlaqələri, habelə Qarabağ probleminin həlli yolları müzakirə obyekti olub.

Müəllifə görə, Azərbaycan Prezidentinin səfərinə göstərilmiş diqqət Azərbaycan dövlətinə yüksək etimadın bariz nümunəsidir, çünki Azərbaycan dünyada, o cümlədən Fransada etibarlı tərəfdaş kimi tanınır.

Səfərin nəticəsi olaraq imzalanan yeni sənədləri müəllif Fransanın Azərbaycanla ikitərəfli əlaqələrin daha da genişlənməsinə böyük önəm verməsi kimi dəyərləndirir.

Müəllif bu görüşlərdə iqtisadi blok çərçivəsində enerji təhlükəsizliyi məsələsinin, "Cənub qaz dəhlizi" layihəsinin icrasının, neft-qaz, infrastruktur, nəqliyyat, kosmik sənaye, hava nəqliyyatı, metro tikintisi, hərbi-texniki sahələrdə əməkdaşlığın müzakirə olunduğunu bildirir.

Yazı müəllifi bəyan edir ki, Avropa İttifaqının aparıcı ölkəsi kimi Fransa ilə Azərbaycan arasında mövcud münasibətlər Avropa İttifaqı ilə Azərbaycan arasında əlaqələrin daha da inkişaf etdirilməsi baxımından mühümdür.

Müəllif deyir ki, səfər çərçivəsində 11 şirkətlə görüş olub, 2,3 milyard dollarlıq anlaşma imzalanıb: "Bu səfər Fransa-Azərbaycan münasibətlərinin daha da möhkəmlənməsinə xidmət edəcək və ikitərəfli əlaqələrin inkişafında yeni imkanlar açacaq".

Bu yarıtmazlıqla belə...

"Novoye Vremya " qəzetində isə "Sıravi dövlət şirkətləri sərlövhəli məqalə oxumaq olar.

Müəllif "Azəraqrartikinti" ASC-nin səmərəsiz fəqaliyyətini müzakirəyə çıxarır.

Yazı müəllifi deyir ki, bu il iyun ayının əvvəlində Göyçay şayı üzərindəki körpünün çökməsində bu şirkətin də rolu var və şirkət dövlətə vurduğu ziyana görə 495 min manat cərimə edilib, şirkətin Göyçay bölməsinin direktoru körpü məsələsilə bağlı həbsə alınıb.

Şirkət yarıtmaz işə görə cərimə olunduğu zaman fəaliyyətinə dair hesabatı dərc edilib və müəllif bu hesabata inamsız yanaşır.

Müəllif deyir ki, yarıtmaz fəaliyyətinə baxmayaraq, dövlət bu şirkətin əməkdaşlarnı təltif edib, düşünmək olar ki, dövlətin burada payı da var, hətta bəziləri deyir ki, bu qurumun adı yenidən qurulması vacib olan müəssisələr sırasında çəkilir.

Yazı müəllifi vurğulayır ki, hazırda bu şirkətin aktivləri 22,7 milyon manatdır, bir il ərzində aktivlər 74,1% artıb, cəmi gəliri 75,3 milyon manat təşkil edir.

Amma müəllif gəlir məsələsində "qaranlıq nöqtələr" olmasına işarə edir, belə ki, tam olmayan reyestr göstəricilərinə görə, 2017-ci ildə gəlirlərin 10,5 milyon manatı dövlət sifarişləri hesabına olub: "Qəribə də olsa, kənd təsərrüfatına aiddiyyatı olmayan sahə burada dövlət sifarişləri üzrə birinci yerdə durur. Onlar Məcburi Köçkünlərin Sosial inkişafı Fondunun sifarişini yerinə yetirərək Tərtərdə 1170 məcburi köçkün üçün 3 bina tikiblər".

Müəllif deyir ki, ikinci yerdə Kənd Təsərrüfatı Nazirliyi gəlir ki, 1,7 milyon manat müqabilində yeni laboratoriya tikməli idilər.

Müəllifə görə, daha bir qaranlıq məqam bu şirkətin nazirliyin Baytarlıq Xidmətilə münasibətindədir: "Şirkət daha çox tenderi Dövlət Baytarlıq Xidmətində udub. Bu tenderlərə görə, şirkət Xidmətin Quba, Ucar və Göyçay regional bölmələrini təmir və mebellə təmin etməli idi.

Məqalə müəllifi deyir ki, şirkət habelə İslam İnkişaf Bankının Yevlax rayonunda inkişaf üçün ayırdığı 27 milyon manatı da reallaşdırır.

Müəllif deyir ki, 2017-ci ildə şirkət 1,3 milyon manat xalis gəlir əldə etsə də, dövlətə bundan divident ödənilməyib.

Bu məqamda müəllif yada salır ki, şirkət dövlətə divident ödəməsə də, dövlət bu şirkətin də yarıtmaz fəaliyyətinin nəticəsi kimi çökmüş körpünün bərpasına 3,5 milyon manat ayırmalı olub.

Şirkətin fəaliyyətinə gəlincə, müəllif vurğulayır ki, bu qurum dövlət sifarişlərini "mənimsəmək"də davam edir, təkcə 2018-ci ilin 2 ayı rəzində 2 binanın tikintisinə 6,7 milyon manatlıq müqavilə imzalayıb.

Fermerlərdən etiraz aksiyası hazırlığı

"Bizimyol.info"da isə "Şəki tütünçüləri aksiya keçirəcək: "Kredit üzünə həsrət qalmışıq" sərlövhəli məqalə diqqət cəlb edir.

Məqalədə Şəkidə tütünçülük sahəsində iş adamı Rafiq Məmmədovun bir qrup sahibkarın adından redaksiyaya etdiyi müraciət ictimailəşdirilir.

"Əgər avqustun 15-dək yuxarıda qeyd etdiyimiz korrupsiya və özbaşnalıq aradan qaldırılmasa, o zaman biz fermerlər Şəki-Qax magistral yolunun İnçə-Aşağı Göynük hissəsinə tonlarla yaşıl tütün yarpaqlarını gətirib səpələyərək etiraz edəcəyik. O zaman qoy bizlərə çatası əkinə, gübrəyə, tütünə görə dövlətin ayırdığı subsidiyaları mənimsəyən məmurlar bir az utansınlar".

İş adamı müraciətində xahiş edərək deyir ki, bu aksiyanı əkdikləri hər hektar sahəyə görə son illər verilməli 40 manat pul və güzəştli gübrələrin onlara ödənilməsi, tütünün maya dəyərinin real hesablanması və yerli tütün emalı müəssisələrinin şərtləri öz xeyrinə dəyişdirən özbaşnalıqlarının qarşısının alınması dayandıra bilər.

Müəllif isə deyir ki, iş adamı R.Məmmədovun şikayəti əsasında nazirliyə informasiya sorğusu göndərilib.

İş adamlarının etirazına səbəb olanları isə R.Məmmədov müraciətində belə izah edir ki, 2016-cı ildən tütün istehsalçılarına emal müəssisələrinə satılan quru tütünün hər kiloqramına və yaş tütünün hər 10 kiloqramına 0,05 AZN məbləğində subsidiya verilir.

Onun sözlərinə görə, Kənd Təsərrüfatı Nazirliyi (KTN) Baş Göynük kəndində 66 fermerə 2017-ci il üzrə 42 ton quru, 211 ton yaş tütünə görə 31.6 min manat subsidiya ayırıb.

R.Məmmədov iddia edir ki, bəzi məsələlərlə bağlı ayrılan subsidiyaları isə sahibkarlara vermirlər: "Lakin əkilməsi nəzərdə tutulan hər ha yer üçün ayrılmış yanacaq və motor yağına görə 40 manat subsidiyanı, güzəştlə veriləsi gübrə subsidiyasını bizə vermirlər, bazarda satırlar. Ona görə də əldə etdiyimiz gəlir çəkilən xərcləri ödəmir".

R.Məmmədov deyir ki, dövlətin ayırdığı bu 5 qəpiklik subsidiyaları fermerlərə vermək üçün çoxsaylı sənədlər tələb olunur, dekabr ayında alınası pulu sənədləşməyə görə ləngidib mart ayında verirlər: "Bu da işi ləngidir, bu problemi isə "Aqrokredit" və yerli emal müəssisələri qəsdən yaradırlar, nəticədə biz də fəhlənin pulunu vaxtında ödəyə bilmirik".

İş adamı deyir ki, mütəxəssis adı ilə tütünün hər hektarının maya dəyərinin 1750 manata, pambığın isə 2500 manata başa gəlməsi haqda nazirliyə verilən rəylər də əsassızdır: "Əslində isə tütünün reallıqda hər hektar üzrə maya dəyəri 2500 manatdır. Bunu qəsdən edirlər ki, satınalma dəyəri aşağı olsun".

İş adamı deyir ki, tütünün maya dəyəri real qiymətlə, hər hektar üzrə 2500 manat olmaqla hesablansa, o zaman yaş tütünün də hər kiloqramına görə subsidiya 30 qəpikdən hesablanar: "İndi də Şəki tütün emalı müəssisələri biz fermerlərə şərt qoyur ki, tütün yarpağının 4-cü və 5-ci qırımından sonrakı məhsulları qəbul edəcəklər".

Sahibkar bu şərti istehsal olunmuş yerdə qalan tütünün taleyinin naməlum qalması, özbaşınalıq, sahibkarların nəinki gəlir əldə etməmələri, hətta banklara borclu qalmaları kimi dəyərləndirir.