Ermənilər əmindirlər ki, Azərbaycan karantindən sonra müharibəyə başlayacaq

İyul-avqust aylarından etibarən Ermənistanda daha dərin böhran başlayacaq, - "Çiçəklənən Ermənistan" fraksiyasından deputat Mikael Melkumyan mayın 5-də parlament tribunasından çıxış edərkən bu barədə ermənilərə xəbərdarlıq edib. Ermənistanda "dəhşətli işsizlik" gözlənildiyini deyən digər yerli ekspertlər RF-də işini itirən minlərlə erməninin vətənə qayıtmasının qaçılmaz olduğunu və pandemiya böhranı nəticəsində Ermənistanda iqtisadi müəssisələrin bağlandığını qeyd edirlər.

Karantin başa çatdıqdan sonra nə olacaq? Ermənistan zəifləyəcək, narazı əhalinin qiyamları başlayacaq. Azərbaycan müharibəyə başlayacaq, - Azərbaycan müdafiə nazirinin müharibənin bərpası ehtimalının "həddindən artıq" yüksək olduğu haqqında bu yaxınlarda səsləndirdiyi bəyanatı xatırladan Yerevan analitikləri belə hesab edirlər. "Kavkazskiy Uzel"in ("Qafqaz Qovşağı") Yerevanlı blogeri yazısına belə sərlövhə qoyub: "Koronavirus Azərbaycanın yeni müharibəyə başlamasına mane oldu".

Hərbi ekspert Vitali Manqasaryan hesab edir ki, Azərbaycan Müdafiə Nazirliyinin komanda heyətinin iclasında nazir Zakir Həsənov ölkənin komanda heyətinə müvafiq göstərişlər - hərbi əməliyyatlara hazırlaşmaq göstərişləri verib. Daha sonra Z.Həsənov ön cəbhədə qoşunları təftiş etməyə gedib. Manqasaryan Bakıda, demək olar ki, bütün KİV-lərin nazir Həsənovun bəyanatından sitat gətirməsinə diqqət çəkir və Ermənistanı həm ordunun, həm də cəmiyyətin ayıqlığını artırmağa, hadisələrin istənilən inkişaf ssenarisinə hazır olmağa çağırır.

Yerevanlı bloger bildirir ki, son iki aydır Azərbaycan ordusu "kifayət qədər intensiv qoşun manevrləri həyata keçirir, bu manevrlərdə, demək olar ki, bütün bölmələr - hərbi-hava, artilleriya, radiotexnika və radiomüdafiə bölmələri və s. iştirak edir. Həsənov isə Ermənistanın arxa cəbhəsində kəşfiyyat işləri aparmaq tapşırığı verib ki, bu da pilotsuz uçan aparatların fəallaşdırılmasını nəzərdə tutur.

Apreldə cəbhə xəttində son 1-1,5 illə müqayisədə gərginliyin həddindən artıq artması qeydə alınıb. Odlu silahdan fəal istifadə ilə yanaşı, artilleriyadan, xüsusən qumbaraatanlardan istifadə olunub. Qarabağda erməni ordusunun hava hücumundan müdafiə bölmələri İsrail istehsalı olan ORbiter 3 tipli pilotsuz uçan aparatı vurub. Azərbaycanın hərbi aviasiyası Ermənistanın hava məkanını pozmasa da, təmas xəttinə kifayət qədər yaxın yerdə manevr edib", deyə Yerevan mətbuatı yazır.

Bakının planlarını bir qədər qarışdıran koronavirus olmasaydı, bəlkə də Azərbaycanlılar hələ aprelin sonlarında hərbi əməliyyata başlayardılar. "Deyirlər ki, Azərbaycanda da bu fikirdədirlər...", deyə Yerevanlı bloger qeyd edir.

Qarabağda və Ermənistanda Azərbaycan ordusunun hücum istiqamətləri belə proqnozlaşdırılır. "Azərbaycan fəal şəkildə silahlanmağa, Qarabağ istiqamətində təkcə ön cəbhəsini deyil, həm də Ermənistanla sərhədin Naxçıvan hissəsini möhkəmləndirməyə davam edir, geniş miqyaslı müharibəyə hazırlaşır. Bakı Əsgəran rayonundan sürətlə Ağdam və digər düzən istiqamətlərdə irəliləməyə və Stepanakert ətrafına çıxmağa çalışacaq. 2016-cı il aprel müharibəsi zamanı Azərbaycan Talış istiqamətində müəyyən mövqeləri ələ keçirib, Martakert rayonunu, Sərsəng su anbarını (Qarabağın əsas su resursu), habelə Dağlıq Qarabağ və Ermənistanı birləşdirən strateji əhəmiyyətə malik Mardakert (DQR) - Vardenis (Ermənistan) yolunu təhlükə altına qoyub. Aprel müharibəsi Bakının sonradan hücum edəcəyi istiqamətləri müəyyən edib", deyə eadaily.com erməni ekspertlərə istinadla yazır.

Hərbi ekspert Üzeyir Cəfərov Turan-la söhbətində deyib ki, müharibə hər an başlaya bilər, çünki işğalçı ilə danışıqlar arzu olunan nəticəni vermir.