XİN arzu etdiyini həqiqət kimi qələmə verir

Xarici işlər naziri Elmar Məmmədyarov Parisdən, erməni həmkarı Zöhrab Mnatsakanyan ilə görüşdən qayıdıb. Bundan sonra XİN sevincək bəyanat verib ki, "daha çox anlayışın və etimadın qurulmasının əhəmiyyəti də daxil olmaqla, faydalı və çox müsbət fikir mübadiləsi aparılıb. Tərəflər ardıcıl və nəticəyə yönələn danışıqların gələn ay davam etdirilməsini razılaşdırıb".

Nazirlər danışıqlar zamanı bir sıra məsələləri, o cümlədən hər iki tərəfin əhalisinin sülhə, təhlükəsizliyə və dayanıqlı regional inkişafa hazırlanması yollarını müzakirə ediblər.

Sonra Rusiyanın xarici işlər naziri Sergey Lavrov Ermənistanı Azərbaycandan nümunə götürməyə çağırıb: "Həll yolunun axtarılmasına hazırlıqla bağlı Bakıda da səslənən bəyanatlar hər cür dəstəyə layiqdir", - S.Lavrov qeyd edib. "Ümid edirik ki, erməni dostlar da buna qarşılıqlı cavab verəcəklər".

ATƏT-in Minsk Qrupunun həmsədrləri bir qədər aydınlıq gətirərək bildiriblər ki, Azərbaycan və Ermənistan nazirləri "Dağlıq Qarabağ münaqişəsinin nizamlanması ilə bağlı geniş məsələlər spektrini müzakirə ediblər və əhalinin sülhə hazırlanması ilə bağlı konkret tədbirlərin qəbulunun vacibliyi barədə razılığa gəliblər". Xatırladaq ki, nazirlərin danışıqları dörd saat davam edib.

İki Qafqaz ölkəsi arasında sülhün yaxınlaşması təəssüratı yaranır, lakin ekspertlər xalqın aldadıldığını bildirirlər.

"Azərbaycanın Xarici İşlər Nazirliyi Qarabağla bağlı optimist bəyanatlar verməyə son qoymalıdır. XİN-in sənədlərini oxuyanlar belə düşünə bilər ki, danışıqlar Azərbaycanın xeyrinə aparılır", - politoloq Elxan Şahinoğlu XİN-in yuxarıdakı bəyanatına toxunaraq yazır.

"Belə ifadələr işğalçını sakitləşdirir. 25 ildir ki, eyni bəyanatlar və açıqlamaları oxuyuruq, işğal isə davam edir. Əgər hər şey XİN-in bildirdiyi kimidirsə, yəni, "müzakirələr faydalı və müsbət yöndə davam edirsə", niyə heç bir şey baş vermir? Tam əminliklə demək olar ki, bu cür bəyanatlar baş nazir Paşinyan üçün faydalıdır. O, daxili problemlərlə üzləşib, odur ki, Qarabağda status-kvonu uzatmağa çalışır. Paşinyan qorxur ki, biz Yerevandakı ziddiyyətlərdən istifadə edərək Qarabağın azad edilməsi üzrə hərbi əməliyyatlara başlaya bilərik. Və biz bunu etməliyik, 2016-cı ilin aprelində Qarabağda, ötən il Naxçıvanda başlananları davam etdirməliyik. Ancaq hələlik belə çıxır ki, biz ona kömək edirik. Əslində XİN Yerevandan konkret addımların gözlənildiyini bəyan etməlidir, Dağlıq Qarabağı əhatə edən rayonların işğalı üçün heç bir əsas yoxdur", - E.Şahinoğlu qeyd edib.

Keçmiş xarici işlər naziri Tofiq Zülfüqarov da Facebook-da fikrini bildirərək eyni mövqedən çıxış edir. 13.11.2018-ci il tarixində Turan agentliyinin dərc etdiyi "Azərbaycan XİN-in bəyanatında unudulmuş altı tezis" adlı məqalədə (http://www.contact.az/ext/news/2018/11/free/politics%20news/ru/76604.htm) o, Azərbaycan XİN-ə məsləhət edir ki, rəsmi bəyanatlarda vurğulasınlar ki, "yeni erməni demokratlar", yəni, Paşinyanın demokratik adlanan hakimiyyəti Azərbaycan ərazilərinin anneksiyası siyasətini davam etdirir, ATƏT-in Minsk Qrupunun vasitəçiliyilə dinc danışıqlar prosesini hər vəchlə pozmağa çalışır.

Yeri gəlmişkən, Azərbaycan ictimaiyyəti də prezident İ.Əliyevdən effekti olmayan danışıqların davam etdirilməsini yox, qətiyyətli hərəkətlər tələb edir. Qarabağ Komitəsi bəyanat yayaraq Milli Şuranın şənbə mitinqində iştirak edəcəyini bildirib. Komitə bildirib ki, sərbəst toplaşma hüququnun məhdudlaşdırılması və siyasi məhbuslar problemi Ermənistana sərf edir və Qarabağın işğalını möhkəmləndirir.

Ölkə XİN-in nikbin bəyanatlarına güvənməyən azərbaycanlılarını mövqeyi gözlənilmədən Yerevandan dəstək alıb. "Kafkazskiy uzel"in "Yerevantsı" adlı blogeri öz postunda "Mənim addımım" siyasi blokunda görüş zamanı danışıqların müzakirəsi haqda yazıb. Görüşdə Nikol Paşinyan da iştirak edib. O, durumu ətraflı təsvir edib, deputat fraksiyasının suallarını cavablandırıb, bugünkü vəziyyətlə bağlı informasiya verib ki, deputatlar hakimiyyətin yanaşması ilə tanış olsunlar və bu mövzu ilə əlaqədar jurnalistlərin suallarını necə cavablandırmaq lazım gəldiyini bilsinlər.

N.Paşinyan deyib ki, "hazırda məsələnin həlli yoxdur və bu həllin olmamasının sadə səbəbi odur ki, mövcud yanaşmalar sonadək dəqiqləşdirilməyib.

"Lavrovun planında deyilir ki, 5 rayon Azərbaycana qaytarılmalıdır. Gerisi sonra məlum olacaq. Sual edirik: nəyin qarşılığında? Cavab vermirlər.. Biz tələb edirik ki, birinci Azərbaycan güzəştə hazır olduğunu söyləsin və biz də öz addımımızı ataq. Bizə deyirlər ki, belə olan halda onları öz ölkələrində xəyanətkar adlandırarlar. Biz də onlara deyirik: xəyanətkar biz olaqmı? Danışıqlar davam edir, qalan şeylər gedişatda məlum olacaq", - Paşinyan təxminən belə danışıb", - "Yerevantsı" yazır.

Əgər belədirsə, niyə nazir E.Məmmədyarov bir-birinin ardınca nikbin bəyanatlar verir? Ən sadə izahat belə ola bilər: hakimiyyət bütün istiqamətlərdə uğurlarını xalqa göstərmək istəyir, Qarabağın taleyi ilə bağlı danışıqlar isə ən mühümlərindən biridir.