SKSP-da həyata keçirilmək üçün investisiya layihələri hazırlanıb

Sumqayıt Kimya Sənaye Parkının mütəxəssisləri potensial investorlar üçün nümunəvi investisiya layihələri hazırlayıb. 

İqtisadiyyat və Sənaye Nazirliyində Turan-a bildiriblər ki, layihələr hazırlanan zaman ayrı-ayrı növlər üzrə dünya təcrübəsi nəzərə alınıb. Layihələr tikinti materialları, lak-boya maddələri, şüşə və karton məmulat və s. aiddir. 

Hazırda parkın ərazisində “Azertexnolayn” MMC boru zavodu yerləşir. .  “SOCAR Polymer” MMC polimer məhsulları zavodunun tikintisi davam edir. Əvvəllər İSN məlumat vermişdi ki, SKSP-a 20 yerli və xarici şirkət maraq göstərir. 1 yanvar 2013-cü ildən qüvvəyə minən qanunvericiliyə görə, rezidentlər hər cür korporativ vergidən, o cümlədən avadanlıq üçün idxal ƏDV-dən 7 ilə azad edilir. 

Sumqayıt Kimya Sənaye Parkı (SKSP) Azərbaycan Respublikası prezidenti İlham Əliyevin 21 dekabr 2011-ci il tarixli 548 saylı Fərmanı ilə yaradılıb. Nəhəng infrastruktura malik Sumqayıt Kimya Sənaye Parkının ərazisi 167,66 hektar (ha) təşkil edir. 

“Azertexnolayn” MMC 20 fevral 2012-ci ildə MMC kimi yaradılıb. Şirkətin Sumqayıt Kimya Sənaye Parkının 32 ha torpaq sahəsində Polad-boru zavodu yerləşir. Nizamnamə kapitalı 1000 manatdır. Burada Türkiyə, Almaniya, İtaliya və Çin texnologiyası əsasında ildə 75 min ton müxtəlif diametrli polad boruların, 60 min ton müxtəlif diametrli və yüksək təzyiqə davamlı hidrotexniki avadanlıqların və 12 min ton xüsusi təyinatlı müxtəlif diametrli polietilen boruların istehsalı təşkil edəcək.

“SOCAR Polymer” MMC 16 iyul 2013-cü ildə yaradılıb (NK-ı 51 mln manat). Şirkətin Sumqayıt Kimya Sənaye Parkının 50 ha torpaq sahəsində Kanada texnologiyası əsasında ildə 150 min ton polipropilen (PP) və Avstriya texnologiyası əsasında ildə 100 min ton yüksək sıxlıqlı polietilen (HDPE) istehsal edəcək. Müəssisənin 2015-ci ilin dekabr ayında istismara verilməsi planlaşdırılır. 08D