Dərman və dərman maddələrinin dövlət ekspertizası tarifləri kəskin artırılıb

Bakı/01.02.21/Turan: İqtisadiyyat naziri Mikayıl Cabbarovun rəhbərliyi ilə Tarif (qiymət) Şurası 30 yanvar tarixində Səhiyyə Nazirliyinin Analitik Ekspertiza Mərkəzinə (publik hüquqi şəxs) bu qərar qəbul olunmadan belə böyük qazanc gətirən dərman vasitələri və dərman maddələrinin ekspertizası tariflərini artırıb,
Qərara əsasən TŞ fevralın 1-dən dərman vasitələri və dərman maddələrinin (əczaçılıq maddələrinin) dövlət qeydiyyatı, yenidən qeydiyyatı və qeyd sənədlərində dəyişikliklərin qeydə alınması məqsədi ilə ilkin ekspertiza üçün tarif vahidi 140 manatdan 200 manata artırılıb. Orijinal dərmanların dövlət qeydiyyatı üçün ixtisaslaşmış ekspertizaları və həmçinin qeydiyyatdan keçmiş dərmanların yeni birləşmələrinin ekspertizası 1100 manat əvəzinə 2600 manata başa gələcək.

Dərmanların yenidən qeydiyyatı məqsədi ilə ixtisaslaşmış ekspertiza üzrə tarif 550 manatdan 1300 manata artırılıb. Analitik Ekspertiza Mərkəzinin digər xidmətləri üçün tariflər də yenidən nəzərdən keçirilib.

"Tarif dəyişikliyi nəticəsində yaranan əlavə vəsait dərman vasitələrinin ekspertizasının daha qısa müddətdə aparılması və yeni xidmətlərin həyata keçirilməsi üçün əlavə iş yerlərin yaradılmasına, işçilərin sosial müdafiəsinin gücləndirilməsinə, analizlərin aparılması üçün əlavə avadanlıqların alınmasına yönəldiləcək", - deyə TŞ bildirir.

2019-cu ilin sonunda Analitik Ekspertiza Mərkəzi 895 min manat məbləğində xalis mənfəət əldə edib. Bu, 2018-ci illə müqayisədə 50%, 2017-ci ilə nisbətən 3 dəfə çoxdur. AEM-in 2019-cu il üzrə əməliyyat gəliri (5,1 milyon manatdan çox) 24,3% artıb. İl ərzində avadanlıq və qeyri-maddi aktivlərin alınması üçün 1 milyon 163 min manat istifadə edilib. İşçilərə əmək haqqı ödəmək üçün 2 milyon 271 min manat verilib, Dövlət Sosial Müdafiə Fonduna 507,2 min manat köçürülüb. Laboratoriya materialları ildə 56 min manata başa gəlib. 08B--