Bakı-Tbilisi-Ərzurum kəmərinin buraxılış qabiliyyəti 3 dəfə artırılacaq

Bakı-Tbilisi-Ərzurumun buraxılış qabiliyyəti 2017-ci il üçün 25 mlrd m3-ə çatacaq, deyə sənaye və energetika naziri Natiq Əliyev dünən gürcü jurnalistlərə bildirib. 

"2017-ci il üçün bu kəmər 25 mlrd m3 təbii qaz nəql edə biləcək, sonradan gücü 40-45 mlrd m3-ə çatacaq", - deyə o bildirib. 

Əliyevin sözlərinə görə, Azərbaycan Gürcüstanla birgə bir neçə yeni layihə icra etmək istəyir. "Energetika sahəsində iddialı vəzifəmiz var – Gürcüstanla birgə Türkiyəyə kimi energetika dəhlizi yaratmaq istəyirik", – deyə nazir bildirib. 

Qeyd edək ki, 26-27 dekabrda bu ölkənin baş naziri İvanişvili Azərbaycana səfər edib. Bakıda Azərbaycan və Gürcüstan hökumət təmsilçilərinin işgüzar görüşü keçirilib. Baxılan məsələlər arasında Gürcüstan üçün qazın qiymətinin ucuzlaşdırılması da olub. İvanişvilinin sözlərinə görə, Azərbaycan qiyməti azalda bilməz, çünki qiymət onsuz da ucuzdur – $145. Azərbaycanda qazın qiyməti $130-dır. "Tarifin endirilməsi imkanını Gürcüstanın daxilində axtarmalıyıq", – deyə baş nazir düşünür. 

Tərəflər həmçinin Gürcüstanın Azərbaycandan elektrik enerjisi alması imkanını da müzakirə ediblər. "Bu, qış dövrü üçün nəzərdə tutulur", – deyə Gürcüstanın energetika və təbii ehtiyatlar naziri Kaxi Kaladze bildirib. Onun sözlərinə görə, Gürcüstan elektrik enerjisinin bir hissəsini Rusiyadan alır, amma Azərbaycandan idxala da ehtiyac var. Amma idxal həcmi barədə Kaladze heç nə deməyib. 

* Hazırda Bakı-Tbilisi-Ərzurum kəmərinin buraxılış qabiliyyəti ildə 8 mlrd m3-dir. Onun gücünün artırılması üçün Azərbaycan ərazisində paralel boru kəməri çəkiləcək. –0—