Cinayət işimlə bağlı

24 yanvar 2011-ci il tarixində izahat vermək üçün Gəncə şəhər prokurorluğuna dəvət edilmişdim. Prokurorla görüş zamanı heç bir sual vermədən, izahat almadan prokuror Adil Vəliyev çox kobud tonda öz köməkçisinə "izahatı alınsın, haqqında cinayət işi açılsın" tapşırığı verdi.

Mən izahat yazdım, sonra Gəncə şəhər Hərbi Komissarlığına getdik. Orada da akt tərtib edildi. Hər iki qurumda indiyə qədər hərbi xidmətlə bağlı möhlətimin olduğunu, bundan sonra isə alternativ xidmət etmək istəyimi bildirdim.

Məsələ hüquqi yox, siyasi məsələ olduğuna görə, hakimiyyət hərbi xidmət vasitəsi ilə, məni orduya göndərib fiziki vəya mənəvi məhv etmək təhdidi etdiyinə görə və siyasi məsələyə hüquqi don geyindirməyə çalışdığına görə mən də bütün cavablarımı hüquqi əsaslandırmağa çalışdım.

Bildirdim ki, Azərbaycan Respublikasının Konstitusiyasının 76-cı maddəsinin 2-ci bəndinə əsasən vətəndaşın əqidəsi həqiqi hərbi xidmət keçməyə ziddirsə, vətəndaş alternativ xidmət keçə bilər. Eyni zamanda Konstitusiyasının 48-ci maddəsinin 5-ci bəndinə görə heç kim öz əqidəsini ifadə etməyə məcbur edilə bilməz. Ali Qanunumuzun bu iki maddəsini əsas tutaraq alternativ xidmət keçmək haqqında istəyimi, bu barədə qanunları, konvensiyaları, Azərbaycanda alternativ xidmətlə bağlı hüquqi presedentlərin sənədlərini hər iki quruma təqdim etdim.

Daha sonra ölkədən çıxmaq qadağası ilə bağlı statusumu yoxlamaq üçün Gürcüstan-Azərbaycan sərhədinə getdim. Sərhəddə pasportumu təqdim edən kimi, DSX nümayəndələri yaxınlaşdılar 24 yanvar 2011-də haqqımda cinayət işi başladığını dedilər, bir müddət sonra Qazax Polis Şöbəsinin əməkdaşları gələrək kobudcasına qollarımı qandallamaq istədilər. Mən qollarımın qandallamasına kəskin etiraz etdim, bir müddət sərhəddə gərginlik yarandı. Nəhayət məni Qazax Polis Şöbəsinə gətirdilər. Budaq adlı bir mayor orada mənim saxlanmağımı əsas gətirərək mənə "sən cinayətkarsan" dedi və qolumu burmaq istədi, yumruğunu sifətimə yaxınlaşdırıb məni hədələdi. Mən burada da mayora, oradakı polislərə etiraz etdim və böyük bir mübahisədən sonra, İşgəncələr Əleyhinə Komitənin rəhbəri Elçin Behbudova zəngdən sonra sakitləşdilər. Həmin zaman avtobusdan pul oğurlamaqda təqsirləndirilən bir şəxs və sərxoş vəziyyətdə xuliqanlıq etməkdə ittiham edilən şəxslər polis idarəsinin koridorlarında sərbəst gəzsələr də, məni qaranlıq müvəqqəti saxlama təcridxanasına saldılar və gecə saat 3-ə qədər orada saxladılar.

Gecə saat 3-də Gəncə şəhər Nizami Rayon Polis idarəsinin nümayəndələri gələrək məni Gəncəyə gətirdilər və gecəni polis idarəsində keçirdim. Səhər saat 10-dan etibarən Gəncə şəhər Prokurorluğunda ifadə verməyə başladım. Prokurorluq qarşısında bu sözlər yazılmışdı:

"Dövlət iki şeydən sarsıla bilər:

Günahkar cəzasız qalanda,

Günahsıza cəza veriləndə (Heydər Əliyev)"

Amma nədənsə, müxtəlif cinayətlərdə təqsirləndirilən şəxslər prokurorluğa gətirilsə də, bütün prokurorluq əməkdaşları səfərbər olaraq səhərdən axşam saat 5-ə qədər mənim məsələmlə məşğul oldular, ifadələr aldılar, qanunları araşdırdılar. Mən zarafatla prokurorluğun rəhbərliyində çalışanda sonuncu dəfə nə vaxt belə operativ işlədiklərini soruşdum. O isə bildirdi ki, sonuncu dəfə bir adam qatilin işini araşdıranda belə operativ olub, gün ərzində bir çox adamın ifadəsini alıblar.

Hüquqi tərəflər:

Mənə qarşı irəli sürülən ittihamda Hərbi Komissarlıq "Azərbaycan Respublikasının bəzi qanunvericilik aktlarına dəyişikliklər və əlavələr edilməsi haqqında AZƏRBAYCAN RESPUBLİKASININ QANUNU" (22 dekabr 2006-cı il) əsas götürüb. Orada göstərilir ki, hərbi xidmətdən təhsillə bağlı möhlət hüququ yalnız bir dəfə, bakalavr pilləsində verilir. Mən ifadəmdə sual qoydum ki, əgər Gəncə şəhər Nizami rayon Hərbi Komissarlığı məni bu qanuna istinadən ittiham edirsə, necə olur ki, mənim 2006, 2007, 2008, 2009, 2010-cu illərdə təhsil haqqında təqdim etdiyim bütün sənədləri qəbul etmiş və mənə bütün bu illər ərzində möhlət vermişdir?

Eyni zamanda, 2007-2015-ci illər Azərbaycan Gənclərinin Xaricdə Təhsili Dövlət Proqramı çərçivəsində təhsil alan gənclərin bir çoxu birbaşa bakalavr pilləsindən magistraturaya, magistraturadan doktorantura pilləsində təhsilinə birbaşa keçid edirlər. Əgər möhlət hüququ yalnız bakalavr pilləsində verilirsə, Təhsil Nazirliyi, yaxud Azərbaycan Prezidenti yanında Təhsil Komissiyası yuxarıdakı qanunu pozurmu? Əgər mənim haqqımda cinayət işi başlanıb, təqsirləndirilib həbs edilsəm, cinayətkar sayılsam, mənimlə eyni hüquqi statusda olan yüzlərlə, minlərlə, on minlərlə gənc də cinayətkar sayılacaqmı?

Mən Vətənə xidmətdən boyun qaçırmadığımı, Konstitusiyamıza istinad edərək alternativ xidmət keçməyə və Vətənə olan borcumu ödəməyə hazır olduğumu dedim. Bununla bağlı mexanizmin hazır olmamasının vətəndaşın günahı olmadığını, bənzər presedentlərin müxtəlif prokurorluqlarda olduğunu və cinayət işlərinə xitam verildiyini sənədlərlə əsaslandırdım.

Məsələnin siyasi tərəfi:

Mən son bir neçə ayda dəfələrlə bu sifarişin arxasında dayanan Prezident Administrasiyası ilə əlaqə saxlayıb, məsələni müzakirə etməyə cəhd etdim. Onlara izah etməyə çalışdım ki, ordudan siyasi təzyiq məqsədi ilə istifadə etmək nə ordumuza, nə dövlətimizə baş ucalığı gətirmir. Onlarla aramızdakı siyasi haqq-hesabı başqa müstəvidə aparmağı müzakirə etmək istədim. Lakin, PA bütün danışıqlardan qaçdı. Mən bir vətəndaş kimi öz üzərimə düşən vəzifəni yerinə yetirdim və müharibə aparan dövlətdə ordunun kiminsə cəzalandırılması üçün təhdid kimi istifadə edilməsinin dövlətin nüfuzu üçün heç də ağıllı addım olmadığını bildirdim. Amma qarşı tərəf düşünmədi... Düşündülər ki, mənə fərari damğası vurmaqla məni nüfuzdan salacaqlar. Amma səhv etdilər. Gəncə şəhər Nizami rayon hərbi komissarlığında da bənzər səhvi etdilər, tez də düzəltdilər. Komissarlığın rəsmisi "Əsl oğullar gedib hərbi xidmətlə Vətənə xidmət edirlər. Hərbi xidmətdə olmadan Vətənə xidmət etmək olmaz" dedi. Mən dərhal "Cənab prezident İlham Əliyevin hərbi xidmətdə olmadığını bilirsinizmi? Belə çıxır ki, o da Vətənə xidmət edə bilməz?" deyəndə tez səhvini düzəldərək "yox, elə demək istəmədim, hərə necə faydalıdırsa, elə də xidmət etməlidir" dedi.

Bu əsnada diqqətimi çəkən maraqlı bir hadisə də oldu. Prokurorluqda 27 aydır haqsızlıqdan əziyyət çəkən 2 qadın və bir yaşlı kişi var idi. Onlar xeyli şikayətləndilər, hüquqlarını tələb etdilər. Amma prokurorluq işçiləri reaksiya vermədilər. Daha sonra yaşlı kişi "işə baxmasanız, sabah məktub yazıb Heydər Əliyevin məzarı üstünə qoyacam" dedi. Məhz bu cümlədən sonra vətəndaşların müraciətinə baxıldı. Mənim də bir yaxın tanışım uzun müddət iş tapa bilmədiyini görüb ali təhsil haqqında diplomunu və Heydər Əliyevə yazdığı məktubu onun məzarı üstünə qoyub getmişdi. Cəmi 1 gün sonra həmin şəxs bir dövlət qurumunda işlə təmin edildi. Maraqlı tendensiya, maraqlı üsullardır, deyilmi?

Texniki tərəfi:

Mən Gəncə şəhərindən icazəsiz çıxmamaq şərti ilə azadlığa buraxıldı. Bu gün, 26 yanvar 2011-ci il tarixində saat 11:00-dən başlayaraq yenidən ifadə verməyə davam etdim. İfadə kamera qarşısında, Gəncə şəhər Nizami rayon Hərbi Komissarlığının nümayəndələrinin iştirakı ilə həyata keçirildi. Hərbi Komissarlığın nümayəndələri qeyd etdilər ki,2006-cı ildən etibarən qanun sadəcə bakalavr pilləsində təhsil almaq üçün möhlət verməyə imkan verir. Mən isə kamera qarşısında həmin şəxslərdən soruşdum ki, necə olur ki, 2006-cı, 2007-ci, 2008-ci, 2009-cu illərdə təhsilimlə bağlı təqdim etdiyim sənədlər əsasında mənə hərbi xidmətdən möhlət hüququ verilib, 2010-cu ildə könüllü olaraq hərbi həkim komissiyasından keçsəm də mən hərbi xidmətə aparılmamışam, amma məhz parlament seçkilərində iştirak edəcəyimi bildirdiyim gündən bu günə qədər, xüsusi ilə də deputatlığa qeydə alınmış namizəd kimi toxunulmazlığımın olduğu və hərbi xidmətdən möhlət hüququmun(Seçki Məcəlləsi, 70.3-cü maddə) məni zorla hərbi, polis gücü hesabına hərbi xidmətə aparmağa cəhd etmisiniz? Hərbi Komissarlığın nümayəndələri bu sualımı cavabsız qoydular.

Hazırda istintaq davam edir və mənim Gəncə şəhərindən kənara çıxmamağım ilə bağlı qətimkan tədbiri seçilib.