Hərəkatın İdarə Heyəti İlham Əliyvə məktubla müraciət etdi

Cənab prezident,

İki il öncə, hər hansı açıq, geniş və dərin müzakirəsiz ölkədə cümhuriyyətçiliyin əsaslarını sarsıdan referendum keçirilərək, dövlət başçısının iki müddətdən çox vəzifədə qala biləcəyini təmin edən formal hüquqi dəyişiklik baş verdi.

Respublikaçı Alternativ hərəkatı olaraq, istənilən qanun dəyişikliyinin hakimiyyəti əbədiliklə təmin edə bilməyəcəyini referendum ətrafındakı məhdud müzakirələrdə dəfələrlə bildirmişdik. Dərinə baxsaq, belə əbədilik axtaranların ona həqiqi ehtiyacı da yoxdur.

O zaman mövqeyimizi daha çox tarixin örnəklərilə əsaslandırsaq da, indi ərəb dünyasında gözlərimiz qarşısında davam edən üsyan, inqilab və müharibələr də doğru düşündüyümüzü ispatlayır. Onilliklərdir öz yerlərini həm adi, həm də fövqəl qanunlarla qorunmuş sayan dövlət başçıları bir-bir hakimiyyətlərini itirirlər. Kəskin vətəndaş qarşıdurmaları bu dövlətləri böyük insani və iqtisadi itkilərlə üzləşdirir.

Bakıda hələ də heykəli duran Hüsnü Mübarəkin məcburi istefasından sonra onun ölkəsində dərhal referendum keçirildi və bir şəxsin iki dəfədən artıq prezident seçilməsi yasaqlandı. Eyni dəyişikliklər üsyan alovu hələ sönməyən və ya təzə üzə çıxan başqa ölkələrdə də baş verir.

Azərbaycanda siyasi rəqiblərin fəaliyyətinin məhdudlaşdırılması, söz və ifadə azadlığı kimi fundamental hüquqların geniş əhatədə pozulması, rüşvətə və büdcə oğurluğuna qarşı gerçək mübarizənin aparılmaması, sivil toplumun davamlı əngəllərlə üzləşməsi, möminlərlə qanunsuz rəftar və bu kimi digər mənfi mənzərələr ərəb ölkələrində baş verənlərin ölkəmizdə təkrarlanmasını artıq dərəcədə mümkün edir.

Məsələ təkcə siyasi inhisar naminə hüquqların pozulması ilə məhdudlaşmır. İqtisadi inhisarçılıq qiymətləri maaşlara nisbətdə xeyli yüksək saxlayır, onsuz da zəif yerli istehsalı rəqabət gücündən salır - TV verilişlərindən tutmuş gündəlik qida məsullarına qədər əksər Azərbaycan mal və xidmətləri əsasən ticari baryerlər hesabına hələ yaşayır.

Ərəb inqilablarından ruhlanan gənc ədalət mübarizlərimizə qarşı dövlətin repressiv addımları bizdə xüsusi təəssüf hissi doğurur, çünki bunun nəticəsində vətəndaş qarşıdurması perspektivi yalnız kəskinləşir.

Sözü gedən bütün bu ciddi qüsurların Qarabağ davamıza nə dərəcədə ziyan vurduğunu gözəl bilirsiz.

Bu inqilablar sayəsində dünyamızın girdiyi yeni dönəm Cümhuriyyətçiliyi ən tələbatlı siyasi cərəyan mövqeyində gücləndirdi. Suverenlik pərdəsi arxasında hər hansı hakimiyyətin vətəndaşlara sayğısız davranması bundan sonra daha da çətinləşəcək.

Məlumdur - siyasi prosesdə insanlar adətən mükəmməllik axtarmırlar. Yetər ki, tarixi dövrün yaratdığı ümidlər ardıcıl şəkildə doğrulsun. Azərbaycan rəhbərliyi ərəb inqilabları nəticəsində vətəndaşlarımızda yaranan ümidləri doğrultmazsa, yuxarıda göstərdiyimiz problemlər düyünü yalnız yoğunlaşacaq.

Bu ümidlərə necə cavab vermək olar? Birinci və nümunəvi addım kimi, 2009-cu il referendumunun iki prezidentlik müddətinə dair nəticələri məqsədəuyğun hüquqi yolla dəyişdirilməli, əvvəlki məhdudiyyət yerinə qaytarılmalıdır. Xalq içində olan bütün siyasi, sosial, mədəni fikir və təsəvvürlərin sərbəst ifadəsi üçün mövcud əngəllər aradan qaldırılmalıdır. Böyük siyasi rezonanslı məhkəmə qərarları Azərbaycanın üzv olduğu beynəlxalq qurumların tələblərinə dərhal uyğunlaşdırılmlıdır. Rüşvətə və büdcə oğurluğuna qarşı fraqmentar, əskik və səmərəsiz addımlar inandırıcı şəffaflıq və ədalət siyasətilə əvəzlənməlidir.

Təkrar etmək istərdik ki, heç kəs siyasətdən və dövlətdən mükəmməllik gözləmir. Sadəcə, dövrümüzün yaratdığı ümidlərin doğrulmağa başladığına vətəndaşlarımızı əməldə inandırın.