Perinçek Fransanı da məhkəməyə verəcəkmi?

Emmanuel Macronun 24 aprel tarixini "erməni soyqırımı"nı anma günü kimi qeyd edəcəklərini açıqlaması Türkiyədə rəsmi dairələrə verilən yaxşı pas olduğu kimi,Doğu Perinçekin Vatan Partiyasına da buradan çörək çıxdı.

Erdoğanın təhlükəsizlik və xarici siyasət şurasının sədri və eyni zamanda, sözçüsü İbrahim Kalın dedi ki,Macron düşdüyü siyasi vəziyyətdən çıxış yolu tapmır,ona görə "erməni məsələsi"nə sarıldı.

Uzun müddətdən bəri "çörəyi bu məsələdən çıxan" Vatan Partiyasının sədri Doğu Perinçek isə Macrona məktub yazaraq onu beynəlxalq hüquqa hörmətlə yanaşmağa çağırdı.Perinçek "hüquq" deyərkən, əlbəttə ki,Avropa İnsan Haqları Məhkəməsi İkinci palatasının 2013-cü ilin dekabrında və Böyük Palatasının 2015-ci ilin yanvarında qəbul etdiyi qərarları nəzərdə tutur.

AİHM qərarına aparan yol isə aşağıdakı mərhələlərdən keçmişdi: 2005-ci ilin iyulunda İsveçrənin Lozan şəhərindəki mitinqdə çıxış edən Doğu Perinçek "Erməni soyqırımı" beynəlxalq yalandır!"- sözlərinə görə polis şöbəsinə dəvət edilmiş,ifadəsi alınandan sonra Türkiyənin də təzyiqləriylə azad edilsə də daha sonra İsveçrə məhkəməsi Perinçekə 3 ay həbs cəzası vermişdi.

Perinçek və "erməni soyqırımı" iddialarına qarşı mübarizə aparan təxminən 10 silahdaşı 2008-ci ilin martında Türkiyədə həbs edildilər.İyunda Perinçekin vəkili "Söz və ifadə azadlığını məhdudlaşdırdığına" görə, İsveçrəni AİHM-ə şikayət etdi.

Təxminən 2.5 il Perinçeklə qətiyyən maraqlanmayan Ankara, vəziyyətin həbsdə olan Perinçekin lehinə dəyişdiyini görən kimi,AİHM-ə onun mövqeyini dəstəkləyən müdafiə yazısı göndərdi.

2013-cü ilin dekabrında(Perinçek və silahdaşları həbsdə idilər) "Söz və ifadə azadlığını məhdudlaşdırdığına" görə İsveçrəni cəzalandıran AİHM İkinci palatasının qərarını 13 aydan sonra Böyük palata da təsdiq edincə,qərar Avropa Şurasının üzvü olan ölkələr üçün məcburi hala gəldi.

Fransa parlamenti 2006-cı ildə "erməni soyqırımı"nı tanıyan qərar qəbul etmişdi.Parlament və senat "Erməni soyqırımı" olmamışdır"- deyənlərin cəzalandırılmasına dair qanun qəbul edəndən sonra (dekabr 2012-fevral 2013) Konstitusiya Şurası o qərarı ləğv etdi.

AİHM qərarlarının Avropadakı "erməni soyqırımı" iddialarını böyük ölçüdə gerilətdiyini hamı görür.Hal-hazırda Türkiyə AİHM qərarlarını müvəqqəti də olsa həyata keçirməmək üçün Avropa Şurasından razılıq alsa da "erməni soyqırımı"na dair iddilar istənilən formada gündəliyə gələn kimi Ankara AİHM qərarlarını Avropanın önünə qoyur.Son parlament seçkisində partiyası təxminən 100 min səs alan Perinçekin də Avropada yapışdığı ən güclü budaq - AİHM qərarlarıdır.

Elə isə prezident Macron bütün bunlardan xəbərdar deyilmi? Xəbərdar olmamasına ehtimal vermək çətindir və hətta mümkün deyil.Bəs o halda "erməni soyqırımı" məsələsini hansı məntiq və matematikaya əsaslanaraq yenidən gündəmə gətirdi? Seçki ərəfəsi olsaydı,Macronun bunu ölkədəki erməni lobbisinin dəstəyini almaq üçün etdiyini düşünmək olardı.Ancaq seçki də olmadığına görə, Macron bu məsələni gündəmə gətirərək həm siyasi naşılığını bir daha göstrib i həm də əlində qaya kimi AİHM qərarlarını bayraq edən Ankaranı daha da üstün vəziyyətə keçirmədimi?

AİHM qərarlarında "1915 -ci il hadisələrinin yəhudi soyqırımı olan "holocaust" ilə müqayisə edilə bilməyəcəyi" də qeyd edildiyi halda,Türkiyə Macronun bu addımını onun özünə qarşı çevirməyə təşəbbüs edərmi?

Daha loru dildə desək: İsveçrəni məhkum etdirən Doğu Perinçek bu dəfə Fransanı AİHM-ə şikayət edərmi?